វិធីសាស្ត្រជោគជ័យ៤យ៉ាងដើម្បីសរសេរអត្ថបទកាន់តែមានភាពឆ្នៃប្រឌិត និងទាក់ទាញ
ការសរសេរអត្ថបទទាមទារមានគំនិតច្នៃប្រឌិត អត្ថបទដែលពាក់ព័ន្ធនឹងរឿងប្រចាំថ្ងៃ រឿងដែលគេឯងកំពុងចាប់អារម្មណ៍ ការប្រើប្រាស់ពាក្យពេចន៍គួរឲ្យចង់អាន និងការរៀបចំអត្ថបទឲ្យមានរបៀបរបបងាយយល់ជាដើម។ អ្នកដឹងហើយថាការសរសេរឲ្យទាក់ទាញ គឺពិបាកខ្លាំងណាស់ជាពិសេសសម្រាប់អ្នកមិនសូវសរសេរ។ ដូចនេះ ខាងក្រោមនេះជាវិធីសាស្ត្រខ្លះៗ ដែលអាចជួយឲ្យអ្នកសរសេរអត្ថបទកាន់តែល្អ៖
១) សរសេរពាក្យធម្មតាៗតែសង្កត់ន័យ៖ ចូរកុំធ្វើឲ្យអត្ថបទអ្នកមើលទៅហាក់ដូចជាមានភាពស្មុគស្មាញពេកអី។ អ្នកគួរតែសរសេរដោយប្រើប្រាស់ពាក្យពេចន៍ធម្មតា ដែលអ្នកដទៃមើលហើយងាយយល់និងអាចចងចាំបានជារៀងរហូត។ ពេលខ្លះការសរសេរវែងពេក គឺមិនត្រឹមតែឲ្យអ្នកអានឆាប់វង្វេងប៉ុណ្ណោះទេ តែថែមទាំងខាតទាំងពេលវេលា និងការគិតរបស់អ្នកអានថែមទៀតផង។
២) សរសេរដោយគិតពីគំនិតអ្នកដទៃ៖ មុននឹងអ្នកចាប់ផ្ដើមការសរសេរអត្ថបទ អ្វីមួយ អ្នកត្រូវគិតពីគំនិតអ្នកដទៃជាមុនសិន ថាតើពួកគេមានចំណាប់អារម្មណ៍ចំពោះអ្វីខ្លះ? ពេលអ្នកសរសេរដោយតាមតែចិត្តអ្នកចង់នឹកឃើញនោះ អ្នកផ្សេងទៀតនឹងគិតថាអ្នកសរសេរមកសម្រាប់តម្រូវតែខ្លួនឯងប៉ុណ្ណោះ។
៣) ត្រូវផ្ដោតអារម្មណ៍ទៅលើប្រធានរបស់អ្នក៖ អ្នកត្រូវស្វែងរកគំនិតណាដែលវាសក្ដិសមហើយស៊ីគ្នាទៅនឹងប្រធានបទរបស់អ្នក។ ការសរសេរដោយគ្មានគោលបំណងច្បាស់លាស់នោះ នឹងនាំឲ្យអ្នកអានវង្វេង ហើយមិនអាចទទួលយកគំនិតអ្វីសោះពីអត្ថបទនោះ។
៤) ត្រូវបង្ហាញពីអ្វីមួយឲ្យច្បាស់លាស់៖ កុំចំណាយពេលក្នុងការសម្រាយអត្ថបទរបស់អ្នកព្រោះ ការសរសេរន័យវែងឆ្ងាយពេក គឺអាចទៅជាចាកប្រធានក៏ថាបាន។ ប្រសិនបើមានគំនិតខ្លះដែលអ្នកគិតថាវាមិនចាំបាច់ដាក់ទេនោះ អ្នកមិនគួរបញ្ចូលទៅក្នុងអត្ថបទឡើយ៕
ប្រែសម្រួល៖ ព្រំ សុវណ្ណកណ្ណិកា
