របស់ប្រើប្រាស់ចំនួន ៤ដែលអ្នកគួរចៀសវាងប្រើប្រាស់រួមគ្នា
មានរបស់ប្រើប្រាស់មួយចំនួន យើងបានខ្ចីពីអ្នកជិតស្និទ្ធឬអ្នកជិតស្និទ្ធខ្ចីយើងប្រើប្រាស់ ដែលរបស់ទាំងនោះគឺជារបស់ដែលអ្នកមិនគួរប្រើប្រាស់រួមគ្នា។ ខាងក្រោមនេះគឺជារបស់ប្រើប្រាស់ចំនួន៤ដែលអ្នកគួរចៀសវាងប្រើប្រាស់រួមគ្នា៖
១) កាសត្រចៀក៖ មនុស្សម្នាក់ៗសុទ្ធតែមានតុល្យភាពនៃបាក់តេរីនៅក្នុងអាចម៍ត្រចៀករបស់ពួកគេរៀងៗខ្លួន។ នៅពេលអ្នកប្រើប្រាស់កាសត្រចៀករបស់អ្នកដទៃ វាអាចប៉ះពាល់ដល់តុល្យភាពនេះ ដែលអាចបង្កឲ្យមានការចម្លងមេរោគនៅក្នុងត្រចៀកបាន។ ម្យ៉ាងទៀតបើអ្នកឧស្សាហ៍ប្រើប្រាស់កាសត្រចៀក អ្នកគួរតែសម្អាតវាឲ្យបានម្ដងរៀងរាល់សប្ដាហ៍។ អ្នកអាចប្រើប្រាស់សំឡីត្បារត្រចៀកជ្រលក់នៅក្នុងទឹកអ៊ីដ្រូហ្សែនពែអុកស៊ីត ដើម្បីលាងសម្អាតអាចម៍ត្រចៀកនៅលើកាសត្រចៀករបស់អ្នកបាន។
២) ក្រាស់សិតសក់៖ ក្រាស់សិតសក់និងរាល់សម្ភារប្រើប្រាស់ទាំងអស់ដែលប៉ះទៅនឹងស្បែកក្បាល សុទ្ធតែអាចចម្លងចៃនិងពពួកសរីរាង្គផ្សេងៗទៀតបាន។ ដូច្នេះអ្នកគួរចៀសវាងប្រើប្រាស់ក្រាស់សិតសក់រួមជាមួយអ្នកដទៃ ហើយមិនត្រូវភ្លេចសម្អាតវាឲ្យបានស្អាតផងដែរ។
៣) កន្សែងជូតខ្លួន៖ ជាតិសំណើមនៅក្នុងបន្ទប់ទឹកអាចបង្កើនឱកាសដល់ពពួកបាក់តេរីនិងផ្សិតបង្កបង្កើតនៅលើកន្សែងរបស់អ្នកបាន។ នៅពេលអ្នកប្រើប្រាស់វារួចហើយ អ្នកគួរយកកន្សែងរបស់អ្នកមកហាលឲ្យស្ងួតនៅខាងក្រៅជាជាងទុកវានៅក្នុងបន្ទប់ទឹក។
៤) ក្រែមលាបបបូរមាត់៖ វីរុសអាចមានវត្តមាននៅលើមាត់និងទឹកមាត់ ដូច្នេះបើអ្នកប្រើប្រាស់ក្រែមលាបបបូរមាត់រួមជាមួយអ្នកដទៃ នោះពួកវាអាចបង្កជាជំងឺផ្សេងៗមកលើអ្នកតាមរយៈក្រែមលាបបបូរមាត់បាន៕
ដោយ៖ ស្រីពៅ
