ហេតុអ្វីពេលប្រជុំការងារម្ដងៗ រញ៉េរញ៉ៃយ៉ាងនេះ? វិធី៥យ៉ាងជួយគ្រប់គ្រងការប្រជុំឲ្យរៀបរយវិញ
ការប្រជុំគឺនៅពេលមានមនុស្ស ២ឬច្រើនមកពិភាក្សាគ្នា ក្រោមប្រធានបទណាមួយ ដែលភាគច្រើនវាតែងកើតមានឡើងនៅតាមក្រុមហ៊ុននិងការរកស៊ីជួញដូរនានា។ នៅពេលខ្លះវាហាក់ដូចជាពិបាកគ្រប់គ្រងការប្រជុំឲ្យបានល្អដែរ សម្រាប់ក្រុមហ៊ុនខ្លះ។ តែក្រុមហ៊ុនខ្លះទៀត គឺមានការប្រជុំជោគជ័យហើយ មានវិន័យល្អទៀត។ នេះមកពីពួកគេបានអនុវត្តនូវវិធីសាស្ត្រទាំង៥យ៉ាងក្នុងការគ្រប់គ្រងការប្រជុំឲ្យមានរបៀបតាមវិធីខាងក្រោមនេះ៖
១) ត្រូវជ្រើសរើសថាតើអ្នកចង់ប្រជុំឬអត់?
មុនដំបូងគេ អ្នកត្រូវជ្រើសរើសសិនថាតើវាចាំបាច់ឬអត់ដែលអ្នកត្រូវមកប្រជុំនេះ? អ្នកត្រូវគិត ថាតើវាសំខាន់ឬអត់ក្នុងការចែករំលែកព័ត៌មានទៅកាន់មនុស្យគ្រប់គ្នាតាមរយៈការប្រជុំធំមួយ។ តែបើពេលខ្លះព័ត៌មាននោះអាចផ្ញើគ្នាតាមអ៊ីមែល ឬក៏តាមសារបាននោះ វានឹងល្អសម្រាប់អ្នកដែរ។
២) ត្រូវអញ្ជើញអ្នកដែលសំខាន់មកប្រជុំបានហើយ
ពេលប្រជុំបានពាក់កណ្ដាលហើយ អ្នកមិនគួរទៅសួរម្នាក់នោះថាអ្នកមកធ្វើអីនោះទេ។ កុំបំផ្លាញពេលវេលាអ្នកដែលមិនគួរមកប្រជុំនេះអី។ ហើយវានឹងក្លាយជាការប្រជុំដ៏រញ៉េរញ៉ៃមួយបើអ្នកធ្វើបែបនេះ។ បើសិនអ្នកចង់ប្រជុំអំពីចំណូល ចំណាយទឹកប្រាក់ អ្នកគួរតែកោះហៅផ្នែកគណនេយ្យ មកប្រជុំទៅ។
៣) មានមាតិកាច្បាស់លាស់
ដើម្បីបានការប្រជុំដ៏ជោគជ័យមួយ អ្នកត្រូវជ្រើសរើសសិនថាត្រូវនិយាយពីអីខ្លះ? តើអ្វីទៅជាគោលបំណងអ្នក? តើអ្វីទៅដែលអ្នក ចង់ឲ្យជោគជ័យ?
៤) បង្ហាញឲ្យច្បាស់ពីការរំពឹងទុករបស់អ្នក
នៅពេលអ្នក ចាប់ផ្ដើមកោះហៅគេឯងឲ្យមកប្រជុំ តើអ្នកដឹងថាខ្លួនចង់បានអ្វីពីគេដែរទេ? តើអ្នកស្ដាប់ត្រូវតែកត់ត្រារាល់ពាក្យរបស់អ្នកទេ? តើការប្រជុំគួរតែមានការបញ្ចេញយោបល់ទេ? តើគួរតែមានការធ្វើបទបង្ហាញទេ? នេះជាអ្វីដែលអ្នកគួរសួរខ្លួនឯងពីការរំពឹងទុកសិន។
៥) ត្រូវទៀងទាត់ពេលវេលា
ការចាប់ផ្ដើមទាន់ពេលវេលាគឺសំខាន់បំផុតហើយ។ កាលណាអ្នកជាមនុស្សដែលមកទាន់ពេលវេលា បង្ហាញថាអ្នកជាមនុស្សគោរពវិន័យ ហើយការប្រជុំនឹងគ្មានទេពាក្យថា រញ៉េរញ៉ៃ៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ thebalancesmb
