បើមានសញ្ញាបែបនេះ វាបង្ហាញថាប្រាក់ខែអ្នកគឺមិនគ្រាន់សម្រាប់ការចាយវាយឡើយ
វាជាការពិតដែលអ្នកស្រលាញ់ការងារដែលខ្លួនកំពុងតែមានសព្វថ្ងៃ។ ប៉ុន្តែអ្នកក៏គួរតែទទួលបានប្រាក់ខែខ្ពស់ ជាងនេះ ហើយសក្ដិសមនឹងអ្វីដែលអ្នកកំពុងខំប្រឹងផងដែរ។ ហើយពេលខ្លះទៀត តើអ្នកមានដែលគិតទេថាខ្លួនឯងទទួលបានប្រាក់ខែតិចតួចពេក ? ដែលមិនសក្ដិសមនឹងអ្វីដែលខ្លួនខំធ្វើ? តើអ្នកអាចដឹងបានតាមវិធីណា? ខាងក្រោមនេះគឺជាចម្លើយសម្រាប់អ្នក៖
១) អ្នកមិនដែលសងបំណុលទាន់ពេលវេលា៖ តើអ្នកមានដែលគិតទេថាប្រាក់ខែដែលអ្នកខំប្រឹងធ្វើនោះ គឺមិនដែលមានគ្រប់គ្រាន់ដើម្បីយកទៅសងបំណុលគេឡើយ? ហើយវាក៏បង្ហាញដែរថា បើអ្នកមានលុយគ្រប់គ្រាន់ក៏អ្នកមិនទៅខ្ចីលុយគេដែរ។ ប្រសិនបើអ្នក មិនសល់លុយ តែបែរជាសល់ខែវិញនោះ វាគឺជាសញ្ញាដែលបង្ហាញថាអ្នកមានប្រាក់ខែមិនគ្រប់គ្រាន់សម្រាប់ខ្លួនឯងឡើយ។
២) ប័ណ្ណឥណទានជិតអស់សុពលភាព៖ តើ ប័ណ្ណឥណទានរបស់អ្នកពិតជាជិតដល់ថ្ងៃផុតកំណត់មែនឬទេ? ជាការពិតណាស់ ការពឹងផ្អែកទៅលើកម្ចីប្រាក់ឥណទានអាចជួយអ្នកក្នុងរយៈពេលមួយគ្រាមែន ប៉ុន្តែអ្នកអាចធ្លាក់ក្នុងបំណុលកាន់តែជ្រៅទៅជ្រៅទៅដោយមិនដឹងខ្លួន។ ដូចនេះវាក៏ជាសញ្ញា ដែលបញ្ជាក់ថាអ្នកទទួលបានប្រាក់ខែតិចមិនគ្រប់គ្រាន់សម្រាប់ការចាយវាយផ្សេងៗផងដែរ។
៣) តែងតែទទូចខ្ចីប្រាក់អ្នកដទៃ៖ តើអ្នកតែងតែទទូចទៅខ្ចីប្រាក់ពីមិត្តភ័ក្ដិ ឬក៏ក្រុមគ្រួសារអ្នកដែរឬ ទេ? នេះគឺជាសញ្ញាដែលបង្ហាញយ៉ាងច្បាស់ថាអ្នកទទួលបានប្រាក់ចំណូលមួយ ដែលមិនគ្រប់គ្រាន់ហើយ។ ពេលខ្លះដោយសារតែការទទួលបានប្រាក់ខែតិចតួចពេក ក៏អាចឲ្យអ្នកមានបញ្ហាជាមួយអ្នកដទៃផងដែរដោយសារតែរឿងខ្ចីលុយគេនេះឯង។
៤) ចំនួនទឹកលុយដែលអ្នកខំរកគឺគ្មានការកើនឡើង៖ អ្នកនឹងមានការងើយឆ្ងល់ថា មូលហេតុអ្វីបានជាទឹកប្រាក់ដែលអ្នកខំរកមកនោះគ្មានការកើនឡើងសោះដូច្នេះ ។ អ្នកត្រូវរៀបចំបញ្ជីមួយសម្រាប់គិតចំនួនទឹកប្រាក់ដែលអ្នករកបានជារៀងរាល់ខែដើម្បីធ្វើការផ្ទៀងផ្ទាត់។ នោះអ្នកនឹងបានដឹងកាន់តែច្បាស់ថែមទៀតថាអ្នកទទួលបានប្រាក់ខែគ្រប់គ្រាន់ឬនៅ៕
ដោយ៖ ព្រំ សុវណ្ណកណ្ណិកា
