ធ្វើ​ម៉េច​ពង្រឹង​ផ្នត់​គំនិត​ជា​អ្នក​ជំនួញ​ឲ្យ​​ជាប់​ជាប្រចាំ?​



នៅ​​ពេល​ដំបូង​ អ្នក​មើល​ទៅ​ដូច​ជា​សហគ្រិន​ម្នាក់​ដែល​ស្វាហាប់​សកម្ម​ទៅ​នឹង​ការងារ​មុខ​ជំនួញ​របស់​អ្នក​ណាស់។ ប៉ុន្តែ​ច្រើន​ថ្ងៃ​ច្រើន​ខែក្រោយ​មក អ្នក​ក៏​ចាប់​ផ្តើម​​បាក់​ទឹកចិត្ត​ដោយសារ​​មិន​ទាន់​ចំណេញ ចេះតែ​ហត់នឿយ​ទៅៗ​​ ជួប​រឿង​នេះ​រឿង​នេះ និង​គ្មាន​សេរីភាព​ជា​ដើម។ នេះ​បាន​ជំរុញ​ឲ្យ​អ្នក​មាន​គំនិត​មួយ​ គិត​ថា ចង់​បោះបង់​វា​ទៅ​វិញ​ម្តងៗ​ដែរ​។

ប្រសិន​បើ​អ្នក​ធ្លាក់​ចូល​ទៅ​ក្នុង​ស្ថានភាព​នេះ​មែន សូម​​គិត​ថា វា​ជា​រឿង​ចម្លែក ពី​ព្រោះ​សហគ្រិន​ណា​ក៏​ជួប​បញ្ហា​ទាំង​នេះ​ដែរ។ ​ទោះបី​បែប​នេះ​ក្តី អ្វី​ដែល​​ធ្វើ​ឲ្យ​សហគ្រិន​ភាគតិច​នៅ​ក្រាញននៀល​មិន​បោះបង់​ផ្លូវ​ដើរ​របស់​ពួកគេ​គឺ​ការ​ព្យាយាម​ យក​ឈ្នះ​ប្រកប​ដោយ​ភាព​ជឿជាក់​ លើ​បញ្ហា​ទាំង​នេះ ​​និង​មាន​ភាព​សុទិដ្ឋិនិយម​នៅ​ពេល​ខាងមុខ​ជាដើម។  

នៅ​ក្នុង​អត្ថបទ​នេះ​អាច​ចូលរួម​ផ្តល់​គន្លឹះ មួយ​ចំនួន​សម្រាប់​អ្នក​ថា តើ​ត្រូវ​ធ្វើ​​យ៉ាង​ម៉េច​ខ្លះ​ដើម្បី​​ពង្រឹង​ផ្នត់​គំនិត​ជា​អ្នក​ជំនួញ​ឲ្យ​​ជាប់​ជាប្រចាំ? ​​

១.រៀន​ពី​បទពិសោធន៍​របស់​​អ្នក​​ជំនួញ​​ល្បីៗ
គន្លឹះ​មួយ​ដ៏​មាន​​តម្លៃ​​ដែល​អ្នក​អាច​ធ្វើ​បាន​ គឺ​រៀន​​មើល​បទពិសោធន៍​របស់​បុគ្គល​​ជោគជ័យ​ល្បីៗ​ ឬ​គ្រូបង្គោល​ទាំង​នៅ​ជុំវិញ​អ្នក​ក៏​ដូច​ជា​នៅ​ជុំវិញ​ពិភពលោក​ត្បិតអី​ ​បុគ្គល​ទាំង​នេះ​បាន​ឆ្លងកាត់​ភាព​បរាជ័យ និង​ភាព​​ជោគជ័យ​​​​រួច​មក​ហើយ។ 

បុគ្គល​ទាំង​នេះ​អាច​​​លើក​ទឹកចិត្ត ជួយ​​​ចែក​រំលែក​បទពិសោធន៍ និង​បង្ហាញ​ផ្លូវ​​ដល់​អ្នក​នូវ​អ្វី​ដែល​ពួកគេ​យល់​ថា ជា​រឿង​​​ចំណេញ ឬ​ជា​ការ​ខាតបង់​នៅ​ក្នុង​មុខ​ជំនួញ​។ 

២.អាន​ឲ្យ​បាន​ច្រើន​បំផុត​តាម​ដែល​​អាច​ធ្វើ​បាន
ក្រៅ​ពី​រៀនសូត្រ​ពី​បុគ្គល​ជោគជ័យ ឬ​គ្រូ​បង្គោល​ហើយ​នោះ អ្នក​​ត្រូវការ​ចំណេះដឹង​ពី​ជ្រុង​ម្ខាងទៀត​ដែល​កើត​ចេញ​ពី​ការ​ស្រាវជ្រាវ​អាន​​ឯកសារ​ និង​សៀវភៅ​នានា​ដែល​ទាក់ទិន​ទៅ​នឹង​មុខ​ជំនាញ​របស់​អ្នក។ នៅ​ក្នុង​សៀវភៅ ឬ​ឯកសារ​ទាំង​នោះ គឺ​សុទ្ធតែ​បាន​បង្កប់​នូវ​អត្ថន័យ​ដ៏​មាន​តម្លៃ​​​ជា​ច្រើន​របស់​អ្នក​និពន្ធ​​ដែល​មាន​ដូចជា​ បទពិសោធន៍ កំហុសឆ្គង ការ​បរាជ័យ ភាព​ជោគជ័យ គន្លឹះ​យុទ្ធសាស្ត្រ និង​គុណ​សម្បត្តិ​ផ្សេង​ទៀត​សម្រាប់​យក​មក​អនុវត្ត​នៅ​ក្នុង​មុខ​ជំនួញ​របស់​អ្នក។

៣.ចូលរួម​សិក្ខាសាលា​ជុំវិញ​ប្រធានបទ​ទាក់ទង​ទៅ​នឹង​សហគ្រិន
ការ​ចូលរួម​សិក្ខាសាលា​ដែល​និយាយ​ពី​ជំនួញ ឬ​សហគ្រិន​ភាព គឺ​ជា​មធ្យោបាយ​មួយ​ទៀត​ដែល​ជំរុញ​ឲ្យ​អ្នក​ចាប់​អារម្មណ៍​លើ​មាគ៌ា​សហគ្រិន​កាន់តែ ខ្លាំង​ឡើង។ ក្រៅ​ពី​ការ​ទទួល​បាន​បទពិសោធន៍​ជា​ច្រើន​​ពី​ការ​ចែករំលែក​របស់​វាគ្មិន​ល្បីៗ អ្នក​ក៏​អាច​​ប្រើប្រាស់​ឱកាស​នេះ​ដើម្បី​ពង្រីក​បណ្ដាញ​ទំនាក់ទំនង និង​មិត្តភាព​ជាមួយ​មនុស្ស​ថ្មីៗ ដែល​មក​ពី​វិស័យ​ចម្រុះ​។ 

៤.ស្វែងរក​​ការ​ប្រកួតប្រជែង​ថ្មី
ជំនាញ​សំខាន់​បំផុត​ដែល​សហគ្រិន​​ត្រូវ​​មាន ​គឺ​ការ​ដោះស្រាយ​បញ្ហា។ អ្នក​ត្រូវ​រៀន​ពី​របៀប​គិត​យ៉ាង​​​ឆាប់រហ័ស ​សិក្សា​ស្ថានភាព​ពី​មុំ​ផ្សេងៗ និង​បង្កើត​ដំណោះស្រាយ​ប្រកបដោយ​​ភាព​ច្នៃប្រឌិត​​ដែល​គ្មាន​នរណា​ម្នាក់​ធ្លាប់​​ព្យាយាម​ពី​មុន​ទេ។ ដើម្បី​អភិវឌ្ឍ​ជំនាញ​បែប​នេះ​​បាន អ្នក​​ត្រូវ​ស្វែង​រក​ស្ថានភាព​ប្រឈម​​ផ្សេងៗ​​ជួយ​​ហ្វឹកហាត់​ខួរក្បាល​របស់​អ្នក​សម្រាប់​ការ​គិត​​ឲ្យ​បាន​ស៊ីជម្រៅ​។ ​ឧទាហរណ៍​ថា អ្នក​នឹង​ត្រូវ​រៀន​ទទួល​យក​មតិយោបល់ និង​ការ​រិះគន់​ស្តាប់​ដោយ​​ការ​យកចិត្តទុកដាក់​ចំពោះ​គំនិត​ និង​គំនិត​របស់​អ្នកដទៃ​ ហើយ​ផ្ដោត​លើ​លទ្ធផល​ និង​ដំណោះស្រាយ។

៥.គិត​ពី​ចក្ខុវិស័យ​របស់​អ្នក​ឲ្យ​បាន​រៀងរាល់​ថ្ងៃ
អ្នក​ចង់​ក្លាយ​​ជា​សហគ្រិន​ពីព្រោះ​តែ​អ្នក​មាន​គំនិត​ដើម្បី​​បង្កើត​ជំនួញ​របស់​អ្នក ហើយ​នោះ​គឺ​ជា​ចក្ខុវិស័យ​របស់​អ្នក។ វា​ជា​រឿង​សំខាន់​ដែល​អ្នក​ត្រូវ​មាន​គំនិត​សុទិដ្ឋិនិយម​​ជា​រៀងរាល់​ថ្ងៃ​លើ​ចក្ខុវិស័យ​​ក្នុង​មុខ​ជំនួញ​របស់​អ្នក​ប្រកប​ដោយ​ភាព​ជឿជាក់ និង​មាន​ក្តី​សង្ឃឹម​ជានិច្ច។ អ្នក​អាច​​សាកសួរ​ខ្លួន​ឯង​ថា ហេតុ​អ្វី​បាន​ជា​អ្នក​ដាក់​ជើង​ចូល​ក្នុង​ជំនាញ​មួយ​នេះ? ហេតុ​​អ្វី​បាន​ជា​អ្នក​ជំរុញ​ឲ្យ​ខ្លួន​ឯង​​ធ្លាក់​ចូល​ទៅ​​ក្នុង​ស្ថានភាព​ដ៏​ស្មុគស្មាញ​មួយ​នេះ? 

៦.ព្យាយាម​ពិនិត្យ​មើល​​​គ្រប់​ជ្រុង​​ទាំងអស់​នៃ​មុខ​ជំនួញ​របស់​អ្នក
ជា​ធម្មតា​​ទេ​នៅ​ពេល​អ្នក​ធ្វើ​​ជា​សហគ្រិន អ្នក​នឹង​មាន​ចន្លោះ​ខ្វះខាត​មួយ​ចំនួន​ដែល​អ្នក​មិន​អាច​គ្រប់គ្រង​គ្រប់​ជ្រុងជ្រោយ​បាន​ដោយសារតែ​អ្នក​មាន​ការងារ​ជា​ច្រើន​ដែល​ត្រូវ​ធ្វើ។ យ៉ាងណាមិញ នៅ​ពេល​ដែល​ជំនួញ​របស់​អ្នក​កាន់តែ​លូតលាស់ និង​​ជួល​​បុគ្គលិក​មក​ធ្វើការ វា​មាន​ទំនួល​ខុសត្រូវ​លំបាកៗ​ជា​ច្រើន​ដែល​អ្នក​មិន​អាច​នឹក​ស្មាន​ដល់។ ហេតុដូច្នេះ​ហើយ អ្នក​គួរតែ​ពិនិត្យ​មើល​ពី​ចំណុច​ខ្វះខាត​ឲ្យ​បាន​សព្វគ្រប់ កែតម្រូវ ផ្តល់​ទំនុកចិត្ត​ ចែក​ទទួល​ខុសត្រូវ​ដល់​បុគ្គលិក សហការ និង​បង្កើត​វប្បធម៌​ធ្វើ​ការងារ​ជា​ក្រុម។ 

៧.មាន​ច្បាប់​វិន័យ​ផ្ទាល់​ខ្លួន 
ដើម្បី​ក្លាយ​ជា​សហគ្រិន​ជោគជ័យ​ម្នាក់ វា​ទាមទារ​ឲ្យ​មាន​ច្បាប់​វិន័យ​ផ្ទាល់​ខ្លួន។ អ្នក​ត្រូវ​មាន​ភាព​ប្រុងប្រយ័ត្ន​​ក្នុង​ការ​បែងចែក​ពេលវេលា​​ឲ្យ​បាន​ត្រឹមត្រូវ​​រវាង​​មុខ​ជំនួញ​របស់​អ្នក និង​ជីវិត​ប្រចាំ​ថ្ងៃ​របស់​អ្នក។ នេះ​​មានន័យ​ថា ពេលវេលា​ដែល​​អ្នក​ចំណាយ​ទៅ​លើ​សកម្មភាព​ឥតប្រយោជន៍​​ផ្សេងៗ​ដូច​ជា ការ​លេង​បណ្តាញ​សង្គម​ច្រើន​ហួសហេតុ​ ឬ​ការ​ចូលចិត្ត​ធ្វើ​អ្វីៗ​ភ្លាមៗ​តាម​តែ​អ្នក​ចង់​ឃើញ​លែង​មាន​ដូចមុន​ទៀត​ហើយ។ អ្នក​ត្រូវ​ចំណាយ​ពេល​ឲ្យ​បាន​ត្រឹមត្រូវ​​ទាំង​ការ​គេង ទទួលទាន ហាត់ប្រាណ ការ​រៀបចំ​គម្រោង​ការងារ ធ្វើ​ការ អាន ណាត់​ជួប​មិត្តភក្ដិ ចំណាយ​ពេល​ជាមួយ​គ្រួសារ ដើរ​លំហែ​ជាដើម ត្រូវ​កំណត់ និង​អនុវត្ត​ខ្ជាប់ខ្ជួន​​ឲ្យ​បាន​​ត្រឹមត្រូវ​។ 

៨.ស្តាប់​ឲ្យ​បាន​ច្រើន​ជាង​និយាយ
ជា​ទូទៅ​មនុស្ស​ដែល​ពូកែ មិន​សំដៅ​លើ​អ្នក​ពូកែ​និយាយ​នោះ​ទេ។ វា​អាស្រ័យ​ទៅ​លើ​សមត្ថភាព​ក្នុង​ការ​ស្តាប់​របស់​អ្នក។ នៅ​ក្នុង​ទំនាក់ទំនង​ប្រចាំ​ថ្ងៃ​ក្តី ក្នុង​មុខ​ជំនួញ​ក្តី អ្នក​ត្រូវ​ត្រងត្រាប់​ស្តាប់​ដោយ​ការ​យកចិត្ត​ទុកដាក់ វិភាគ និង​វាយតម្លៃ​ ​ជា​ពិសេស​នៅ​ពេល​ដែល​មាន​ការ​សន្ទនា​ណាមួយ​ដែល​មិន​សូវ​យល់ចិត្ត ឬ​កិច្ចពិភាក្សា​ដែល​​មាន​ភាព​អាប់អួរ​​ខ្លាំង។ ការ​ស្តាប់​គួរ​​ស្តាប់​ឲ្យ​បាន​ច្រើន​ចំពោះ​​មតិ​គំនិត​របស់​អ្នក​ដែល​យើង​ចង់​ដឹង​បំផុត ជាជាង​មនុស្ស​ដែល​ព្យាយាម​និយាយ​ប្រាប់​អ្នក៕ ​​​

ប្រភព៖ Entrepreneur