គន្លឹះ ៧ យ៉ាងជួយអ្នកឲ្យបង្កើនបរិយាកាសសិក្សាបានកាន់តែប្រសើរ
ការសិក្សាក្រេបយកចំណេះវិជ្ជាជារឿងសំខាន់ខ្លាំងណាស់សម្រាប់មនុស្សៗ។ ជីវិតជាសិស្ស អ្នកពិតជាចង់ឲ្យការសិក្សាក្នុងមួយឆមាស ឬនៅក្នុងឆ្នាំនេះរបស់អ្នកល្អ និងប្រសើរឡើង។ អ្នកពិតជាត្រូវខំរៀនឲ្យបានខ្លាំងជាងមុនដើម្បីទទួលបានលទ្ធផលដែលអ្នកចង់បាន ដើម្បីឆ្លើយតបទៅនឹងការវិនិយោគរបស់អ្នកទៅលើការសិក្សានោះ។ ខាងក្រោមនេះជាគន្លឹះមួយចំនួនបង្ហាញពីការបង្កើតបរិយាកាសសិក្សារបស់អ្នកឲ្យបានល្អប្រសើរ៖
១) កាត់បន្ថយការរំខាន
មានបរិយាកាសខ្លះ ទោះបីក្នុងបណ្ណាល័យក៏អាចជាការរំខានដល់អ្នកធ្វើឲ្យអ្នកបាត់បង់ការផ្ចង់អារម្មណ៍បានដែល វាអាស្រ័យលើចរឹតលក្ខណៈផ្ទាល់ខ្លួនរបស់បុគ្គលម្នាក់ៗថាបរិយាកាសបែបណាដែលអាចជាការដែលនាំឲ្យគេផ្ចង់អារម្មណ៍ក្នុងការធ្វើអ្វីមួយបានល្អ។ គន្លឹះក្នុងការកាត់បន្ថយការរំខាននេះមិនអាចផ្តល់ជាការណែនាំដ៏ត្រឹមត្រូវបំផុតមួយបានទេ ពេលខ្លះវាទាក់ទងទៅនឹងអារម្មណ៍ ចំណង់ចំណូលចិត្តនៃការរស់នៅ ឬតាមប្រភេទនៃមេរៀនដែលអ្នកត្រូវរៀន។ ការដែលព្យាយាមស្វែងរកអ្វីដែលសាកសម ពេញចិត្តនឹងអ្នកគឺជាវិធីសាស្ត្រមួយល្អបំផុត។
២) បង្កើននិងអភិវឌ្ឃទម្លាប់សិក្សា
អ្នកមិនអាចកំណត់នឹងគ្រប់គ្រងទៅលើការសិក្សារបស់អ្នកឲ្យបានល្អរហូតនោះទេ តែអ្នកអាចធ្វើការកែប្រែ និងអភិវឌ្ឍនូវទម្លាប់ផ្ទាល់ខ្លួនរបស់អ្នកបានដោយប្រាប់ទៅខួរក្បាលថា “ដល់ពេលរំឮកមេរៀនហើយ ដល់ពេលធ្វើលំហាត់ហើយ ដល់ពេលត្រូវសម្រាកខ្លះហើយ…” ពេលដែលអ្នកធ្វើការងារច្រើន រាងកាយអ្នកច្បាស់ជាពិបាកទទួលយកណាស់។ ដូច្នេះទោះជាអ្នកចង់ឲ្យការសិក្សារបស់អ្នកបានល្អប្រសើរខ្លាំង ក៏ត្រូវចំណាយពេលសម្រាប់ខ្លួនឯងក្នុងការសម្រាកខ្លះដែរ។
៣) កុំខំតែម្នាក់ឯង
ជ្រើសរើសបរិយាកាសដែលល្អសម្រាប់ការសិក្សាបានហើយ បង្កើតទម្លាប់សម្រាប់ខ្លួនឯងបានហើយ តែពេលខ្លះអ្នកគួរតែស្វែងរកអ្នកដែលអាចពិភាក្សាពីការសិក្សានេះធ្វើជាដៃគូដើម្បីពង្រីកចំណេះដឹងបន្ថែម ដោយសារអ្នកអាចផ្លាស់ប្តូរយោបល់ ចែករំលែកចំណេះដឹងគ្នាទៅវិញទៅមក។ ជីវិតជាសិស្ស ជានិស្សិត វាមិនអាចបានជោគជ័យទេបើគ្រាន់តែរៀននៅសាលាហើយមកវិញរៀនតែម្នាក់ឯងនោះ។ កុំខំតែម្នាក់ឯងព្រោះតែចង់ពូកែខ្លាំងតែឯង អ្នកមិនមានការរីកចម្រើនជាងនរណាម្នាក់ឡើយ។ បង្កើតក្រុមដើម្បីរៀនជាចំនុចសំខាន់ដើម្បីនាំអ្នកទៅរកភាពជោគជ័យ និងប្រកួតប្រជែងបានច្រើន។
៤) ព្យាយាមផ្លាស់ប្តូរទេសភាពខ្លះ
ការដែលរៀននៅផ្ទះជារឿងមួយល្អ និងងាយស្រួលសម្រាប់មនុស្សរាល់គ្នា។ តែបើអ្នកមានទម្លាប់មួយដែលតែងបិទទ្វារបន្ទប់ហើយឈ្ងោកមុខរៀននោះវាអាចនឹងបង្កហានិភ័យដល់អ្នកទៅវិញទេ។ ខួរក្បាលអ្នកមិនទទួលបានអ្វីថ្មីៗទេ បើអ្នកនៅតែថតចំនុចដដែលៗគរទុកពីមួយថ្ងៃទៅមួយថ្ងៃ ព្យាយាមផ្លាស់ប្តូរទេសភាពដើម្បីឲ្យខួរក្បាលថតជាប់រូបភាពល្អៗ និងងាយស្រួលបង្កើនការចងចាំ។ អ្នកអាចប្រឈមមុខនឹងការកើតជំងឺធុញថប់អារម្មណ៍ នៅពេលដែលអ្នកមិនព្យាយាមសម្អាតផ្នែកស្រអាប់ចេញពីផ្ទៃខួរក្បាលរបស់អ្នក។
៥) បង្កើតភាពចល័តនៃការសិក្សា
កន្លែងណាក៏អាចរៀនបានដែរ ឲ្យតែយើងដាក់ចិត្តរៀន មានអ្នកខ្លះមិនមានពេលវេលាគ្រប់គ្រាន់ដើម្បីរៀនទេដោយសារកត្តានានាក្នុងជីវភាពរស់នៅប្រចាំថ្ងៃ។ តែការដែលគេអាចរៀនបានពូកែដោយសារគេចេះឆ្លៀតពេលរៀន អ្នកដែលធ្វើដំណើរតាមរថយន្តក្រុងអាចឆ្លៀតពេលអានសៀវភៅ ឬរំឮកការធ្វើលំហាត់បានពេលនៅតាមផ្លូវទៅសាលារៀន។ ឬអាចស្តាប់សម្លេងរបស់គ្រូដែលបានថតទុកពេលគាត់ពន្យល់មេរៀន ព្យាយាមស្តាប់ម្តងហើយម្តងទៀតពិសេសមុនពេលថ្ងៃប្រលងគៀកចូលមកជិតដល់។
៦) ទទួលយកការជួយពីមិត្ត ឬក្រុមគ្រួសារ
វាមិនមែនជារឿងដែលត្រូវខ្មាស់អៀនទេដែលគ្រាន់តែសុំជំនួយពីមិត្តភក្តិ ឬក្រុមគ្រួសារក្នុងការស្វែងរកចំណេះដឹងបន្ថែម ឬឲ្យពួកគាត់បន្ថែមចំនុចដែលយើងនៅមិនទាន់ច្បាស់ វាជាជាងការដែលគិតថាខ្លាចអន់ហើយសុខចិត្តបន្តការទាំងដែលមិនចេះអ្វីសោះ។ ទទួលយកចែករំលែកចំណេះដឹងពីអ្នកជុំវិញខ្លួនជារឿងមួយចាំបាច់ដែលអ្នកត្រូវធ្វើ។ ត្រូវចាំថា ពេលអ្នកអាចពន្យល់ពីការការងារឬចំណេះដឹងទៅដល់នរណាម្នាក់ ឬអ្នកស្នើសុំជំនួយពីនរណាម្នាក់ដើម្បីស្វែងរកចំណេះដឹង នោះអ្នកជាមនុស្សឆ្លាត រឹងម៉ាំ និងអភិវឌ្ឍលឿនបំផុត។
៧) ប្រើប្រាស់តិចណូឡូជីដើម្បីបង្កើនប្រយោជន៍បន្ថែម
កុំបដិសេធក្នុងការប្រើប្រាស់បច្ចេកវិទ្យា ព្រោះវាជួយអ្នកច្រើនណាស់សម័យនេះ។ សៀវភៅដែលអ្នកមានក្នុងដៃ ការសិក្សាពីសាលារៀន ការពន្យល់របស់លោកគ្រូអ្នកគ្រូវាមិនអាចជួយយើងបានគ្រប់មួយរយភាគរយទេ។ ការប្រើប្រាស់នាឡិកាឆ្លាតវៃ ទូរស័ព្ទដៃទំនើបធ្វើការដោនឡូត e-book ឬ audiobook ដើម្បីសិក្សាបន្ថែមនូវចំណេះដឹងបន្ថែម ឬចំណេះនានាដែលអ្នកមិនបានរៀននៅសាលា សម័យនេះជាសម័យបច្ចេកវិទ្យាមានសម្ភារៈទំនើបនៅក្នុងដៃដូច្នេះគួរប្រើប្រាស់វាឲ្យអស់ពីលទ្ធភាព។ តែត្រូវចាំផងដែរវា បច្ចេកវិទ្យាវាមានប្រយោជន៍នៅពេលដែលអ្នកប្រើវាក្នុងផ្លូវត្រូវ ការដែលប្រើបណ្តាញសង្គមខុសផ្លូវវានឹងនាំអ្នកទៅកាន់រឿងអន្តរាយមិនខាន៕
ដោយ៖ យ៉ាយ៉ា
ប្រភព៖ Rasmussen College
