បុគ្គលិក ៧ ប្រភេទនេះ គ្មានថ្ងៃជោគជ័យនៅកន្លែងការងារឡើយ
គ្មានបុគ្គលិកណាម្នាក់ដែលមានសមត្ថភាព និងអត្តចរិតល្អឥតខ្ចោះនោះឡើយ។ ភាពចន្លោះខ្វះខាតរបស់ពួកគេម្នាក់ៗត្រូវជំនួសដោយការខិតខំ ប្រឹងប្រែងធ្វើការ ទទួលយកការរិះគន់កែលម្អ ព្យាយាមសិក្សារៀនសូត្រ និងការប្ដេជ្ញាចិត្តមួយដែលធ្វើឲ្យកាន់តែល្អប្រសើរជាងមុន។ សម្រាប់អ្នកវិញ តើចំណុចខ្វះខាតរបស់អ្នកគឺជាអ្វី?
ខាងក្រោមនេះ អ្នកនឹងបានដឹងពីអត្តចរិតមួយចំនួនដែលជាបញ្ហាដ៏ធំប៉ះពាល់ដល់អាជីពការងាររបស់អ្នកនៅពេលអនាគត៖
១. បុគ្គលិកចូលចិត្តនិយាយដើមគេ
បុគ្គលិកចូលចិត្តនិយាយដើមគេ ជាទូទៅចូលចិត្តតាមដានព័ត៌មាន ឬរឿងរ៉ាវមិនល្អផ្សេងៗរបស់អ្នករួមការងារ និងក្រុមហ៊ុន ហើយបន្ទាប់មកយករឿងរ៉ាវទាំងនោះទៅប្រាប់អ្នកផ្សេងបន្តទៀត។ បុគ្គលិកប្រភេទ នេះបានចំណាយពេលជាច្រើនលើរឿងឥតប្រយោជន៍ទាំងនេះ ជាជាងយកពេលវេលាយកចិត្តទុកដាក់លើការងាររបស់ខ្លួនដែលជាហេតុធ្វើឲ្យបាត់បង់ទំនុកចិត្តពីអ្នករួមការងារ និងគ្មានឱកាសអភិវឌ្ឍខ្លួនទៅកាន់តំណែងល្អ ព្រមទាំងដើរទៅមុខមិនឆ្ងាយនោះឡើយ។
២. បុគ្គលិកដែលចាំតែយល់ស្របគំនិតអ្នកដទៃ
}បុគ្គលិកប្រភេទនេះ ជាមនុស្សដែលតែងតែនិយាយថា “យេស” គ្រប់ពេល។ សូម្បីតែកិច្ចការថ្មីៗដែលត្រូវធ្វើ គំនិតផ្ដួចផ្ដើមដែលមិនត្រឹមត្រូវ ក៏ខ្លួនមិនឆ្លើយបដិសេធន៍ដែរ។ នៅ ពេលដែលខ្លួនចូលចិត្តអ្នកណាហើយ ខ្លួននឹងគាំទ្រ យល់ស្របគ្រប់ពេល គ្មានជំហរផ្សេងគួរឲ្យចាប់អារម្មណ៍នោះឡើយ។ បុគ្គលិកប្រភេទនេះបាត់បង់ភាពជឿជាក់លើខ្លួនឯង ឆាប់ជឿគេ គ្មានគំនិតច្នៃប្រឌិត ពោលគឺអ្វីៗគឺចាំតែយល់ស្របតាមអ្នកដទៃ។
៣. បុគ្គលិកដែលចូលចិត្តប្រឆាំងគំនិតអ្នករួមការងារ
ខុសពីបុគ្គលិកដែលចាំតែយល់ស្របគំនិតរបស់អ្នករួមការងារ បុគ្គលិកដែលចូលចិត្តប្រឆាំងគំនិតអ្នករួមការងារវិញ ពិបាកអភិវឌ្ឍសមត្ថភាពរបស់ខ្លួនឲ្យជឿនលឿនទៅ មុខណាស់។ មិនចំពោះថា អ្នករួមការងារមានគំនិតល្អយ៉ាងណាក៏ដោយ ខ្លួនគិតតែប្រឆាំងនេះប្រឆាំងនោះ មិនយល់ស្រប និងមិនឲ្យតម្លៃលើគំនិត ឬការខិតខំរបស់អ្នករួមការងារនោះឡើយ។ បុគ្គលិកប្រភេទនេះ មិនទុកចិត្តក្រុមការងារ ហើយចូលចិត្តធ្វើការងារមួយដែលចង់ត្រួតត្រាគេគ្រប់ច្រកល្ហកតែម្តង។
៤. បុគ្គលិកដែលដើរតួជាអ្នករងគ្រោះ
បុគ្គលិកប្រភេទនេះយល់ឃើញថា បើទោះជាបញ្ហាកើតឡើងមកលើខ្លួននោះតូចក្តី ឬធំក្តី ជាទំនួលខុសត្រូវរបស់ខ្លួនក្តីក៏នៅតែយល់ឃើញថា វាមិនមែនជាកំហុសរបស់ខ្លួន។ បុគ្គលិកប្រភេទនេះមានការលំបាកនៅក្នុងការបំពេញការងារឲ្យទាន់ពេលវេលា និងមានអត្តចរិតមួយគឺទម្លាក់កំហុសទៅលើមិត្តរួមការងារតែម្តង។ មិនតែប៉ុណ្ណោះ ខ្លួនយល់ទៀតថា ការងារទាំងនោះគឺជាបន្ទុករបស់អ្នកផ្សេងទៀត។ ខ្លួនមិនគួរត្រូវបានស្តីបន្ទោស ហើយអ្នកផ្សេងមិនគួរយកខ្លួនទៅប្រឡូកប្រឡាក់ទៅនឹងលទ្ធផលមិនល្អនៃការងារណាមួយនោះឡើយ។
៥. បុគ្គលិកដែលតាំងខ្លួនជាមនុស្សឆ្លាតបំផុតក្នុងក្រុមហ៊ុន
វាជារឿងធម្មតាទេសម្រាប់បុគ្គលិកប្រភេទនេះ ព្រោះខ្លួនបានតាំងខ្លួនឯងថា ជាបុគ្គលិកដឹងគ្រប់យ៉ាង ពូកែគ្រប់រឿង និងមានសមត្ថភាពខ្លាំងពូកែគ្មានអ្នកណាដូចនៅក្នុងក្រុមហ៊ុននោះ។ អ្នកអាចអង្កេតបានថា បុគ្គលិកប្រភេទនេះនឹងដាក់បន្ទុកលើក្រុមការងារទាំងមូលថា មិនបានធ្វើតាមគម្រោងផែនការរបស់ខ្លួន ប្រសិនបើគម្រោងការងារមិនជោគជ័យ។ ប៉ុន្តែប្រសិនបើការងារនោះជោគជ័យវិញនោះ មានន័យថា ដោយសារតែការខិតខំប្រឹងប្រែង និងភាពវៃឆ្លាតរបស់ខ្លួន។ បុគ្គលិកប្រភេទនេះ មានអំនួតខ្លាំង ពូកែយកចិត្តចៅហ្វាយនាយ ចេញមុខពេលសមិទ្ធផលការងារល្អ ប៉ុន្តែលាក់មុខពេលការងារបរាជ័យ។
៦. បុគ្គលិកដែលឆាប់ឆេវឆាវ
ហេតុអ្វីបានជាបុគ្គលិកប្រភេទនឹងមិនជោគជ័យ? ពីព្រោះតែអារម្មណ៍ឆាប់ខឹង ឆាប់ឆេវឆាវរបស់ខ្លួនហ្នឹងឯង។ បុគ្គលិកប្រភេទនេះពេលខ្លះចាស់តែអាយុទេ ប៉ុន្តែមិនចេះគ្រប់គ្រងអារម្មណ៍ខ្លួនឯងឲ្យបានល្អ ហើយថែមទាំងគ្មានភាពអត់ធ្មត់ទៀតផង។ មិនថានៅក្នុងចំណោមមនុស្សម្នា ឬនៅម្នាក់ឯង បុគ្គលិកប្រភេទនេះបង្ហាញ អារម្មណ៍ខឹងសំបារ ជាពិសេសនៅពេលដែលការងារមិនទទួលបានលទ្ធផលដូចការគ្រោងទុករបស់ខ្លួន។ នេះជះឥទ្ធិពលខ្លាំងក្លាដល់ប្រសិទ្ធភាពនៃការទំនាក់ទំនងជាមួយបុគ្គលិកផ្សេងៗនៅក្នុងក្រុមហ៊ុនដែលជាឧបសគ្គមួយប៉ះពាល់ដល់ភាពជាអ្នកដឹកនាំនៅពេលអនាគត។
៧. បុគ្គលិកអាត្មានិយម
បុគ្គលិកប្រភេទនេះមានមហិច្ឆតាធំ។ ប៉ុន្តែអ្វីដែលជាចំណុចខ្សោយនោះគឺថា ខ្លួនជាមនុស្សអាត្មានិយម។ ធ្វើអ្វីៗដើម្បី តែខ្លួនឯង បើមើលឃើញប្រយោជន៍មកដល់ នឹងឈោងចាប់វាភ្លាមដើម្បីឡើងដល់កន្លែងកំពូល ទោះបីជាត្រូវប្រើមធ្យោបាយអ្វីក៏ដោយ។ បុគ្គលិកប្រភេទនេះមិនខ្វល់ថា ការងារទាំងនោះជាការខិតខំប្រឹងប្រែងរបស់អ្នករួមការងារក្តី ខ្លួននឹងចេញយកមុខមុនគេដើម្បីបង្ហាញចំណាប់អារម្មណ៍ឲ្យថ្នាក់ដឹកនាំមកចាប់អារម្មណ៍មកលើខ្លួន។ បន្ទោសបង្អាប់អ្នកផ្សេង លើកឡើងពីគុណវិបត្តិរបស់អ្នករួមការងារ លើកតម្កើងសមត្ថភាពខ្លួនឯង ក្នុងគោលបំណងតែមួយគត់ គឺឆាប់បានឡើងតំណែង និងដើម្បីប្រយោជន៍ផ្ទាល់ខ្លួនប៉ុណ្ណោះ៕
ប្រភព៖ Businessinsider
