តើទម្លាប់ទទួលទានយ៉ាងដូចម្ដេចខ្លះទើបធ្វើឲ្យសុខភាពរបស់យើងល្អ?
ក្នុងពេលបច្ចុប្បន្ននេះមានជំងឺប្លែកៗនិងគ្រោះថ្នាក់ជាច្រើនបានកើតឡើងចំពោះមនុស្ស ខណៈពេលជាមួយគ្នាទៅនឹងការកើនឡើងនៃឱសថព្យាបាលរោគពូកែៗ។ ជំងឺទាំងនោះបានបង្ហាញឲ្យឃើញពីសារសំខាន់នៃការទទួលទានឲ្យមានសុខភាពល្អនៅក្នុងជីវិតរបស់យើង។ តើទម្លាប់ទទួលទានយ៉ាងដូចម្ដេចខ្លះទើបធ្វើឲ្យសុខភាពរបស់យើងល្អ ?
១) ទទួលទានតែអាស៊ីដខ្លាញ់ដែលល្អចំពោះសុខភាព៖ អាស៊ីដខ្លាញ់ដែលល្អចំពោះសុខភាពគឺជាអាស៊ីដខ្លាញ់មិនទាន់ឆ្អែត ព្រោះវាជួយកាត់បន្ថយកម្រិតកូឡេស្តេរ៉ុលដែលមិនល្អ និងកាត់បន្ថយកម្រិតសម្ពាធឈាម។ អាស៊ីដខ្លាញ់អូមេហ្កា៣គឺជាប្រភេទមួយនៃអាស៊ីដខ្លាញ់មិនទាន់ឆ្អែតដែរ តែវាមិនអាចផលិតបានដោយរាងកាយនោះឡើយ។ ដូច្នេះហើយទើបបានជាវាជារឿងចាំបាច់ដែលអ្នកត្រូវទទួលយកវាឲ្យបានគ្រប់គ្រាន់ ដើម្បីឲ្យពួកវាជួយកសាងភ្នាសកោសិកា បង្កើនដំណើរការខួរក្បាល និងជួយដល់ការផលិតអ័រម៉ូន។ អូមេហ្កា៣សម្បូរនៅក្នុងគ្រាប់ធញ្ញជាតិ ត្រីសាឌីន ត្រីសាលមន បង្គា ផ្កាស្ពៃ និងសណ្ដែកសៀង។
២) ទទួលទានក្នុងបរិមាណសមល្មម៖ បើសិនជាអ្នកមិនយកចិត្តទុកដាក់ទៅលើសញ្ញាដែលរាងកាយរបស់អ្នកប្រាប់ថាឆ្អែតទេ នោះអ្នកនឹងទទួលទានលើសប្រមាណមិនខាន។ នៅពេលអ្នកទទួលទានលើសពីតម្រូវការរាងកាយរបស់អ្នក អ្នកអាចប្រឈមមុខនឹងបញ្ហាធាត់លើសទម្ងន់ ដែលអាចបណ្ដាលឲ្យមានភាពហេលហល ឡើងទម្ងន់ និងមិនស្រណុកនៅក្នុងខ្លួន។
៣) ទទួលទានទឹកឲ្យបានគ្រប់គ្រាន់៖ ការទទួលទានទឹកឲ្យបានចន្លោះពី១លីត្រកន្លះទៅ២លីត្រជារៀងរាល់ថ្ងៃ អាចជួយនាំយកកាកសំណល់ផ្សេងៗចេញពីក្នុងរាងកាយ ជួយដល់ការបញ្ចេញចោល រក្សាកោសិការបស់អ្នកឲ្យមានជាតិទឹក និងគាំទ្រដល់ការបញ្ចុះទម្ងន់។ ផ្លែឈើដូចជា ផ្លែឪឡឹក ត្រសក់ ប៉េងប៉ោះ និងម្នាស់ជាដើម សុទ្ធតែជាផ្លែឈើដែលសម្បូរនូវជាតិទឹក។ ម្យ៉ាងទៀតមានពេលខ្លះរាងកាយរបស់អ្នកអាចច្រឡំនូវការខ្វះខាតជាតិទឹកជាមួយនឹងការឃ្លាន ដែលអាចជាហេតុនាំឲ្យអ្នកទទួលទានអាហារច្រើនបាន។ ការខ្វះជាតិទឹកក៏មានផលប៉ះពាល់ដល់ដំណើរការនៃការគិតផងដែរ។ ហេតុនេះ អ្នកត្រូវប្រាកដថាបានទទួលទានទឹកឲ្យបានគ្រប់គ្រាន់ជាប្រចាំថ្ងៃ៕
ដោយ៖ ស្រីពៅ
