មុននឹងបើកអាជីវកម្ម អ្នកគួរមានរនាំងការពារសុវត្ថិភាព៩ នេះជាមុនសិន
និយាយពីរឿងធ្វើជំនួញ មានដើមទុនគ្រប់គ្រាន់ដើម្បីចេញរកស៊ីក៏មិនប្រាកដថា ជោគជ័យដែរ។ ចំណែកអ្នកដែលមានគំនិតរកស៊ី ខ្វះដើមទុនក៏មិនប្រាកដថា បរាជ័យដែរ។ តាមពិតទៅនៅក្នុងជីវិតអ្នករកស៊ីគឺជួបឧបសគ្គច្រើនណាស់ ហើយការអង្គុយស្រមៃដេកគិតវាមិនមែនជាចម្លើយពិតប្រាកដនោះដែរ។ មានតែអ្នកចេញរកស៊ីប៉ុណ្ណោះទើបយល់អារម្មណ៍ថារសជាតិអ្នកជំនួញវាយ៉ាងម៉េច។
ឥឡូវនេះ ឧបមាថា អ្នកចង់បើកជំនួញមួយទៅចោះ! តើអ្នកបានត្រៀមខ្លួនអ្វីខ្លះហើយឬនៅ? ខាងក្រោមនេះគឺជាចំណុចចាំបាច់មួយចំនួនដែលអ្នកត្រូវរៀបចំឲ្យបានរួចស្រេចជាមុន ដើម្បីធ្វើយ៉ាងណាឲ្យជំនួញរបស់អ្នកចាប់ផ្តើមទៅនៅក្នុងអត្រាបរាជ័យមួយទាបបំផុត។
១. រកការងារក្រៅម៉ោង
នៅពេលអ្នកចាប់ផ្តើមបើកជំនួញដំបូង អ្នកគួរឆ្លៀតរកការងារក្រៅម៉ោងមកធ្វើបន្ថែមទៀត។ នេះជារឿងល្អដើម្បីឲ្យអ្នករកលុយមកផ្គត់ផ្គង់ការចំណាយផ្សេងៗក្នុងអាជីវកម្មរបស់អ្នក ពីព្រោះនៅពេលដើមទីមុខជំនួញរបស់អ្នកអាចចំណាយច្រើនជាងចំណូល ពោលគឺមិនទាន់រកប្រាក់ចំណេញបាននៅឡើយទេ។ មានការងារក្រៅម៉ោងមួយដែលទាក់ទងទៅនឹងជំនួញដែលអ្នកកំពុងធ្វើគឺជារឿងល្អបំផុត។
២. ធ្វើការឲ្យគេសន្សំចំណេះដឹងមុនចេញរកស៊ីដើម្បីយកបទពិសោធន៍
ការចេញរកស៊ីដោយខ្លួនឯងគឺជារឿងល្អមួយ។ ប៉ុន្តែនៅមានគុណតម្លៃជាច្រើនទៀតដែលអ្នកនឹងទទួលបានមុនពេលចាប់ផ្តើមមុខជំនួញរបស់អ្នក។ នោះគឺការធ្វើការឲ្យគេជាមួយនឹងការងារណាដែលទាក់ទងទៅនឹងជំនួញរបស់អ្នកដើម្បីយកបទពិសោធន៍។ អ្នកត្រូវមានផ្នត់គំនិតនេះហើយសន្សំចំណេះដឹងមុននឹងចេញរកស៊ី។
៣. មានភាពវៃឆ្លាតក្នុងការជ្រើសរើសដៃគូជីវិត
ប្រសិនបើអ្នកមានមហិច្ឆតាចង់ក្លាយជាសហគ្រិន អ្នកត្រូវតែគាំទ្រដល់ដៃគូជីវិតរបស់អ្នកដើម្បីធ្វើឲ្យក្តីសុបិននេះក្លាយជាការពិត។ ការមានដៃគូជីវិតដែលមានការយល់ចិត្តយល់ថ្លើម ស្គាល់ពីសុខទុក្ខ ចេះឲ្យតម្លៃ និងជួយលើកទឹកចិត្តគ្នាទៅវិញទៅមក គឺជាគុណតម្លៃយ៉ាងវិសេសវិសាលក្នុងការនាំមកនូវភាពជោគជ័យ ក្នុងជីវិត និងមុខជំនួញ។
៤. ស្វែងរកដៃគូជំនួញ
នេះជារឿងដែលមិនអាចរំលងបាន។ អ្នកគួរស្វែងរកអ្នកណាដែលអ្នកយល់ថា ធ្វើឲ្យអ្នកទុកចិត្តបានដើម្បីចាប់ដៃរកស៊ីជាមួយគ្នាសម្រាប់អនាគតយូរអង្វែងមួយ។ ដៃគូជំនួញរបស់អ្នកមិនចាំបាច់អ្នកឆ្លាតបំផុតនោះ ឬអ្នកមានលុយរាប់ម៉ឺនដុល្លារនោះទេ។ សូមចាំថា ដំណាក់កាលដំបូងនៃការចេញរកស៊ី អ្នកត្រូវផ្សំចាប់ដៃគូដើម្បីរួមគំនិតគ្នា ចូលដើមទុនរួមគ្នា និងអាចធ្វើសហប្រតិបត្តិការការងាររួមគ្នាបានគ្រប់ស្ថានភាពទាំងអស់។
៥. ការទទួលបានភាពស្របច្បាប់ក្នុងការធ្វើជំនួញ
នៅពេលអ្នកចេញរកស៊ី អ្នកមិនត្រូវមើលរំលងនៃការចុះបញ្ជីក្រុមហ៊ុននៅស្ថាប័នក្រសួងសាមីរបស់រដ្ឋនោះឡើយ។ នេះជាចំណុចសំខាន់ដើម្បីទទួលស្គាល់ពីស្ថាប័នរដ្ឋថា ក្រុមហ៊ុនរបស់អ្នកមានអាជ្ញាប័ណ្ណត្រឹមត្រូវ និងមានស្តង់ដារដែលជាផ្នែកមួយសំខាន់ធ្វើឲ្យអ្នកអាចហក់ចូលទីផ្សារប្រកួតប្រជែងដោយមិនមានភ័យខ្លាច និងបានកាន់តែទូលំទូលាយនៅពេលអនាគត។
៦. បើខ្វះទុនរកមើលអ្នកដែលអាចខ្ចីទុនបាន
នៅពេលចេញរកស៊ីដំបូង អ្នកអាចខ្វះ ដើមទុនរកស៊ី ឬក៏សម្រាប់ត្រៀមទប់ទល់នៅពេលការខាតបង់ណាមួយកើតមានឡើង។ ជាយោបល់ល្អ អ្នកគួរខ្ចីអ្នកណាម្នាក់ក្នុងសមាជិកគ្រួសាររបស់អ្នក មិត្តភក្ដិ ឬអ្នកផ្សេងទៀតដែលអ្នកយល់ថា អាចពឹងពាក់បាន។
៧. យុទ្ធសាស្ត្រកៀងគរប្រមូលដើមទុន (Crowdfunding)
នៅពេលអ្នកមានគំនិត ឬគម្រោងអាជីវកម្មដ៏ល្អមួយ ហើយយល់ថា អ្នកត្រូវការជំនួញហិរញ្ញវត្ថុដើម្បីបើកដំណើរការ យុទ្ធសាស្ត្រកៀងគរប្រមូលដើមទុនគឺជាមធ្យោបាយដ៏ល្អមួយទៀត។ តាមរយៈមធ្យោបាយនេះ អ្នកអាចបញ្ចុះបញ្ចូលអ្នកវិនិយោគ ឬបុគ្គលផ្សេងៗទៀតដែលមានទុនច្រើនមកចាប់អារម្មណ៍ដាក់ទុនជាមួយអ្នកបាន។
៨. សន្សំ
នៅពេលអ្នកចង់ចេញរកស៊ី អ្នកត្រូវមានផ្នត់គំនិតមួយគឺការសន្សំសំចៃឲ្យបានខ្ពស់បំផុតតាមដែលអាចធ្វើបាន។ នៅពេលដំបូងៗ ការចំណាយមានច្រើនជាងចំណូល ដូច្នេះអ្នកត្រូវប្រាកដថា ការចំណាយទាំងនោះមិនខ្ជះខ្ជាយ ចាយខុសខ្ទង់នោះឡើយ។ នៅពេលអ្នករកចំណូលបានពី ជំនួញរបស់អ្នកហើយ អ្នកគួរសន្សំប្រាក់ចំណេញបន្តទៅទៀត ដើម្បីហក់លោតពង្រីកអាជីវកម្មរបស់អ្នក ឬ យកលុយទៅវិនិយោគលើជំនួញផ្សេងទៀតដែលអ្នកយល់ថា មានឱកាសទទួលបានប្រាក់ចំណេញ។
៩. សាកល្បងធ្វើតេស្ដជំនួញរបស់អ្នក
ដើម្បីធ្វើតេស្ដចង់ដឹងថា ជំនួញរបស់អ្នកអាចនឹងមានការគាំទ្រឬអត់នៅពេលខាងមុខ អ្នកអាចសាកល្បងចំណាយលុយមួយចំនួនដើម្បីផ្សព្វផ្សាយនៅតាមបណ្តេញផ្សព្វផ្សាយ និងបណ្ដាញសង្គមដូចជា Facebook ជាដើម។ បន្ទាប់មកអ្នកត្រូវវិភាគលើទិន្នន័យដែលអ្នកទទួលបាន ដើម្បីវាយតម្លៃថា អាជីវកម្មរបស់អ្នកទទួលបានគាំទ្រក្នុងកម្រិតណា? មធ្យោបាយនេះប្រៀបដូច ជាការស្រាវជ្រាវទីផ្សារមួយផងដែរសម្រាប់ប្រមើលមើលពី សក្ដានុពលក្នុងវិស័យជំនួញរបស់អ្នក៕
ប្រភព៖ Entrepreneur
