ហេតុផលសំខាន់ៗ ដែលអ្នកត្រូវប្រញាប់រៀបចំផែនការហិរញ្ញវត្ថុ កុំឲ្យធ្លាក់ខ្លួនក្រដោយមិនដឹងខ្លួន
មនុស្សភាគច្រើនគិតថាការរៀបចំផែនការហិរញ្ញវត្ថុគឺមានតែចំពោះមនុស្សដែលគេមានលុយច្រើនមហាសាលតែប៉ុណ្ណោះ ប៉ុន្តែវាមិនដូច្នោះនោះទេ ព្រោះថាកាលដែលមនុស្សមួយចំនួនទទួលបានភាពមានបានមកដល់សព្វថ្ងៃនេះ ពួកគេក៏ចាប់ផ្តើមចេញពីភាពក្រលំបាកផងដែរ។ ប៉ុន្តែពួកគេមានការរៀបចំផែនការហិរញ្ញវត្ថុមួយយ៉ាងច្បាស់លាស់។
ហេតុនេះហើយប្រសិនបើអ្នកចង់មានលុយច្រើន ទ្រព្យសម្បត្តិ ប្រាក់កាសរបស់អ្នកកើនឡើង ការរៀបចំវាឲ្យបានល្អគឺជារឿងមិនអាចខ្វះបាន។ ការរៀបចំផែនការហិរញ្ញវត្ថុគឺជាឆ្អឹងខ្នងនៃការប្រើប្រាស់លុយឲ្យបានត្រឹមត្រូវ ម្យ៉ាងវិញទៀតវាគឺជាការរៀបចំផែនការផ្ទាល់ខ្លួនរបស់មនុស្សគ្រប់រូបថាតើគួរតែចំណាយ, គួរតែសន្សំឬក៏គួរតែវិនិយោគទ្រព្យសម្បត្តិប្រាក់កាក់របស់ពួកគេ។ ខាងក្រោមនេះ គឺជាមូលហេតុទាំង៥ ដែលអ្នកគួរតែចាប់ផ្តើមបង្កើតផែនការហិរញ្ញវត្ថុមួយចាប់ពីថ្ងៃនេះទៅ៖
១) ងាយស្រួលគ្រប់គ្រង៖មនុស្សជាច្រើនតែងតែនិយាយថាពួកគេមិនដឹងទេថាលុយប្រាក់ខែដែលគេបើកបានប្រចាំខែទៅណានោះទេបានជាពួកគេចំណាយមិនដែលគ្រាន់។ប៉ុន្តែនៅពេលដែលអ្នកបង្កើតគម្រោងទុកជាមុននៃហិរញ្ញវត្ថុ អ្នកនឹងអាចមានការគ្រប់គ្រងវាបានល្អជាងមុន និងអាចដឹងថាតើលុយរបស់អ្នកនឹងគួរតែចំណាយទៅលើអ្វីខ្លះ។ ត្រូវចាំថាលុយជាមួយនឹងមនុស្ស ទោះមានច្រើនយ៉ាងណាក៏ដោយបើគ្មានកំណត់ច្បាស់លាស់ទោះមានច្រើនយ៉ាងណាក៏ចំណាយអស់ដែរ។ ពោលគឺតម្រូវការរបស់មនុស្សមិនចេះស្កប់ស្កល់ឡើយ ហេតុនេះហើយអ្នកគួរតែចំណាយទៅលើអ្វីដែលអ្នកត្រូវប្រើប្រាស់ប្រចាំថ្ងៃ និងរបស់ដែលចំាបាច់បំផុត។
២) សន្តិភាពផ្លូវចិត្ត៖ អ្នកប្រាកដជាមានភាពស្មុគស្មាញនៅពេលដែលសមាជិកនៃគ្រួសាររបស់អ្នកមានបញ្ហាដូចជាពួកគេធ្លាក់ខ្លួនឈឺ ហើយអ្នកគ្មានលុយសម្រាប់ព្យាបាលនឹងទិញថ្នាំសម្រាប់ពួកគេ។ ប៉ុន្តែប្រសិនបើអ្នកបានរៀបចំផែនការហិរញ្ញវត្ថុវានឹងបង្ហាញអ្នកឲ្យមានការនឹកគិតដល់ការសន្សំថវិកាទុកសម្រាប់អ្នកត្រូវការនៅពេលអ្នកជួបស្ថានភាពបន្ទាន់ណាមួយ។
៣) ការរស់នៅប្រកបដោយលក្ខណៈពិសេស៖ការរស់នៅគឺពិតជាសំខាន់ណាស់ដើម្បីឲ្យជីវិតរបស់អ្នកប្រកបទៅដោយអត្ថន័យ។ប្រសិនបើការចំណាយរបស់អ្នកអាចឲ្យអ្នកទទួលទានអាហារក្នុងហាងទំនើប អ្នកអាចទៅដើរកំសាន្តបានជាញឹកញាប់បាននោះ ការរៀបចំផែនការនិងមកជួយអ្នកបន្ថែមទៀតដើម្បីឲ្យប្រាកដថាអ្នកអាចបន្តការរស់នៅតាបរបៀបនេះបាន។ហើយវាក៏ជួយអ្នកមានការគិតគូរឿងអនាគតរបស់អ្នកវែងឆ្ងាយទោះបីជាអ្នកសព្វថ្ងៃមិនជួបបញ្ហាអ្វីក៏ដោយ តែវានិងឲ្យអ្នកមានការត្រៀមទុកជាមុននៅពេលដែលអ្នកលែងទទួលបានចំណូលអ្វីទាំងអស់ នោះលុយដែលអ្នកបានសន្សំជាមួយផែនការច្បាស់លាស់និងមានត្រៀមទុកសម្រាប់ចំណាយនៅពេលដែលអ្នកចូលនិវត្តន៍។
៤) មានសេរីភាព ពីបំណុល៖ ការបង្កើត នឹងដើរតាមផែនការហិរញ្ញវត្ថុគឺនិងផ្តល់ភាពជាក់លាក់មួយដែលមិនអាចបណ្តោយឲ្យអ្នកលិចលុងរហូតឲ្យអ្នកក្លាយទៅជាមនុស្សម្នាក់ដែលចំណាយច្រើនរហូតឈានដល់ក្លាយទៅជាកូនបំណុលគេ។
៥) សម្រេចក្តីសុបិនរបស់អ្នក៖សំនួរមួយដែលតែងតែចោលសួរទៅមនុស្សគ្រប់រូបគឺតើពួកគេមានក្តីសុបិន្ដអ្វីខ្លះនៅក្នុងជីវិតរបស់ពួកគេ? ហើយចម្លើយជាទូទៅនោះគឺពួកគេចង់ដើរកំសាន្តជុំវិញពិភពលោក, មានមុខជំនួញផ្ទាល់ខ្លួនមួយ, ផ្តល់អនាគតល្អភ្លឺស្វាងមួយដល់កូនៗរបស់ពួកគេ និងចូលនិវត្តន៍ជាមួយការរស់នៅដល់ល្អប្រសើរមួយ។ទាំងនេះគឺជាក្តីសុបិន្ដដែលមិនមានភាពងាយស្រួលក្នុងការសម្រេចទេ ព្រោះវាទាមទារឲ្យអ្នកមានការខិតខំប្រឹងប្រែធ្វើការងារ, តស៊ូ, អត់ធ្មត់ និងមានការរៀបចំផែនការហិរញ្ញវត្ថុបានល្អ។ទោះជាយ៉ាងណាប្រសិនបើអ្នកអាចតស៊ូនិងរឿងអស់ទាំងនេះបាននោះអ្នកនឹងអាចសម្រេចក្តីសុបិន្ដរបសអ្នកបាន៕
សម្រួលដោយ៖ អ៊ុន ស្រីនាង
