សញ្ញា៣យ៉ាងដែលអ្នកអាចជួបប្រទះក្រោយពេលបញ្ឈប់ការទទួលទានកាហ្វេ
កាហ្វេគឺជាភេសជ្ជៈមួយប្រភេទដែលមានឥទ្ធិពលរំញោចប្រព័ន្ធប្រសាទរបស់អ្នក។ ការទទួលទានវានៅក្នុងកម្រិតសមល្មម នឹងនាំមកនូវអត្ថប្រយោជន៍ដល់អ្នក។ ប៉ុន្តែអ្នកមិនគួរទទួលទានវាច្រើនពេកនោះទេ ដែលអាចប៉ះពាល់ជាផលអវិជ្ជមានមកវិញសម្រាប់អ្នកបាន។ ដូច្នេះ តើមានសញ្ញាអ្វីខ្លះដែលអ្នកអាចជួបប្រទះក្រោយពេលអ្នកបញ្ឈប់ការទទួលទានកាហ្វេ ?
១) ឈឺក្បាល៖ កាហ្វេអ៊ីនមានឥទ្ធិពលធ្វើឲ្យសរសៃឈាមនៃខួរក្បាលរបស់អ្នករួមតូច ហើយធ្វើឲ្យលំហូររបស់ឈាមទៅកាន់ខួរក្បាលប្រព្រឹត្តទៅយឺតជាងធម្មតា។ ហេតុនេះ ក្រោយពេលដែលអ្នកបានបញ្ឈប់ការទទួលទានកាហ្វេ នោះសរសៃឈាមនៃខួរក្បាលរបស់អ្នកនឹងរីកធំឡើងវិញ ហើយបើកចំហឲ្យឈាមហូរទៅកាន់ខួរក្បាលលឿនជាងមុន ដែលជាហេតុបណ្ដាលឲ្យអ្នកអាចជួបប្រទះជាមួយនឹងអាការឈឺក្បាលបាន។ ទោះជាយ៉ាងណាក៏ដោយ អាការឈឺក្បាលរបស់អ្នកនឹងអន់ថយរហូតប្រែជាប្រក្រតីវិញ នៅពេលដែលខួរក្បាលរបស់អ្នកបានបន្សាំទៅនឹងការកើនឡើងនៃលំហូររបស់ឈាមនេះបាន។
បានអានឬនៅ ? ដំណើរការណ៍សារជាតិកាហ្វេអ៊ីននៅក្នុងខួរក្បាលរបស់អ្នក ក្រោយពីការទទួលទាន
២) អស់កម្លាំងល្ហិតល្ហៃ៖ ជាទូទៅមនុស្សដែលចូលចិត្តទទួលទានកាហ្វេជាប្រចាំ ច្រើនតែជាអ្នកដែលចង់បង្កើនថាមពលរបស់ខ្លួនតាមរយៈជាតិកាហ្វេអ៊ីនដែលត្រូវបានទទួលយកចូលក្នុងរាងកាយរបស់ពួកគេ។ ពិតណាស់ កាហ្វេអ៊ីនអាចបង្កើនថាមពលនិងកាត់បន្ថយភាពអស់កម្លាំងរបស់អ្នកបានយ៉ាងមានប្រសិទ្ធភាព។ ប៉ុន្តែប្រសិទ្ធភាពរបស់វាធ្វើការត្រឹមតែពីចន្លោះ៤ទៅ៦ម៉ោងប៉ុណ្ណោះ។ ក្រោយពេលអស់ជាតិកាហ្វេអ៊ីននេះពីក្នុងរាងកាយទៅ នោះអ្នកនឹងប្រែជាអស់កម្លាំងជាងមុនទៅទៀត។ មូលហេតុនេះហើយបានជាមនុស្សមួយចំនួនបានទទួលទានកាហ្វេបន្ថែមទៀត ដើម្បីប្រឆាំងនឹងភាពអស់កម្លាំងនេះ។ ប៉ុន្តែតាមរបៀបនេះ វាមានតែធ្វើឲ្យពួកគេញៀននឹងកាហ្វេកាន់តែខ្លាំង ហើយភាពអស់កម្លាំងរបស់ពួកគេក៏កាន់តែខ្លាំងក្លាក្រោយពេលអស់ជាតិកាហ្វេអ៊ីនពីក្នុងខ្លួនទៅ។
៣) អន្ទះអន្ទែង៖ នៅពេលកាហ្វេអ៊ីនបានចូលក្នុងរាងកាយរបស់អ្នក វានឹងទៅរំញោចចង្វាក់បេះដូងរបស់អ្នកដើរញាប់ជាងមុន រួមជាមួយគ្នានឹងការកើនឡើងសម្ពាធឈាមនិងអ័រម៉ូនរបស់ស្ត្រេសផងដែរ។ ដូច្នេះហើយនៅពេលអ្នកទទួលទានកាហ្វេ នោះវានឹងធ្វើឲ្យអ្នកមានភាពអន្ទះអន្ទែង។ បើកាលណារាងកាយរបស់អ្នកបានញៀនទៅនឹងជាតិកាហ្វេអ៊ីនហើយ នោះនៅពេលអ្នកបញ្ឈប់ការទទួលទាន វាក៏ធ្វើឲ្យអ្នកមានភាពអន្ទះអន្ទែងដែរ៕
ដោយ៖ ស្រីពៅ សូមអាន៖ អាហារបំប៉នចំនួន៥ ដែលអាចជំនួសមុខងារកាហ្វេក្នុងការផ្ចង់អារម្មណ៍អ្នកឲ្យមូលបាន
