១០ ចំនុចជួយអ្នកឲ្យមានតុល្យភាពរវាងការធ្វើការងារពេញម៉ោង និង ការរៀនមហាវិទ្យាល័យក្នុងពេលតែមួយ
ឈានចូលដល់ជីវិតរៀននៅមហាវិទ្យាល័យ អ្វីៗចាប់ផ្តើមប្រែប្រួលពីកាលពីនៅវិទ្យាល័យស្ទើរតែទាំងស្រុង ពេលវេលានៃការសិក្សា ជាពេលដែលយើងត្រូវផ្លាស់ប្តូរទម្លាប់នៃការសិក្សាមិនលេងសើចដូចកាលពីមុន ក៏ជាពេលមួយដែលត្រូវគិតបណ្តើរៗពីអាជីពការងារ ស្វែងរកបទពិសោធន៍សម្រាបើជីវិត។
មនុសុ្សមួយចំនួនបានព្យាយាមស្វែងរកការងារនៅពេលដែលគេកំពុងរៀនមហាវិទ្យាល័យ ខណៈដែលអ្នកឯទៀតមិនហ៊ានធ្វើខ្លាចប៉ះពាល់ដល់ការសិក្សា ហើយរង់ចាំដល់ពេលបញ្ចប់បរិញ្ញាបត្រទើបស្វែងរកការងារ។ តើធ្វើយ៉ាងណាទើបអាចឲ្យជីវិតការងារ និងជីវិតសិក្សានៅមហាវិទ្យាល័យអាចធ្វើដំណើរយ៉ាងប្រដងត្រសងជាមូយគ្នាបានយ៉ាងរលូន? តោះ! ទៅមើលវិធីសាស្រ្តទាំង ១០ ខាងក្រោម៖
១) រៀបចំកន្លែង និងបរិយាកាសសម្រាប់រៀន
ធ្វើការងារពេញម៉ោងហត់ណាស់ ចេញពីធ្វើការត្រូវចូលរៀនភ្លាម វិធីតែមួយគត់ដែលអាចធានាផលិតភាពការងារ និងការសិក្សារបស់អ្នកបានល្អគឺរៀបចំការសិក្សានៅផ្ទះ មិនមែនរៀនតែនៅសាលាទេ។ កន្លែងរៀនដែលបានរៀបចំស្អាតជួយឲ្យអ្នកអាចបង្កើតភាពស្រស់ស្រាយដើម្បីសិក្សា ក៏អាចធ្វើឲ្យលទ្ធផលនៃការសិក្សាបានល្អប្រសើរដែរ។
២) ការរៀបចំអាទិភាព
ពេលដែលអ្នកមានផែនការ មានគម្រោងច្រើនអ្នកប្រាកដជាពិបាកសម្រេចឲ្យបានក្នុងពេលតែមួយណាស់។ អ្នកគួរជ្រើសមើលថាក្នុងកាលៈទេសៈនេះផែនការឬគោលដៅមួយណាដែលអ្នកចង់ឲ្យវាសម្រេចមុន។ ពេលអ្នកដាក់ចេញនូវអាទិភាពចំពោះការងារមួយៗជាក់លាស់ វាជួយដល់អ្នកកាត់បន្ថយភាពស្មុគស្មាញក្នុងការអនុវត្ត ក៏ដូចជាដោះស្រាយបញ្ហានានាចំពោះមុខបានយ៉ាងងាយ។
៣) ធ្វើជាម្ចាស់នៃពេលវេលា
ចង់សម្រេចការងារទាន់តែយើងចេះគ្រប់គ្រងពេលវេលា បែងចែកវាឲ្យបានច្បាស់លាស់ និងមានតម្លៃបំផុត។ ពាក្យថាពែលវេលាជាមាសប្រាក់គឺមិនខុសទេ បើអ្នកបណ្តោយពេលវេលាឲ្យកន្លងហួស អ្នកមិនអាចអូសទាញយកពេលវេលាមកវិញបានទេ។ រៀបកាលវិភាគឲ្យបានល្អរវាងការសិក្សា និងពេលវេលាធ្វើការងារជួយឲ្យអ្នកយកឈ្នះការលំបាកបាន។ មិនត្រឹមតែរៀបកាលវិភាគនៃការសិក្សា និងការងារទេ តែអ្នកក៏ត្រូវបែងចែកពេលវេលាក្នុងការលំហែរដើម្បីខ្លួនឯងដែរ។
៤) ប្រើកម្លាំងទំនោរធម្មជាតិរបស់អ្នក
Malson បានលើកឡើងថា “ គ្មាននរណាម្នាក់ដឹងថាខ្លួនឯងខ្លាំងផ្នែកអ្វី ឬខ្សោយផ្នែកអ្វីជាងខ្លួនឯងទេ ហើយក៏គ្មាននរណាអាចមកដឹងពីទម្លាប់ផ្ទាល់ខ្លួនរបស់យើងជាងខ្លួនឯងយើងបានដែរ។” ដូច្នេះត្រូវចេះប្រើប្រាស់ទម្លាប់របស់ខ្លួនឲ្យមានប្រយោជន៍ ក្នុងការបែងចែកការងារឲ្យមានប្រសិទ្ធិភាព។
៥) គិតគូរពីខ្លួនឯង
កុំខំធ្វើការរហូតអត់ងងុយ អត់បានបាយទឹក កុំខំរហូតត្រូវគេងរៀនក្នុងមន្ទីរពេទ្យ ការដែលរៀនផង ធ្វើការងារផង បើមិនចេះថែសុខភាព មិនគិតគូរពីខ្លួនឯងទេគ្មាននរណាមកឈឺជំនួសអ្នកទេ ។ បើហត់នឹងការងារសម្រាកបន្តិចទៅដើម្បីស្រលះខួរក្បាល ការរៀនក៏ដូចគ្នាមិនមែនមិនឲ្យខំរៀនទេ តែត្រូវរៀនឲ្យបានជាប់លាប់ មិនមែនរៀនបែបលេងសើចៗចាំជិតដល់ថ្ងៃប្រលងទើបមកសម្រុករៀន។ ការគេងឲ្យបានគ្រប់គ្រាន់ជារឿងមួយសំខាន់បំផុតសម្រាប់សុខភាព ព្រោះជំងឺនានាងាយនឹងយាយីសុខភាពណាស់ពេលអ្នកទទួលទានដំណេកមិនគ្រប់គ្រាន់។
៦) ទំនាក់ទំនង
មានសមត្ថភាពមានជំនាញធ្វើការទំនាក់ទំនង ជារឿងមួយមិនមែនគ្រប់គ្នាសុទ្ធតែអាចធ្វើបាននោះទេ។ បើអ្នកធ្វើការតែខ្វះទំនាក់ទំនងអ្នកប្រហែលជាយ៉ាប់ហើយណា ពេលខ្លះការងារដែលអ្នកត្រូវធ្វើវាមានការប៉ះពាល់ដល់ការសិក្សា ដូចជាការងារលើសម៉ោង ឬធ្វើឲ្យអ្នកគ្មានពេលគ្រប់គ្រាន់សម្រាប់រៀន។ ដូច្នេះនិយាយប្រាប់អ្នកគ្រប់គ្រងអ្នកទៅ ហើយសុំគាត់ឲ្យជួយសម្រួលដល់បញ្ហាទាំងអស់នេះ។
៧) កុំខ្លាចការសុំជំនួយ
គ្រាន់តែសុំជំនួយពីនរណាម្នាក់វាមិនខុសទេ ក៏មិនមែនជារឿងគួរឲ្យខ្មាស់អៀនអីដែរ បើហត់ខ្លាំង បើធ្វើមិនបាន បើលើសពីសមត្ថភាពយើងសុំឲ្យនរណាម្នាក់ជួយទៅ។ឲ
៨) ជឿជាក់លើសមត្ថភាពអ្នក
ធ្វើអ្វីក៏ដោយចង់ឲ្យទទួលបានលទ្ធផលទាល់តែអ្នកជឿជាក់លើសមត្ថភាពខ្លួនឯង ព្រោះពេលអ្នកធ្វើអ្វីមួយអ្នកនៅជុំវិញខ្លួនតិចណាស់ដែលចាំលើកទឹកចិត្តអ្នក បើមិនផ្តល់កំលាំងចិត្តខ្លួនឯងកុំសង្ឃឹមថាអ្នកជោគជ័យ។
៩) អបអរចំពោះជ័យជំនះតូចមួយដែលអ្នកបានធ្វើ
ពេលអ្នកធ្វើការងារមួយ ១០០ភាគរយដែលរំពឹងលទ្ធផលពិសេសភាពជោគជ័យ ដូចន្នេះបើមានតម្រុយ ឬទទួលបានជោគជ័យហើយអបអរចំពោះខ្លួនឯងទៅ ដើម្បីជាកម្លាំងចិត្តបន្តការងារធំនៅចំពោះមុខផ្សេងទៀត។ វាជាកាតាលីករជំរុញការងារផ្សេងៗទៀតដែលអាចនឹងសំខាន់ជាងការងារមួយនេះឲ្យសម្រេចបានលទ្ធផលល្អដូចគ្នា។
១០) ត្រូវចងចាំគោលដៅរយៈពេលវែងរបស់អ្នក
ទោះធ្វើការងារផង រៀនផងតែគោលដៅធំមួយសម្រាប់រយៈពេលវែងរបស់អ្នកសូមកុំភ្លេចវាណា ពេលខ្លះអ្នកមានគំនិតថាចង់បោះបង់វាចោលម្តងៗដោយសារតែការហត់នឿយពេក តែត្រូវចាំថាថ្ងៃណាមួយអ្នកនឹងបញ្ចប់ការសិក្សាដោយលទ្ធផលល្អ ហើយថ្ងៃណាមួយអ្នកក៏នឹងអាចផ្លាស់ប្តូរការងារទៅរកការងារមួយដែលល្អជាងនេះដែរ។ សំលឹងមើលពីគោលដៅរបស់អ្នក ហើយតាំងចិត្តឲ្យរឹងម៉ាំដើម្បីសម្រេចវាឲ្យបាន។
ដោយ៖ យ៉ាយ៉ា
ប្រភព៖ RASMUSSEN College
