អាថ៌កំបាំងទាំង៦យ៉ាងដែលជួយលើកទឹកចិត្តមនុស្សឲ្យសម្រេចកិច្ចការប្រចាំថ្ងៃ
ពេលខ្លះមានកិច្ចការត្រូវធ្វើច្រើនពេកទៅ មនុស្សបែរជាលួចខ្ជិល រកកម្លាំងចិត្តមកធ្វើការមិនឃើញ។ ឯអ្នកខ្លះទៀត មានគម្រោងច្បាស់លាស់ហើយតែខ្វះកម្លាំងចិត្តទៅវិញ។ មិនថ្វីនោះទេ ប្រសិនអ្នកមានបញ្ហានេះ សូមសាកល្បងអនុវត្តគន្លឹះដ៏មានប្រសិទ្ធភាពដូចខាងក្រោម៖
១) គិតដល់ស្នាដៃចាស់៖ គោលដៅថ្មីឬការងារថ្មី វាតែងតែលំបាកព្រោះអ្នកមិនធ្លាប់ធ្វើវាពីមុនមក។ ដូច្នេះហើយ មុនពេលអ្នកចាប់ផ្ដើម ចូរគិតដល់ស្នាដៃចាស់ៗដែលអ្នកធ្លាប់សម្រេចព្រោះវាមិនត្រឹមតែលើកទឹកចិត្តនោះទេថែមទាំងជំនឿចិត្តទៀតផង។
២) មើលឲ្យបានវែងឆ្ងាយ៖ ថ្វីត្បិតតែការងារនោះច្រើន ការងារនោះលំបាក ប៉ុន្តែចូរគិតដល់រង្វាន់ឬលទ្ធផលដែលអ្នកនឹងទទួលបានក្រោយបំពេញកិច្ចការទាំងនោះ។
៣) បំបែកការងារឲ្យជាចំណែកតូចៗ៖ ជាធម្មជាតិរបស់មនុស្សនោះទេ ការងារដែលលំបាកនិងច្រើន មនុស្សពិតជាមិនចង់ធ្វើនោះទេ។ ប៉ុន្តែ អ្នកអាចប្រើយុទ្ធសាស្ត្រផ្លូវចិត្តបានដោយបំបែកការងារនោះជាចំណែកតូចៗនិងធ្វើវាម្ដងមួយ។ យូរៗទៅ អ្នកគង់តែសម្រេចទាំងអស់នោះទេ។
៤) រកសុភាសិតល្អឬមនុស្សជោគជ័យ៖ រាល់ការងារតែងមានភាពលំបាករបស់វា។ ពេលជួបការលំបាកម្ដងៗ អ្នកអាចមានអារម្មណ៍ធុញនិងចង់បោះបង់ជាដើម។ ដូច្នេះហើយ អ្នកត្រូវរកសុភាសិតឬមនុស្សដែលអាចជួយលើកទឹកចិត្តអ្នក គ្រាន់តែមើលគឺមានកម្លាំងចិត្តឡើងវិញ។
៥) ផ្ដល់រង្វាន់ដល់ខ្លួនឯង៖ អ្នកត្រូវលើកទឹកចិត្តខ្លួនឯងក្រោយពីការខំប្រឹងធ្វើការងារ។ អ្នកពុំចាំបាច់ផ្ដល់រង្វាន់ធំដល់ខ្លួនឯងនោះទេ គ្រាន់តែការញាំអីឬការលំហែកាយ១ឬ២ម៉ោងក៏បាន។
៦) គិតដល់ចំណុចចាប់ផ្ដើម៖ ប្រសិនអនុវត្តចំណុចខាងក្រោមហើយនៅមិនមានកម្លាំងចិត្តទៀតនោះ ចូរគិតដល់ចំណុចចាប់ផ្ដើមដំបូង៖ហេតុអ្វីបានជាអ្នកចាប់ផ្ដើមវា ហេតុអ្វីបានជាវាសំខាន់ចំពោះអ្នក។ល។ វានឹងជួយអ្នកឲ្យមានកម្លាំងចិត្តជាក់ជាពុំខាន៕
ប្រែសម្រួល៖ អឹុង មុយយូ ប្រភព៖ entrepreneur.com
