នៅពីក្រោយភាពជោគជ័យធំធេងរបស់មនុស្សម្នាក់ៗ គឺ«ជាកម្លាំងចិត្តពីមនុស្សជាទីស្រឡាញ់របស់គេ»​



មាន​ពាក្យ​មួយ​ឃ្លា​បាន​ពោល​ថា ប្ដី​ប្រពន្ធ​ប្រៀបធៀប​ដូច​ជិះ​ទូក​តែ​មួយ ទាល់តែ​ជួយ​ចូក​ជួយ​ចែវ​ទើប​បាន​ដល់​ត្រើយ។ ដើម្បី​ដល់​គោលដៅ ប្ដី​ប្រពន្ធ​ត្រូវ​ចេះ​បំពេញ​ចន្លោះ​ខ្វះខាត​គ្នា​ទៅវិញ​ទៅមក ក៏​ព្រោះ​តែ​ដឹង​រួច​ហើយ​ថា​នៅ​លើ​លោក​នេះ​គ្មាន​ភាព​ល្អឥតខ្ចោះ​នោះ​ទេ។ ហេតុនេះ វា​ជា​រឿង​សំខាន់​បំផុត នៅ​ពេល​សម្រេច​ចិត្ត​ជ្រើសរើស​នរណា​ម្នាក់​ចូល​មក​រួម​រស់​សុខ​ទុក្ខ​ជាមួយ​គ្នា​អស់​មួយ​ជីវិត។

អ្វី​ដែល​មនុស្ស​ត្រូវការ​បំផុត មាន​ពេល​ខ្លះ​គ្មាន​អ្វី​ក្រៅ​ពី​កម្លាំង​ចិត្ត​ឲ្យ​តស៊ូ​ទៅ​មុខ​ទៀត​នោះ​ឡើយ។ កម្លាំង​ចិត្ត​គឺជា​ថាមពល​ដ៏​ខ្លាំងក្លា​បំផុត ដែល​អាច​ឲ្យ​មនុស្ស​ជម្នះ​ការ​លំបាក​ទាំងឡាយ​បាន​ដោយ​ជោគជ័យ។ បើ​កម្លាំង​ចិត្ត​នេះ​ទទួល​បាន​ពី​មនុស្ស​ដែល​ពួកគេ​ស្រឡាញ់​ទៅ​ទៀត ថាមពល​ដែល​បាន​ចូល​មក​បំពេញ​ចន្លោះ​ទទេ​នេះ​នឹង​មាន​កម្លាំង​កាន់តែ​ខ្លាំងក្លា។ វា​ក៏​ជា​ហេតុផល​ដ៏​សំខាន់​មួយ​ដែល​នៅ​ពី​ក្រោយ​ភាព​ជោគជ័យ​របស់​បណ្ដា​បុគ្គល​ល្បីៗ ដែល​បាន​ផ្លាស់ប្ដូរ​ពិភពលោក​ជាច្រើន​ផង​ដែរ។

អតីត​ប្រធានាធិបតី​សហរដ្ឋអាមេរិក លោក បារ៉ាក់ អូបាម៉ា ធ្លាប់​និយាយ​ថា៖ "ពិត​ណាស់​ថា​ខ្ញុំ​នឹង​មិន​អាច​សម្រេច​បាន​នូវ​អ្វី​ដែល​ខ្ញុំ​សម្រេច​បាន​នោះ​ឡើយ បើ​គ្មាន Michelle នោះ​ទេ"។ ចំណែក​ឯ​ស្ថាបនិក Facebook លោក Mark Zuckerberg ក៏​បាន​ថ្លែង​ក្នុង​សន្ទរកថា​ឆ្នាំ​២០១៧​របស់​សាកលវិទ្យាល័យ ហាវើដ ការណ៍​ដែល​Priscilla​ភរិយា​របស់​គាត់ ជំរុញ​លោក​ឲ្យ​លះបង់​ពេលវេលា​ខ្លះ​ដើម្បី​ចូលរួម​កិច្ចការ​សង្គម ហើយ​ក៏​ជា​មនុស្ស​ម្នាក់​តែ​ម្នាក់​គត់​ដែល​សំខាន់​ជាង​គេ​ក្នុង​ជីវិត​របស់​លោក ដែល​បាន​នាំ​លោក​មក​ដល់​ទីនេះ​បាន។

ដៃគូ​ជីវិត​របស់​អ្នក​គឺជា​មនុស្ស​ដ៏​សំខាន់​បំផុត ដែល​អាច​ជំរុញ​អ្នក​ឲ្យ​ជោគជ័យ តែ​ក៏​អាច​នាំ​អ្នក​ទៅ​រក​ភាព​បរាជ័យ​ផង​ដែរ។ មនុស្ស​ម្នាក់ៗ​គ្មាន​នរណា​ល្អ​គ្រប់​ដប់ ឥត​មាន​កំហុស​នោះ​ឡើយ ដូចនេះ​សេចក្ដី​ស្រឡាញ់ ការ​យោគយល់​អធ្យាស្រ័យ​ឲ្យ​គ្នា​ទៅវិញ​ទៅមក និង​ជួយ​បំពេញ​ចន្លោះ​ដែល​ម្នាក់​ទៀត​ខ្វះខាត បើ​ចាំ​តែ​មើល​កំហុស​គ្នា នោះ​អ្នក​ទាំងពីរ​នឹង​មិន​អាច​សម្រេច​ដល់​គោលដៅ​វែងឆ្ងាយ​ជាមួយ​គ្នា​បាន​ឡើយ៕

ដោយ៖ ស្រីពៅ

X
5s