តើអ្វីទៅគឺជាសារធាតុប្រឆាំងនឹងអុកស៊ីតកម្មឲ្យពិតប្រាកដ ?
កន្លងមកយើងតែងតែធ្លាប់ឮគេថា ទទួលទានប្រភេទបន្លែនិងផ្លែឈើមួយចំនួនជួយប្រឆាំងនឹងអុកស៊ីតកម្មនៅក្នុងរាងកាយរបស់អ្នក ដើម្បីទប់ស្កាត់នឹងភាពចាស់ជ្រីវជ្រួញនិងការបង្កជំងឺកាចសាហាវផ្សេងៗ។ ប៉ុន្តែ តើអ្វីទៅគឺជាសារធាតុប្រឆាំងនឹងអុកស៊ីតកម្មឲ្យពិតប្រាកដ ? តើសារធាតុទាំងនោះមានសកម្មភាពយ៉ាងដូចម្ដេច ដើម្បីទៅទប់ស្កាត់អ្នកពីអ្វីដែលអ្នកមិនចង់បានទាំងនោះ ?
ប្រភពដែលសម្បូរដោយសារធាតុប្រឆាំងនឹងអុកស៊ីតកម្មគឺជាបន្លែនិងផ្លែឈើ គ្រាប់ធញ្ញជាតិ វីតាមីនA,C និងE។ តាមរយៈការស្រូបយកខ្យល់បំពុល និងការជក់បារី អ្នកអាចស្រូបមកជាមួយនឹងសមាសធាតុម្យ៉ាងដែលគេហៅថា រ៉ាឌីកាល់សេរី សេរីក៏ព្រោះតែសមាសធាតុទាំងនោះបើកាលណាចូលដល់កោសិការបស់អ្នកហើយ វាងាយនឹងមានប្រតិកម្មដោយភ្ជាប់ខ្លួនវាជាមួយនឹងកោសិការស់របស់អ្នក និងបំផ្លាញកោសិកាទាំងនោះ ជាហេតុនាំឲ្យវិវត្តជាជំងឺមហារីក។
តាមពិតទៅនៅក្នុងរាងកាយរបស់អ្នក ក៏មានប្រព័ន្ធសម្រាប់ទប់ទល់ជាមួយនឹងពពួករ៉ាឌីកាល់សេរីទាំងនោះដែរ ប៉ុន្តែវាមិនមានសមត្ថភាពគ្រប់គ្រាន់នោះឡើយ ហេតុនេះហើយទើបបានជាអ្នកត្រូវការកម្លាំងជំនួយបន្ថែមដើម្បីទប់ទល់និងកម្ចាត់ចេញនូវកាកសំណល់ទាំងនោះ។ ដូច្នេះភារកិច្ចនេះក៏ត្រូវប្រគល់ឲ្យសារធាតុប្រឆាំងនឹងអុកស៊ីតកម្មនេះឯង ព្រោះនៅពេលអ្នកទទួលទានសារធាតុទាំងនេះពីបន្លែ និងផ្លែឈើដែលមានផ្ទុកសារធាតុប្រឆាំងនឹងអុកស៊ីតកម្មនេះ វានឹងទៅភ្ជាប់ខ្លួនវាជាមួយនឹងរ៉ាឌីកាល់សេរី។
នៅពេលនោះ រ៉ាឌីកាល់សេរីនឹងមិនអាចសេរីតទៅទៀត ដើម្បីទៅបំផ្លាញកោសិកាអ្នកឲ្យងាប់និងវិវត្តជាជំងឺបាននោះឡើយ។ កាហ្វេសម្បូរទៅដោយសារធាតុប្រឆាំងនឹងអុកស៊ីតកម្មដែលអាចជួយបង្ការអ្នកពីមហារីកថ្លើមបាន។ ក្រៅពីនេះ អាហារដែលជាប្រភពនៃសារធាតុប្រឆាំងនឹងអុកស៊ីតកម្មនៅមានក្នុងប្រភេទបន្លែនិងផ្លែឈើដូចជា ប៉េងប៉ោះ ការ៉ុត ប៉ោម ដំឡូង ស្ពៃ គ្រាប់ធញ្ញជាតិ សណ្ដែក ក្រូច ទំពាំងបាយជូរ ស្ត្រប៊ឺរី ផ្កាខាត់ណា (broccoli) និងមាននៅក្នុងតែបៃតងនិងស្រាក្រហមផងដែរ។
អាហារប្រភេទនេះមិនត្រឹមតែមានប្រយោជន៍នៅត្រង់សារធាតុប្រឆាំងនឹងអុកស៊ីតកម្មដែលវាមាននោះទេ តែថែមទាំងសារធាតុខនិជ ប្រូតេអ៊ីន ជាតិទឹក ដែលជួយដល់សុខភាពអ្នកក្នុងផ្នែកជាច្រើនផ្សេងទៀតផងដែរ។ ដើម្បីទទួលបានប្រយោជន៍ពីសារធាតុបំប៉នទាំងនោះកាន់តែមានប្រសិទ្ធភាព ជាការប្រសើរបំផុតដែលអ្នកគួរតែទទួលទានអាហារចម្រុះពណ៌ពីប្រភពអាហារចម្រុះគ្នាឲ្យបានច្រើន៕
ដោយ៖ ស្រីពៅ
