មើលមនុស្សឆ្លាតតាមអត្តចរិតទាំង ៨យ៉ាងនេះ
អ្នកមានធ្លាប់អង្កេតទេថា មនុស្សឆ្លាតជាងអ្នកបង្ហាញអត្តចរិតបែបណា? អ្នកអាចយល់ថា អ្នកនោះជាមនុស្សឆ្លាតតាមរយៈទឹកលុយរបស់គេ។ អ្នកនេះជាមនុស្សឆ្លាតតាមរយៈសមត្ថភាព និងលទ្ធផលការងាររបស់គេល្អជាងអ្នកជាដើម។ ប៉ុន្តែនេះគ្រាន់តែជាការយល់ឃើញជ្រុងមួយរបស់អ្នកប៉ុណ្ណោះ។ តាមពិតទៅ មនុស្សឆ្លាតមានចំណុចពិសេសសំខាន់ៗដូចខាងក្រោមនេះ៖
១.មានភាពឆ្លាតវៃក្នុងការសម្រេចចិត្ត
មនុស្សឆ្លាតដឹងថា មានផលវិបាកកើតមានឡើងចេញពីសកម្មភាពរបស់ខ្លួន។ ទន្ទឹមនឹងនេះពួកគេក៏ដឹងផងដែរថា ខ្លួនត្រូវទទួលបានលទ្ធផលមួយពីការសម្រេចចិត្តមួយ ហើយការសម្រេចចិត្តដ៏ត្រឹមត្រូវមួយគឺត្រូវការ ការវិន័យផ្ទាល់ខ្លួន និងការផ្ដោតយកចិត្តទុកដាក់។
២.មនុស្សឆ្លាតមិនចូលចិត្តអួតទេ
នេះជាគុណសម្បត្តិពិសេសមួយទៀតរបស់មនុស្សឆ្លាត។ មនុស្សប្រភេទនេះ មិនចូលចិត្តអួតអ្នកដទៃ និងលាក់សមត្ថភាពរបស់ខ្លួន។ នៅក្នុងចំណោមមនុស្សម្នាក់ មនុស្សឆ្លាតពិតប្រាកដមានទំនោរទៅរកការស្តាប់ច្រើនជាងនិយាយ បើទោះបីជាខ្លួនដឹងច្រើនរួចហើយក៏ដោយ។
៣.មនុស្សឆ្លាតរៀនពីកំហុសរបស់ខ្លួន
តាំងពីតូចរហូតដល់ធំដឹងក្តី និងស្លាប់ទៅវិញ អ្នកណាក៏មានកំហុសដែរ។ ក៏ប៉ុន្តែ ការកែប្រែកំហុសជារឿងសំខាន់ណាស់ដើម្បីធ្វើឲ្យជីវិតមានភាពល្អប្រសើរជាងមុន។ នេះហើយជាអ្វីដែលមនុស្សឆ្លាតបានធ្វើនៅក្នុងជីវិតរបស់ពួកគេ។ ពួកគេយល់ថា កំហុសមិនមែនសុទ្ធតែមិនល្អនោះទេ។ កំហុសធ្វើឲ្យពួកគេមានបទពិសោធន៍ ធ្វើឲ្យពួកគេចេះរឹងមាំ ចេះកែប្រែដើម្បីជោគជ័យឈានទៅជំហានល្អមួយនៅពេលបន្ទាប់។
៤.មនុស្សឆ្លាតចូលចិត្តរាប់អានមនុស្សឆ្លាត
មនុស្សម្នាក់ៗមិនអាចរស់នៅដោយឯកោបានទេ។ មនុស្សត្រូវការក្រុមគ្រួសារ សាច់ញាតិ ឬមិត្តភក្ដិសម្រាប់ប្រាស្រ័យទំនាក់ទំនងនៅ ក្នុងជីវភាពប្រចាំថ្ងៃ។ យ៉ាងណាមិញ សម្រាប់មនុស្សឆ្លាត ការរាប់អានមនុស្សមិនមែនចេះតែធ្វើឡើងតាមចិត្តចង់ទេ។ ពួកគេសម្លឹងមើលអ្នកឆ្លាតដូចគ្នា ព្រោះថាអ្នកឆ្លាតនេះហើយដែលធ្វើឲ្យពួកគេកាន់តែឆ្លាត និងកាន់តែជោគជ័យ។
៥.មនុស្សឆ្លាតមានចំណេះដឹងទូលំទូលាយ
ខុសពីមនុស្សទូទៅ មនុស្សឆ្លាតគិតបែបស៊ីជម្រៅ និងមានចំណេះដឹងទូលំទូលាយ។ មនុស្សឆ្លាតមានមានភាពប៉ិនប្រសព្វ សំបូរគំនិតផ្ដួចផ្ដើម មើលបានវែងឆ្ងាយ ចេះបត់បែន ព្រមទាំងអភិវឌ្ឍខ្លួនប្រកបដោយភាពច្នៃប្រឌិតដើម្បីឲ្យមនុស្សជុំវិញខ្លួនទទួលបាននូវការចែករំលែកលទ្ធផលជោគជ័យរួមគ្នាមួយ។
៦.មនុស្សឆ្លាតមានហេតុផលច្បាស់លាស់
រាល់សកម្មភាពទាំងអស់របស់ខ្លួន មនុស្សឆ្លាតត្រូវប្រាកដថា ខ្លួនធ្វើវាដើម្បីអ្វី? ហេតុអ្វីបានជាត្រូវធ្វើវា? នេះជាសំនួរសំខាន់របស់មនុស្សឆ្លាតដែលត្រូវសួរខ្លួនឯងដើម្បីធានាថា ខ្លួនបានប្រើប្រាស់ពេលវេលា និងថាមពលចំទិសដៅ និងមានប្រយោជន៍។ ទន្ទឹមនឹងនេះ មនុស្សឆ្លាតមិនត្រចៀកសឆាប់ជឿសម្តីរបស់អ្នកដទៃនោះឡើយ។ មុនទទួលយកមតិយោបល់អ្នកណាម្នាក់ ពួកគេត្រូវការហេតុផល ភស្តុតាង និងអំណះអំណាងច្បាស់លាស់ជាមុនសិន។
៧.មនុស្សឆ្លាតមិនធ្វើខ្លួនហួសពីសមត្ថភាពរបស់ខ្លួនទេ
មនុស្សល្ងង់ចូលចិត្តអួតសម្ញែងហ៊ឺហាដាក់អ្នកដទៃជាពិសេសសម្ភារៈនិយមតែម្តងដើម្បីឲ្យគេមើលមកថា ស្អាតឡូយឆាយ ដែលទាំងការពិតវាគ្រាន់តែជារបស់បន្លំភ្នែក ឬសំបកក្រៅតែប៉ុណ្ណោះ។ សម្រាប់មនុស្សឆ្លាតវិញ ពួកគេមិនចូលចិត្តធ្វើអ្វីដែលលើសពីសមត្ថភាពរបស់ខ្លួននោះឡើយ។ ពេលខ្លះបើខ្លួនធ្វើបាន ១០ ប្រាប់គេត្រឹមតែ ៧ តែប៉ុណ្ណោះ។
៨.មនុស្សឆ្លាតយល់ថា សត្រូវធំបំផុតរបស់ខ្លួនគឺខ្លួនឯង
សម្រាប់មនុស្សទូទៅ បើទោះបីជាល្អយ៉ាងណាក៏ដោយ ក៏មានអ្នកស្អប់ អ្នកច្រណែន មិនពេញចិត្តខ្លួនដែរ។ ប៉ុន្តែអ្នកឆ្លាតបានយល់ថា នេះវាគ្រាន់តែជារឿងធម្មតាតែប៉ុណ្ណោះ។ អ្វីដែលសំខាន់សម្រាប់អ្នកឆ្លាតដែលត្រូវជំនះនោះគឺខ្លួនឯង។ ពួកគេរកវិធីថា តើត្រូវអប់រំ ខ្លួនឯងដោយរបៀបណា? ត្រូវកែប្រែចំណុចខ្សោយ ឬចំណុចអវិជ្ជមានរបស់ខ្លួនដោយរបៀបណា?
ប្រភព៖ Businessinsider
