ហេតុផលចម្បងទាំង៤យ៉ាងដែលអ្នកចាំបាច់ត្រូវតែសន្សំលុយ
ប្រសិនអ្នកពុំមានទម្លាប់ក្នុងការសន្សំលុយនោះទេ ពេលដែលអ្នកមានបញ្ហា អ្នកនឹងមានបញ្ហាធំជាពុំខានព្រោះលុយពុំអាចធ្លាក់ពីលើមេឃបាននោះទេ។ អ៊ីចឹងហើយ អ្នកគួរតែរៀនសន្សំលុយចាប់ពីថ្ងៃនេះតទៅ។ ប្រសិនអ្នកនៅមិនដឹងសន្សំលុយដើម្បីអ្វី ខាងក្រោមនេះជាហេតុផលហេតុអ្វីបានជាអ្នកចាំបាច់ត្រូវសន្សំលុយ៖
១) សន្សំសម្រាប់ភាពអាសន្ន៖ ពិតណាស់ថា ជីវិតគឺមិនទៀងទាត់នោះទេ។ រឿងអភ័ព្វអាចកើតឡើងបានគ្រប់ពេលដូចជាបាត់បង់ការងារឬជួបគ្រោះថ្នាក់ចរាចរណ៍។ល។ អ្នកត្រូវចំណាយលុយភ្លាមៗ។ ហើយប្រសិនអ្នកមិនលៃលកសន្សំលុយសម្រាប់ភាពអាសន្នដូចខាងលើនោះទេ អ្នកនឹងជួបបញ្ហារឿងលុយកាក់ជាពុំខាន។
២) សន្សំសម្រាប់ទិញគេហដ្ឋាន៖ ការចង់មានគេហដ្ឋានផ្ទាល់ខ្លួនស្ទើរតែជាក្តីសុបិនរបស់មនុស្សគ្រប់គ្នាទៅហើយ។ ដោយសារតែតម្លៃផ្ទះកាន់តែថ្លៃឡើងៗ វាពិតជាលំបាកក្នុងការទិញផ្ទះភ្លាមៗតែម្ដង។ យ៉ាងណាមិញប្រសិនជាអ្នកគ្មានលុយច្រើនមែនតែអ្នកមានលុយសន្សំខ្លះ អ្នកអាចទិញដោយបង់ជាដំណាក់កាលបានហើយអត្រាការប្រាក់ក៏ទាប។
៣) សន្សំសម្រាប់ដំណើរកម្សាន្ត៖ ហេតុផលម៉្យាងទៀតក្នុងការសន្សំលុយគឺដើរលេងកម្សាន្ត។ ប្រសិនអ្នកមានលុយក្នុងដៃ អ្នកអាចទៅដើរលេងប្រទេសឆ្ងាយៗនិងរយៈពេលយូរបាន។ ហើយការដើរលេងក៏បន្ថែមរសជាតិនិងអនុស្សាវរីយល្អៗក្នុងជីវិតផងដែរ។
៤) សន្សំសម្រាប់ការអប់រំ៖ មនុស្សមួយចំនួនសន្សំលុយសម្រាប់បន្តការសិក្សាឬសិក្សានៅក្រៅប្រទេស។ ហើយក៏មានអ្នកខ្លះទៀតសន្សំលុយសម្រាប់ការអប់រំរបស់កូនៗរបស់ពួកគេជាដើម។ អ៊ីចឹងហើយ ប្រសិនអ្នកចាប់ផ្តើមសន្សំលុយកាន់តែឆាប់ នោះកាន់តែល្អព្រោះការអប់រំត្រូវចំណាយច្រើនគួរសមផងដែរ៕
ប្រែសម្រួល៖ អឹុង មុយយូ ប្រភព៖ thebalance.com
