គន្លឹះខ្លីៗ ១១ ចំណុចជួយឲ្យអ្នក​សម្រេច​បាន​លទ្ធផលការងារកាន់តែ​ល្អ ​គ្រប់គ្រងពេលវេលាក៏កាន់តែប្រសើរ​​



ពី​មួយ​ថ្ងៃ​ទៅ​មួយ​ថ្ងៃ អ្នក​ចេះ​តែ​ឲ្យ​ពេលវេលា​កន្លង​ផុត​ទៅ។ ការងារ​មិន​ទាន់​ហើយ​តាម​ពេលវេលា​ដែល​គ្រោង​ទុក លទ្ធផល​ក៏​មិន​បាន​ដូច​បំណង។ តើ​នេះ​បណ្តាល​មក​ពី​អ្វី? ពេល​ខ្លះ​អ្នក​​ដឹង​ហើយ​ថា ការ​ចំណាយ​ពេល​លើ​អ្វី​មួយ​វា​មិន​មាន​តម្លៃ ប៉ុន្តែ​​អ្នក​នៅ​តែ​បន្ត​ធ្វើ​ដោយសារតែ​វា​បាន​ក្លាយ​ជា​ទម្លាប់​ចាក់ឫស​នៅ​ក្នុង​ខ្លួន​អ្នក​រួច​ទៅ​ហើយ។ 

ឥឡូវ​នេះ​ដល់​ពេល​ដែល​អ្នក​ត្រូវ​ផ្លាស់ប្ដូរ​វា​ចេញ​ហើយ! អ្នក​ត្រូវ​ដាក់​គោលដៅ​ឲ្យ​បាន​ច្បាស់លាស់​ និង​រៀបចំ​ផែនការ​​សកម្មភាព​​ដែល​ត្រូវ​ធ្វើ​ឡើង​វិញ​ទើប​អ្នក​អាច​សម្រេច​​បាន​លទ្ធផល​ការងារ​កាន់តែ​ល្អ និង​គ្រប់គ្រង​ពេលវេលា​កាន់តែ​ប្រសើរ។ ខាងក្រោម​នេះ​គឺ​ជា​គន្លឹះ​ខ្លីៗ ដែល​អាច​ជួយ​ដោះស្រាយ​បញ្ហា​នេះ​បាន៖ ​​​​​​

១.ដាក់​គម្រោង​ការងារ​ពី​យប់​ថា​ត្រូវ​ធ្វើ​អ្វី​នៅ​ថ្ងៃ​ស្អែក
នៅ​មុន​ពេល​ចូល​គេង អ្នក​គួរ​ឆ្លៀត​ពេល​បន្តិច ដើម្បី​រៀបចំ​បញ្ជី​ការងារ​អ្វី​ខ្លះ​​ដែល​អ្នក​ត្រូវ​ធ្វើ​នៅ​ថ្ងៃ​ស្អែក​ដូចជា ត្រូវ​ចេញ​ទៅ​ជួប​ភ្ញៀវ​​អតិថិជន​នៅ​ម៉ោង ៨ ព្រឹក ​ត្រូវ​ប្រជុំ​នៅ​ម៉ោង ១០ ព្រឹក ត្រូវ ឬ​ត្រូវ​​មើល​ឯកសារ​ផ្សេងៗ​ជា​ដើម។ ការ​ធ្វើ​បែប​នេះ​នឹង​ជួយ​ឲ្យ​អ្នក​ប្រើប្រាស់​ពេលវេលា​មាន​ប្រសិទ្ធភាព។

​​២.គេង​ឆាប់​ក្រោក​ពី​ព្រលឹម
នៅពេល​អ្នក​ឆាប់​ក្រោក​ពី​ព្រលឹម​ អ្នក​មាន​ពេល​ច្រើន​ដើម្បី​រៀបចំ​ផែនការ​សម្រាប់​ធ្វើ​ក្នុង​ថ្ងៃ​នេះ ហើយ​​អាច​សល់​ពេល​ច្រើន​សម្រាប់​នៅ​ពេល​រសៀល ឬ​ពេល​យប់​ដើម្បី​ធ្វើ​កិច្ចការ​ផ្សេងៗ​ទៀត។  អ្នក​​អាច​មាន​ពេល​ទៅ​ហាត់​ប្រាណ​ដើម្បី​សុខភាព​ អាច​ទៅ​ធ្វើ​ការ​ដោយ​មិន​ប្រញាប់ប្រញាល់ ឆ្លៀត​ទៅ​ទទួលទាន​កាហ្វេ និង​មើល​ព័ត៌មាន មុន​នឹង​ចាប់​ផ្តើម​គម្រោង​ការងារ​​ប្រចាំ​ថ្ងៃ​របស់​អ្នក​។

៣.ស្វែងរក​គោលដៅ ឬ​​វត្ថុ​បំណង​ចម្បង​​របស់​អ្នក
អ្នក​ត្រូវ​សម្រេចចិត្ត​​ថា តើ​អ្វី​ទៅ​ជា​គោលដៅ ឬ​វត្ថុបំណង​ចម្បង​របស់​អ្នក? ដើម្បី​រក​ចម្លើយ​នេះ​ឃើញ​ អ្នក​ត្រូវ​មើល​ឲ្យ​បាន​វែងឆ្ងាយ​បន្តិច។ មូលហេតុ​ចម្បង​ដែល​មនុស្ស​ភាគច្រើន​​ប្រើប្រាស់​ពេលវេលា​​មិន​មាន​ប្រសិទ្ធភាព​គឺ​ដោយសារតែ​ដែល​មិន​មាន​គោលដៅ ឬ​វត្ថុបំណង​ច្បាស់លាស់​នេះ​ឯង។ ដូចនេះ នៅ​ពេល​អ្នក​​ចង់​ធ្វើ​អ្វី អ្នក​ត្រូវ​សួរ​ខ្លួន​ឯង​ថា ធ្វើ​ដើម្បី​អ្វី? តើ​​វា​ស្រប​ទៅ​នឹង​គោលដៅ ឬ​វត្ថុ​បំណង​ដែល​អ្នក​ចង់​បាន​នៅ​ពេល​ខាងមុខ​ដែរ​ឬ​អត់? 

៤.មួយ​ថ្ងៃ​យ៉ាងហោចណាស់​​ត្រូវ​​មាន​​ការងារ​ពី ៣​ ទៅ​៥​​ដែរ​នៅ​ក្នុង​បញ្ជី​ការងារ​​សម្រាប់​ធ្វើ
ប្រសិន​បើ​អ្នក​គ្មាន​អ្វី​សោះ​ត្រូវ​ធ្វើ​នៅ​ថ្ងៃ​ស្អែក វា​មិនមែន​ជា​រឿង​ល្អ​សម្រាប់​អ្នក​ទេ។ បើ​​ច្រើន​ហួសហេតុ​ពេក អ្នក​គួរតែ​​រក​ឲ្យ​ឃើញ​ពី​ភាព​ចាំបាច់​របស់​វា។ គន្លឹះ​ដ៏​ល្អ​មួយ​​សម្រាប់​អ្នក​ដើម្បី​ធ្វើ​ការងារ​ប្រចាំ​ថ្ងៃ អ្នក​ត្រូវ​រាយ​​កត់​ចូល​បញ្ជី​ការងារ​ប្រចាំ​ថ្ងៃ​ដែល​អ្នក​ត្រូវ​ធ្វើ​ពី ៣ ទៅ ៥ ក្នុង​មួយ​ថ្ងៃ ហើយ​បែងចែក​ ការងារ​​នីមួយៗ​​តាម​អាទិភាព​របស់​វា​​ ពោល​គឺ​ការងារ​​សំខាន់​ត្រូវ​ធ្វើ​មុន និង​មិន​សូវ​សំខាន់​ធ្វើ​តាម​ក្រោយ​ជា​លំដាប់លំដោយ​។ 

៥.បង្កើត​ប្រព័ន្ធ​ប្រតិទិន​ដែល​ធ្វើការ​​ឲ្យ​អ្នក
បង្កើត​ប្រព័ន្ធ​ប្រតិទិន​ដែល​អាច​ធ្វើការ​​ឲ្យ​អ្នក។ បន្ទាប់មក​ប្រើ​វា និង​ពិនិត្យ​មើល​វា​​ឲ្យ​បាន​ច្រើនដង​ក្នុងមួយថ្ងៃ។  វា​មិន​អាច​ទៅ​រួច​ទេ​ក្នុង​ការ​ចាប់​ផ្តើម​ធ្វើ​ការងារ​​របស់​អ្នក ​​ប្រសិនបើ​អ្នក​មិន​​បាន​ប្រាកដ​អំពី​កាលបរិច្ឆេទ​ ពេលវេលា​ ​ទីកន្លែង​ពេល​ផុត​កំណត់ ភារកិច្ច ឬ​ការ​ទំនួលខុសត្រូវ​ការងារ​ផ្សេងទៀត​របស់​អ្នក។​  ដូច​ពាក្យ​ចាស់​និយាយ​ថា​"ប្រសិនបើ​អ្នក បរាជ័យ​ក្នុង​ការ​រៀបចំ​គម្រោង ​ស្មើ​នឹង​អ្នក​មាន​គម្រោង​​ដើម្បី​បរាជ័យ"។

៦.កំណត់​អាទិភាព​គោលដៅ ឬ​​វត្ថុបំណង​របស់​អ្នក
អ្នក​អាច​មាន​គោលដៅ ​ឬ​វត្ថុបំណង​ច្រើន​លើស​ពី​មួយ​ឡើង​ទៅ។ ក៏ប៉ុន្តែ​គោលដៅ ឬ​វត្ថុបំណង​ខ្លះ​​វា​មាន​ភាព​សំខាន់ៗ​ទៅ​តាម​អាទិភាព​របស់​វា​។ ហេតុដូច្នេះ​ហើយ នេះ​ទាមទារ​ឲ្យ​អ្នក​ចេះ​​ជ្រើសរើស​​វា​មក​ធ្វើ​ទៅ​តាម​អាទិភាព។ គោលដៅ ឬ​វត្ថុបំណង​ដែល​ធំ ពិបាក ឬ​សំខាន់​ជាង​គេ ត្រូវ​ធ្វើ​វា​មុន​ឲ្យ​ហើយ មុន​ចាប់​ផ្តើម​ការងារ​ថ្មី​បន្ទាប់​។ 

៧.បែងចែក​ការងារ​ទៅ​ជា​ផ្នែក​តូចៗ
សម្រាប់​គោលដៅ​​ដែល​អ្នក​ចង់​សម្រេច​ឲ្យ​បាន ​អ្នក​​ត្រូវ​រៀបចំ​ផែនការ​​សម្រាប់​គោលដៅ​នេះ​ឲ្យ​ទៅ​​ជា​ជំហាន​តូចៗ។ ជំហាន​តូចៗ​នោះ ត្រូវ​ធ្វើ​ជា​ប្រចាំ​ថ្ងៃ ​ហើយ​ត្រូវ​ប្រាកដ​ថា វា​ដើរ​ស្រប​ឆ្ពោះ​ទៅ​កាន់​គោលដៅ​នោះ។ ឧទាហរណ៍​ថា អ្នក​ត្រូវ​លក់​ឲ្យ​បាន ១០០ ០០០ ដុល្លារ​ក្នុង​បំណាច់​ឆ្នាំ​នេះ។ ដូច្នេះ​ដើម្បី​សម្រេច​ផែនការ​នេះ អ្នក​មាន​យុទ្ធសាស្ត្រ​​រួច​ជា​ស្រេច​សម្រាប់​យក​មក​ធ្វើ​ឲ្យ​ចេញ​ជា​លទ្ធផល​សម្រាប់​​ថ្ងៃ​នេះ សប្តាហ៍​នេះ ខែ​នេះ ឬ​ឆ្នាំ។ នេះ​ដូច​ជា លក់​ឲ្យ​បាន ជិត ២៧៤ ដុល្លារ​ក្នុង​មួយ​ថ្ងៃ ១ ៩១៨ ដុល្លារ​ក្នុង​មួយ​សប្តាហ៍ នោះ​មួយ​ឆ្នាំ​អ្នក​នឹង​សម្រេច​បាន​ ១០០ ០០០ ដុល្លារ​។

៨.លៃលក​ពេល​សម្រាប់​ឆ្លើយតប​អ៊ីមែល
ប្រសិទ្ធភាព​ការងារ​ ទាមទារ​ឲ្យ​មាន​ការ​ផ្តោត​ការ​យកចិត្ត​ទុកដាក់ ហេតុដូច្នេះ​ហើយ​អ្នក​ក៏​ត្រូវ​លៃលក​ពេលវេលា​សមគួរ​ណាមួយ​ដើម្បី​​ពិនិត្យ​មើល​អ៊ីមែល​របស់​អ្នក។ បើ​អ្នក​​ធ្វើ​ការ​បន្តិច ឆែក​មើល​អ៊ីមែល​បន្តិច​ហើយ​មក​ធ្វើ​ការ​វិញ ត្រឡប់​ទៅ​ត្រឡប់​មក នេះ​វា​មិន​បង្ហាញ​ពី​ភាព​ហ្មត់ចត់​ក្នុង​ការ​រៀបចំ​​ និង​ការ​គ្រប់គ្រង​ពេលវេលា​ដ៏​មាន​ប្រសិទ្ធភាព​មួយ​នោះ​ឡើយ។ ជា​យោបល់​ល្អ អ្នក​គួរ​រៀបចំ​ពេល​នៅ​​ចន្លោះ​ម៉ោង​ណា​មួយ​ដើម្បី​ឆែក​មើល​អ៊ីមែល​ទាំង​នោះ ហើយ​ឆ្លើយតប​ទៅ​វិញ​​តាម​លំដាប់លំដោយ។

៩.កំណត់​សកម្មភាព​​ឥតប្រយោជន៍​មួយ​ចំនួន​ដែល​មក​រំខាន​អ្នក
នៅ​ពេល​ដែល​អ្នក​អាច​កំណត់​បាន​ពី​ការ​រំខាន​​ជាច្រើន​ដែល​គ្មាន​ប្រយោជន៍ ​អ្នក​​នឹង​មាន​ពេល​គ្រប់គ្រាន់​សម្រាប់​​យក​ទៅ​ផ្ដោត​លើ​កិច្ចការ​ដែល​អ្នក​កំពុង​ធ្វើ​។ ការ​រំខាន​​ទាំង​នេះ​មាន​ដូច​ជា ការ​ឆ្លៀត​លេង​បណ្ដាញ​សង្គម ការ​សន្ទនា​លើ​ប្រធានបទ​នានា​ប្រាសចាក​ពី​ការងារ​នៅ​ក្នុង​ម៉ោង​ការងារ ឬ​ក៏​ឆ្លៀត​ធ្វើ​នេះ​ធ្វើ​នោះ​ក្នុង​រូបភាព​មួយ​ដែល​ជា​ការ​ពន្យារពេល​​​មិន​ឲ្យ​អ្នក​​ផ្ចិតផ្ចង់​ទាំងស្រុង​លើ​ការងារ​របស់​អ្នក​​។ 

១០.បែងចែក​ពេលវេលា​សម្រាប់​ឲ្យ​បាន​ត្រឹមត្រូវ
បើ​អ្នក​ជា​សិស្ស ជា​ទូទៅ​អ្នក​ចំណាយ​ពេល​អង្គុយ​រៀន ៤៥ នាទី និង​សម្រាក ១៥​នាទី។ ប្រសិន​បើ​​អ្នក​ជា​បុគ្គលិក​វិញ អ្នក​ចាប់​ផ្តើម​ការងារ​នៅ​ម៉ោង ៨ សម្រាក​នៅ ម៉ោង ១១ ឬ ១២ ថ្ងៃ​ត្រង់​ដើម្បី​​ទទួលទាន​អាហារ​ថ្ងៃ​ត្រង់​មុន​ចូល​ធ្វើ​ការ​វិញ​នៅ​ម៉ោង ១ ឬ ម៉ោង ២ រសៀល។ នេះ​ជា​​គោលការណ៍​មួយ​ដើម្បី​ធានា​ឲ្យ​មាន​ប្រសិទ្ធភាព​ការ​សិក្សា ឬ​ការងារ។ ការងារ​​ធ្វើ​ការ​គ្មាន​ពេល​សម្រាក​មិនមែន​ជា​គំនិត​ល្អ​នោះ​ទេ។ អ្នក​ត្រូវ​បែងចែក​​ពេលវេលា​ឲ្យ​បាន​ច្បាស់​លាស់​ថា តើ​គួរ​សម្រាក​ប៉ុន្មាន​នាទី? នៅ​ចន្លោះ​ម៉ោង​ណា? ​ធ្វើ​ដូច​នេះ រាងកាយ​របស់​អ្នក​នឹង​មាន​ថាមពល​ឡើង​វិញ ជំរុញ​ប្រសិទ្ធភាព​ការងារ។

១១.ការងារ​ពី​​ផ្ទះ​ក៏​ជា​​គន្លឹះ​ល្អ​ដែរ
ដោយសារតែ​បច្ចុប្បន្ន​​បច្ចេកវិទ្យា​កាន់តែ​ទំនើប មនុស្ស​អាច​ធ្វើ​ការងារ​ពី​​ផ្ទះ​​បាន វត្តមាន​​នៅ​ការិយាល័យ​ធ្វើ​ការ ពេល​ខ្លះ​មិន​ចាំបាច់​នោះ​ទេ។ អ្នក​អាច​កាត់​បន្ថយ​ភាព​ធុញថប់​នឹង​ការ​ចំណាយ​ពេល​ច្រើន​លើ​ការ​ធ្វើ​ដំណើរ ការ​កក់​ស្ទះ​ចរាចរណ៍ និង​កត្តា​ផ្សេងៗ​ទៀត។ ក៏ប៉ុន្តែ​​ចំណុច​នេះ​អាច​ធ្វើ​បាន​ឬ​អត់​គឺ​ស្ថិត​នៅ​លើ​ការ​ចរចា​របស់​អ្នក​​ជាមួយ​ក្រុមហ៊ុន​តែប៉ុណ្ណោះ។

ប្រភព៖ Businessinsider