វិធីសាស្ត្រ ៦យ៉ាង សម្រាប់ដោះស្រាយជាមួយមនុស្សគំនិតអវិជ្ជមាន ដើម្បីកុំឲ្យពួកគេនាំទុក្ខដល់អ្នក
អ្នកណាក៏ធ្លាប់ជួបប្រទះនឹងគុណវិបត្តិដែលនាំមកពីមិត្តភ័ក្ដិ អ្នករួមការងារ ឬសមាជិកគ្រួសារដែលមានគំនិតអវិជ្ជមាន។ ប្រហែលជាឥឡូវអ្នកកំពុងតែធ្វើការជាមួយអ្នករអ៊ូរទាំ តវ៉ាច្រើន ហើយចូលចិត្តនិយាយមិនល្អពីអ្នកដទៃ។
មនុស្សទាំងនេះចូលចិត្តគិតអ្វីអវិជ្ជមានដែលធ្វើឲ្យគេគ្រប់គ្នាធុញទ្រាន់។ បើអ្នកមិនប្រយ័ត្នពីមនុស្សជំពូកនេះទេ នោះពួកគេនឹងអាចធ្វើឲ្យអ្នកបាត់បង់ការតាំងស្មារតីក្នុងការបំពេញគោលដៅរបស់ខ្លួនថែមទៀតផង។ ប្រើវិធី៧ខាងក្រោមដើម្បីដោះស្រាយជាមួយបញ្ហាទាំងនេះ។
១) កំណត់ព្រំដែន៖ អ្នកមិនចាំបាច់មានអារម្មណ៍ថាធុញទ្រាន់ដែលត្រូវស្ដាប់មនុស្សទាំងនោះរអ៊ូរទាំនោះទេ ព្រោះថាអ្នកមិនអាចទៅឃាត់ពួកគេបានឡើយ តែអ្វីដែលអ្នកអាចធ្វើបានគឺព្យាយាមនៅឲ្យឆ្ងាយពីពួកគេបន្តិច។ ការគិតបែបអវិជ្ជមានរបស់ពួកគេអាចធ្វើឲ្យអត្តចរិត ក៏ដូចជាការគិតរបស់អ្នកផ្លាស់ប្ដូរបានដែរ។
២) គេចពីអ្នកដែលពូកែតវ៉ា៖ មនុស្សជំពូកនេះមិនដែលព្យាយាមរកដំណោះស្រាយនោះទេ ផ្ទុយទៅវិញគឺពួកគេចូលចិត្តគិតថាបញ្ហាមិនមានវិធីដោះស្រាយនោះទេ។ វានឹងធ្វើឲ្យអ្នកមិនមានគំនិតវិជ្ជមាននោះឡើយ ហេតុនេះបើមិនជាចាំបាច់ទេ អ្នកមិនគួរប្រាស្រ័យទាក់ទងជាមួយពួកគេច្រើនឡើយ។
៣)កុំបង្កើតជម្លោះ៖ កុំព្យាយាមពាក់ព័ន្ធនៅក្នុងជម្លោះជាមួយមនុស្សប្រភេទនេះ សុខចិត្តដើរចេញ ឬដើរគេចវិញវាល្អជាជាង។ នេះមិនមែនបង្ហាញថាអ្នកជាមនុស្សអន់នោះទេ គឺបានន័យថាអ្នកជាមនុស្សឆ្លាតទៅវិញទេ។
៤)កុំគិតពីអ្វីដែលពួកគេចូលចិត្តធ្វើ៖ ពេលខ្លះ មនុស្សធ្វើទៅតាមអារម្មណ៍របស់ខ្លួនឯង មិនមែនតាមហេតុផលនោះទេ។ ដូចនេះបើអ្នកយកពេលវេលាដ៏មានតម្លៃរបស់អ្នកទៅអង្គុយគិតថាហេតុអីបានជាគេធ្វើបែបនេះ ធ្វើបែបនោះ អ្នកនឹងមិនងាយយល់ឡើយ ហើយនាំតែខាតពេលក្នុងការបំពេញកិច្ចការដែលមានប្រយោជន៍សម្រាប់ខ្លួនឯង។
៥)នៅជាមួយមនុស្សដែលមានគំនិតវិជ្ជមានឲ្យបានច្រើន៖ មនុស្សទាំងនេះនឹងធ្វើឲ្យការគិតរបស់អ្នករីកចម្រើនជាងមុន ហើយនៅពេលដែលអ្នកមានបញ្ហា ពួកគេនឹងផ្ដល់ជាយោបល់ថ្មីហើយល្អដល់អ្នកជានិច្ច។
៦) ពង្រឹងភាពវិជ្ជមាននៅក្នុងខ្លួនអ្នក៖ អ្នកត្រូវតែមានជំហររឹងមាំ ហើយកុំមនុស្សទាំងនោះផ្លាស់ប្ដូរជីវិតអ្នកឲ្យយ៉ាប់ជាងមុនឲ្យសោះ។ មិនយូរមិនឆាប់មនុស្សទាំងនោះ ក៏នឹងទទួលឥទ្ធិពលនៃការគិតវិជ្ជមានពីអ្នកផងដែរ៕
ដោយ៖ តូច ម៉ាយ៉ារស្មី
