៥ជំហានដើម្បីផ្លាស់ប្ដូរភាសាអង់គ្លេសរបស់អ្នកពីកម្រិតមធ្យម ទៅកម្រិតខ្ពស់
ការសិក្សាភាសាអង់គ្លេស មិនមែនជារឿងងាយស្រួលប៉ុន្មានទេ។ អ្នកសិក្សាភាគច្រើន អាចអភិវឌ្ឍខ្លួនត្រឹមតែជាអ្នកនិយាយភាសាអង់គ្លេសក្នុងកម្រិតមធ្យម (Intermediate Level) ហើយមិនអាចក្លាយខ្លួនជាអ្នកនិយាយអង់គ្លេសកម្រិតខ្ពស់ (Advanced Level) បានឡើយ ទោះបីជាចំណាយពេលយ៉ាងយូរក៏ដោយ។ ខាងក្រោមនេះជាជំហានទាំង ៥ ដែលអាចជួយឲ្យអ្នកក្លាយជាអ្នកនិយាយភាសាអង់គ្លេសដ៏ស្ទាត់ជំនាញបើតាមអត្ថបទចុះផ្សាយនៅលើគេហទំព័រ WWW.TOFLUENCY.COM៖
១.ស្វែងរកមូលហេតុ ( Your Why ) មុននឹងធ្វើការផ្លាស់ប្តូរកម្រិតភាសាអង់គ្លេសរបស់អ្នក អ្នកត្រូវសួរខ្លួនឯងថា តើការនិយាយភាសាអង់គ្លេសបានល្អ ផ្ដល់អត្ថប្រយោជន៍អ្វីខ្លះដល់អ្នក។ តើអ្នកចង់ទៅរស់នៅបរទេស? ចង់បានអាហារូបករណ៍ទៅសិក្សានៅបរទេស? ឬចង់មានការងារដែលទទួលបានប្រាក់ខែខ្ពស់? បន្ទាប់មកសរសេរហេតុផលទាំងនោះ ក្នុងបញ្ជីមួយ រួចរើសយកហេតុណាមួយដែលអ្នកគិតថាសំខាន់ជាងគេមកធ្វើជាកម្លាំងចិត្ត ក្នុងការអនុវត្តន៍ជំហានបន្ត។
២.កំណត់គោលដៅ ( Your Goal ) ការកំណត់គោលដៅថា «ខ្ញុំនឹងអភិវឌ្ឍភាសាអង់គ្លេសរបស់ខ្ញុំ ឬ ខ្ញុំនឹងក្លាយជាអ្នកនិយាយអង់គ្លេសដ៏ជំនាញ» មិនគ្រប់គ្រាន់នោះទេ។ ផ្ទុយទៅវិញ អ្នកត្រូវកំណត់គោលដៅមួយច្បាស់លាស់ ដោយមានពេលវេលាកំណត់។ ឧទាហរណ៍៖ ខ្ញុំត្រូវតែរៀនអង់គ្លេសឲ្យដល់កម្រិតនេះ នៅចុងខែនេះ ក្នុងឆ្នាំនេះជាដើម។ ការកំណត់គោលដៅជាក់លាក់ ជាមួយពេលវេលាកំណត់ អាចជួយឲ្យអ្នកងាយស្រួលរៀន មិនខាតពេលា និងដឹងថា អ្នកឈានដល់កម្រិតណាហើយ។
៣.ដឹងពីវិធីសាស្ត្រត្រឹមត្រូវ អ្នកសិក្សាភាសាអង់គ្លេសភាគច្រើនបានចំណាយពេលជាមួយនឹងវិធីសាស្ត្រមិនត្រឹមត្រូវ ដូចជា៖ ព្យាយាមរៀនតែក្បួនវេយ្យាករណ៍ រៀនបកប្រែពាក្យម្តងមួយ រៀនគ្រាមភាសាខុសបរិបទ និងផ្ដោតតែមេរៀនក្នុងសៀវភៅជាដើម។ វិធីសាស្ត្រទាំងនេះមិនអាចជួយពួកគេឲ្យក្លាយជាអ្នកនិយាយភាសាអង់គ្លេសដ៏ល្អបានទេ។ ផ្ទុយពីនេះ អ្នកគួរតែចំណាយពេលវេលាជាមួយនឹងវិធីសាស្ត្រមួយចំនួនដូចជា៖ • អនុវត្តន៍ការនិយាយជាមួយជនបរទេស ឬជនជាតិដើម • រៀនពាក្យ ឃ្លា និង ក្បួនវេយ្យាករណ៍ថ្មីៗឲ្យត្រូវបរិបទ • រៀនបញ្ចេញសំឡេងឲ្យបានត្រឹមត្រូវ • ប្រើប្រាស់វិធីសាស្ត្រ LRRC ( Listen Repeat Record Compare ) • ស្តាប់ឬទស្សនា ប្រព័ន្ធផ្សព្វផ្សាយណាដែលផ្សាយជាភាសាអង់គ្លេស។
៤.អនុវត្តវិធីសាស្ត្រទាំងនោះ បន្ទាប់ពីអ្នកបានដឹងពីវិធីល្អៗក្នុងការអភិវឌ្ឍភាសាអង់គ្លេសរួចហើយ អ្នកត្រូវព្យាយាមបង្កើតឱកាសដើម្បីឲ្យខ្លួនអ្នកអាចអនុវត្តនូវវីធីសាស្ត្រទាំងនោះ។ ឧទាហរណ៍៖ អ្នកអាចចូលហាត់ការជាមួយក្រុមហ៊ុនឬ ស្ថាប័នណាដែលមានជនជាតិបរទេសធ្វើការដើម្បីអាចនិយាយជាមួយពួកគេ។ អ្នកត្រូវប្ដូរភាសាក្នុងទូរទស្សន៍ កុំព្យូទ័រ ឬទូរស័ព្ទដៃមកជាភាសាអង់គ្លេស ឬកាត់បន្ថយលុយពីការទិញវចនានុក្រមសម្រាប់បកប្រែពាក្យ មកទិញការសែតភាសាអង់គ្លេសសម្រាប់អាន ជាដើម។
៥.ធ្វើសកម្មភាពជាប្រចាំ ចំណុចដែលសំខាន់បំផុតគឺត្រូវយកជំហានខាងលើទាំងបួនមកបង្កើតជាសកម្មភាពប្រចាំថ្ងៃ។ មានន័យថា មិនមែនធ្វើវាតែមួយថ្ងៃ ឬ មួយសប្ដាហ៍ទេ គឺត្រូវធ្វើវាឲ្យក្លាយជាទម្លាប់។ ហើយត្រូវធ្វើវាឱ្យគួឱ្យចាប់អារម្មណ៍ និងរីករាយសម្រាប់ខ្លួនអ្នកក្នុងការអនុវត្តន៍៕
ដោយ៖ វាសនា
