សាកលវិទ្យាល័យ Harvard រកឃើញថា ការជួលបុគ្គលិករោះរាយមកធ្វើការប្រសើរជាងជួលបុគ្គលិកមានសមត្ថភាពខ្ពស់
នៅពេលអ្នកត្រូវការជ្រើសរើសបុគ្គលិកមកធ្វើការ តើអ្នកត្រូវការបុគ្គលិកបែបណាមកធ្វើការ? បុគ្គលិកមានសមត្ថភាពខ្លាំងពូកែផុតលេខ? បុគ្គលិករោះរាយ?
ទោះបីជាអ្នកសម្រេចចិត្តជួលបុគ្គលិកប្រភេទណាក៏ដោយ វាគឺជាការសម្រេចចិត្តរបស់អ្នក។ ការជួលបុគ្គលិកឆ្នើមមានប្រវត្តិការងារល្អ មានសមត្ថភាពខ្លាំង ជាការពិតគឺផ្តល់គុណសម្បត្តិមកឲ្យអ្នក។ ក៏ប៉ុន្តែការជួលបុគ្គលិករោះរាយមកធ្វើការ គឺផ្តល់គុណសម្បត្តិច្រើនជាងនេះទៅទៀត នេះបើយោងតាមការស្រាវជ្រាវរបស់សាកលវិទ្យាល័យ Harvard។
វាជាការពិតហើយដែលត្រូវទទួលស្គាល់ថា បុគ្គលិកដែលមានសមត្ថភាពខ្លាំងពូកែ ធ្វើឲ្យក្រុមហ៊ុនរបស់អ្នកចំណេញ។ បុគ្គលិកប្រភេទនេះអាចសម្រេចការងារតាមផែនការប្រកបដោយគុណភាពខ្ពស់លឿនជាងបុគ្គលិកធម្មតាដល់ទៅ ៤ដង ពីព្រោះពួកគេបានផ្ដោតខ្លាំងលើការងារ ហើយអាចរួមចំណែកដល់ទៅ ៨០% នៃប្រាក់ចំណូលរបស់ក្រុមហ៊ុន។
ប៉ុន្តែបរិយាកាសការងារនៅក្នុងក្រុមហ៊ុននឹងមានភាពអាប់អួរ ប្រសិនបើបុគ្គលិកមានសមត្ថភាពរូបនេះ មានអត្តចរិតមិនល្អ។ នេះរួមមានបុគ្គលិកដែលហ៊ានបំពានគោលការណ៍ផ្ទៃក្នុងរបស់ក្រុមហ៊ុន ការបៀតបៀនផ្លូវភេទ ភាពអំនួត ការមិនឲ្យតម្លៃបុគ្គលិកដូចគ្នា ភាពកោងកាច និងការក្លែងបន្លំជាដើម។ គុណវិបត្តិរបស់បុគ្គលិកប្រភេទនេះ មិនត្រឹមតែប៉ះពាល់ដល់មុខមាត់របស់ខ្លួនប៉ុណ្ណោះទេ ប៉ុន្តែថែមទាំងប៉ះពាល់ដល់មុខមាត់ក្រុមហ៊ុន និងអាចបណ្តាលឲ្យក្រុមហ៊ុនក្រឡាប់ចាក់ផងដែរ។
ការសិក្សាខាងលើបានស្រាវជ្រាវលើក្រុមហ៊ុនធំៗចំនួន ១១ ដែលមានបុគ្គលិកសរុប ៥៨ ៥៤២ នាក់ ហើយលទ្ធផលបានរកឃើញថា ១ នៅក្នុងចំណោមបុគ្គលិក ២០នាក់ត្រូវបានបណ្តេញចេញពីការងារដោយសារតែតែមានអត្តចរិតមិនមានភាពថ្លៃថ្នូរ។ បន្ថែមពីគុណវិបត្តិដែលបុគ្គលិកប្រភេទនេះមាន វាថែមទាំងធ្វើឲ្យប៉ះពាល់ដល់ឥរិយាបថបុគ្គលិកផ្សេងៗទៀតនៅក្នុងក្រុមហ៊ុន ហើយវាអាចបណ្តាលឲ្យបរិយាកាសការងារប្រព្រឹត្តិទៅមិនរលូន ធ្វើឲ្យគុណភាពការងារក្នុងក្រុមហ៊ុនទាំងមូលធ្លាក់ចុះ។
ការស្រាវជ្រាវនេះបានបង្ហាញថា សម្រាប់បុគ្គលិកធម្មតាដែលមិនមានសមត្ថភាពអាចបណ្តាលឲ្យក្រុមហ៊ុនខាតបង់ប្រាក់ ៥ ៣០០ ដុល្លារ ខណៈដែលបុគ្គលិកមានសមត្ថភាពខ្ពស់ ប៉ុន្តែខ្វះសីលធម៌ និងខ្វះភាពថ្លៃថ្នូរអាចធ្វើឲ្យក្រុមហ៊ុនខាតបង់ចាប់ពី ១២ ៥០០ ដុល្លារឡើងទៅ។
ជាទូទៅ បុគ្គលិកខ្លាំងពូកែពោរពេញដោយទំនុកចិត្តខ្ពស់ អំនួត មានភាពបត់បែន និងលទ្ធផលការងារលើសពី ដែនកំណត់។ ប៉ុន្តែអត្តចរិតបែបនេះក៏មានឥទ្ធិពលដល់បុគ្គលិកជុំវិញដែលធ្វើការក្រោមបង្គាប់របស់បុគ្គលិកប្រភេទនេះផងដែរ។ ហេតុដូច្នេះហើយ ពួកគេអាចនាំលទ្ធផលល្អក្នុងរយៈពេលខ្លី ក៏ប៉ុន្តែអាចក្រុមហ៊ុនធ្លាក់ចុះនៅក្នុងរយៈពេលវែងហើយវាកាន់តែគ្រោះថ្នាក់ទៀតប្រសិនបើបុគ្គលិកកំពូលរូបនេះមិនសូវមានវប្បធម៌ការងារចេះសហការជាមួយក្រុមការងារ។
ចំណុចដែលគួរឲ្យពិចារណានោះគឺថា រាល់បុគ្គលិកកំពូលដែលអាចធ្វើការលឿនជាងពេលកំណត់ សុទ្ធតែទទួលបានលទ្ធផលការងារប្រកបដោយគុណភាពនោះឡើយ។ តាមពិតទៅ ថ្វីត្បិតតែបុគ្គលិកដែលរោះរាយ និងពេញចិត្តក្នុងការជួយអ្នកដទៃមិនអាចបញ្ចប់ការងារបានយ៉ាងរហ័សដូចបុគ្គលិកកំពូលក៏ដោយ ប៉ុន្តែពួកគេក៏អាចជៀសវាងបានបុគ្គលិកលក្ខណៈមួយដែលនាំឲ្យប៉ះពាល់ដល់ផលប្រយោជន៍របស់ក្រុមហ៊ុនដែរ។ ពួកគេក៏រួមចំណែកឲ្យក្រុមហ៊ុនរីកចម្រើន បើទោះបីជាតិច ឬច្រើនក៏ដោយ និងមិនធ្វើឲ្យក្រុមហ៊ុនជួបរឿងឈឺក្បាលនោះដែរ។
ការស្រាវជ្រាវនេះបានណែនាំថា កុំផ្តោតលើការជួលបុគ្គលិកកំពូលមានសមត្ថភាពខ្ពស់មកធ្វើការពេក។ យកល្អអ្នកត្រូវផ្តោតឲ្យខ្លាំង ជ្រើសរើសបុគ្គលិកដែលមានអត្តចរិតល្អ រោះរាយ និងមានឆន្ទខ្ពស់មកធ្វើការទើបប្រសើរជាង៕
ប្រភព៖ businessinsider
