ប្រើបណ្តាញសង្គមរាល់ថ្ងៃមានដឹងទេថាវាមានឥទ្ធិពលដល់ការសម្រេចចិត្តក្នុងការទិញយ៉ាងណាខ្លះ?
បណ្តាញសង្គមចាប់ផ្តើមចេញជា ផ្លេតហ្វមអនឡាញ (online platform) សម្រាប់មនុស្សធ្វើការចែករំលែករូបភាព និងទំនាក់ទំនងជាមួយគ្នាទៅវិញទៅមក តែទោះជាយ៉ាងណាវាបានវិវត្តទៅជាការធ្វើទីផ្សារ។ តាមការស្រាវជ្រាវថ្មីៗនេះបង្ហាញថាបណ្តាញសង្គមដើរតួនាទីច្រើនដែលមានការជះឥទ្ធិពលដល់ការសម្រេចចិត្តទិញ នេះវាមានន័យថាជាពេលវេលាដែលក្រុមហ៊ុនចាប់ផ្តើមយកចិត្តទុកដាក់លើយុទ្ធសាស្រ្តសង្គមរបស់គេ។
វាជារឿងអកុសលមួយដែលក្រុមហ៊ុនប្រឹងមុជទៅក្នុងទីផ្សារបណ្តាញសង្គម ដោយមិនគិតឲ្យបានល្អិតល្អន់ពីយុទ្ធសាស្រ្ត គេអាចប្រឈមមុខនឹងការខកចិត្ត។ វាមានអំណះអំណាងដ៏រឹងម៉ាំដែលបង្ហា្ញថាបណ្តាញសង្គមជាវិធីសាស្រ្តដ៏ត្រឹមត្រូវ តែវាមានឥទ្ធិពលយ៉ាងណាដល់ការសម្រេចចិត្តទិញ របស់អតិថិជន? ដើម្បីឲ្យអ្នកដឹងថាបណ្តាញសង្គមជះឥទ្ធិពលយ៉ាងណាដល់ការសម្រេចចិត្តទិញ អ្នកគួរយល់ដឹងពីចិត្តសាស្ត្រនៅពីក្រោយការសម្រេចចិត្ត។ ការសម្រេចចិត្តទិញរបស់អតិថិជនអាចមានភាពស្មុគស្មាញជាងអ្វីដែលអ្នកគិត បណ្តាញសង្គមបានបង្កើននូវភាពទាក់ទាញយ៉ាងច្រើនរបស់ការសម្រេចចិត្តរបស់អ្នកប្រើប្រាស់តាមរយៈហេតុផលដូចខាងក្រោមនេះ៖
១) អារម្មណ៍ដែលអាចជះឥទ្ធិពលដល់ការសម្រេចចិត្ត
អារម្មណ៍របស់អ្នកប្រើប្រាស់ជាឥទ្ធិពលជំរុញឲ្យមានការទិញ មនុស្សដែលសម្រេចចិត្តទិញ គឺប្រើប្រាស់ខួរក្បាលផ្នែកខាងឆ្វេងទាំងស្តាំនៃខួរក្បាលរបស់គេ ពេលដែលគេសប្បាយចិត្ត គេនឹងសម្រេចចិត្តទិញ ប្រសិនបើការផ្សព្វផ្សាយមានភាពទាក់ទាញតែបន្តិច តែបើគេអារម្មណ៍មិនល្អវិញទោះការផ្សព្វផ្សាយពោរពេញទៅដោយភាពទាក់ទាញយ៉ាងណាក៏មិនអាចទាក់ចិត្តគេបានដែរ។ តែមានមនុស្សមួយប្រភេទតូចដែលតែងធ្វើការសម្រេចចិត្តទិញនៅពេលដែលគេមានអារម្មណ៍មិនល្អ គេទុកវាជាការរំសាយអារម្មណ៍ គ្រាន់តែកាន់ស្មាតហ្វូន ហើយអូសចុះអូសឡើងក៏បញ្ជាទិញ។
២) មនុសុ្សយើងចូលចិត្តសង្ស័យច្រើន
អ្នកលក់ អ្នកតំណាងចែកចាយផលិតផលនីមួយៗព្យាយាមស្ទើរគ្រប់មធ្យោបាយ ដើម្បីធ្វើយ៉ាងណាឲ្យអតិថិជនឬអ្នកប្រើប្រាស់ទិញផលិតផលរបស់ខ្លួន។ ទាំងអស់នេះក៏ព្រោះធម្មជាតិរបស់មនុសុ្សគឺមានការសង្ស័យច្រើន។ ផលិតផលដែលអាចទៅមើលផ្ទាល់ ប៉ះផ្ទាល់នៅសឹងមិនទុកចិត្ត ចុះទម្រាំផលិតផលដែលគ្រាន់តែឃើញតាមបណ្តាញសង្គម គាត់ត្រូវសួរដេញដោលពីនេះពីនោះច្រើន ទើមឈានដល់ការសម្រេចចិត្តទិញ ។ អ្វីដែលគួរសង្កត់ធ្ងន់គឺបង្កើតនូវភាពជឿជាក់ឲ្យបានទៅដល់អតិថិជន ជាពិសេសបើក្រុមគ្រួសារ ឬមិត្តភក្តិគាត់បានទិញនូវអ្វីមួយដូចដែលគាត់ចង់ទិញដែរនោះ ហើយគុណភាពផលិតផលល្អ ទំនុកចិត្តរបស់គាត់កាន់តែមានខ្លាំង នេះជាឥទ្ធិពលមួយដែលទាក់ចិត្តគាត់មកបានលឿន។
៣) ចិត្តគំនិតនៃបណ្តុំមនុស្ស
បើឲ្យទិញផលិតផលសាកល្បងមួយតែម្នាក់ឯង ច្បាស់ណាស់ថាមនុស្សភាគច្រើនគាត់រាងស្ទាក់ស្ទើរក្នុងចិត្ត តែបើមានអ្នកនេះផងអ្នកនោះផងមកទិញ ជាមួយគ្នាទោះពួកគាត់មិនស្គាល់គ្នាក៏ដោយ គាត់អាចមានកូនចិត្តមួយគិតថាប្រហែលជាមិនអីទេព្រោះមានអ្នកផ្សេងគេទិញដែរតើ។ ដូច្នេះការបង្កើតអំណាចមួយក្នុងបណ្តាញសង្គមគឺសំខាន់ណាស់ដើម្បីអន្ទងអ្នកទិញ អ្នកប្រើប្រាស់ឲ្យចាប់អារម្មណ៍និងទុកចិត្តលើផលិតផលយើង និងសម្រេចចិត្តក្នុងការទិញ។ ទាំងអស់នេះគ្រាន់តែជាផ្លូវមួយចំនួនដែលបង្ហាញថា បណ្តាញសង្គមមានឥទ្ធិពលយ៉ាងណាដល់ការសម្រេចចិត្តទិញរបស់អ្នកប្រើប្រាស់ បើអ្នកពិតជាចង់ប្រូមូតផលិតផលអ្នកគួរពិចារណាការដល់ការប្រើប្រាស់បណ្តាញសង្គមដើម្បីទទួលបានអតិថិជនសក្តានុពលដែលើនឹងទិញផលិតផលឬសេវាកម្មរបស់អ្នក៕
ដោយ៖ យ៉ាយ៉ា
ប្រភព៖ Business Blog
