លោក សេង ពិសិទ្ធ៖ គន្លឹះ៦ចំណុច ធ្វើឱ្យបុគ្គលិកធ្វើការនៅក្រុមហ៊ុនមួយបានយូរអង្វែង
លោក សេង ពិសិទ្ធ នាយកប្រតិបត្តិនៃក្រុមហ៊ុន ASNUSSA Event Planner បានប្រាប់ Bizkhmer ថា បុគ្គលិកល្អ មិនមែនសម្លឹងឃើញតែប្រាក់ខែមួយមុខទេ ពោលគឺជាបុគ្គលធ្វើការកន្លែងណា រីកចម្រើនកន្លែងនោះ មានភាពថ្លៃថ្នូរ និងមានឈ្មោះបោះសំឡេង។
លោក ពិសិដ្ឋ ប្រាប់ទៀតថា បុគ្គលិកល្អជាបុគ្គលមានសមត្ថភាព មានចក្ខុវិស័យវែងឆ្ងាយ ដែលអាចដើរទៅមុខជាមួយក្រុមហ៊ុន និងជាដៃជើងភ្នែកច្រមុះដ៏សំខាន់ ក្នុងការជួយឱ្យក្រុមហ៊ុនរីកចម្រើន។
តើធ្វើយ៉ាងណាដើម្បី រក្សាបុគ្គលិកល្អឱ្យធ្វើការនៅក្រុមហ៊ុនមួយបានយូរ? ដើម្បីឱ្យពួកគេធ្វើការនៅក្រុមហ៊ុនមួយបានយូរ លោក ពិសិដ្ឋ ថា ម្ចាស់ក្រុមហ៊ុនគួរអនុវត្តដូចខាងក្រោម៖
១- ត្រូវឱ្យបុគ្គលិកយល់ថា ក្រុមហ៊ុននេះដូចជាផ្ទះរបស់គេ
២- បន្តជំរុញសមត្ថភាពរបស់បុគ្គលិក
៣- បណ្ដុះបណ្ដាលបុគ្គលិកនូវ ស្មារតី ជំនាញ និងការងារផ្សេងៗ
៤- អនុញ្ញាតឱ្យបុគ្គលិកបញ្ចេញស្នាដៃ កសាងសមិទ្ធផលរបស់ខ្លួន
៥- ក្រៅពីប្រាក់ខែ ត្រូវចេះផ្ដល់ជារង្វាន់ ប្រាក់លើកទឹកចិត្ត និងភាគហ៊ុនដល់បុគ្គលិក ពេលក្រុមហ៊ុនរីកចម្រើន
៦- មិនត្រូវចាត់ទុកពួកគេត្រឹមតែបុគ្គលិកទេ ប៉ុន្តែជាទ្រព្យសម្បត្តិរបស់ក្រុមហ៊ុន "បុគ្គលិកសំខាន់ ជាបុគ្គលិកដែលយើងត្រូវយកចិត្តទុកដាក់ខ្លាំង និងចាត់ទុកគាត់ដូចសមាជិកគ្រួសារអ៊ីចឹង។ ពួកគាត់មានសិទ្ធិដឹងឮព័ត៌មានសំខាន់ៗដូចយើងដែរ"។ លោក សេង ពិសិដ្ឋ បញ្ជាក់៕
ដោយ៖ សុវណ្ណមុនីលីតា
