អនុវត្តយុទ្ធសាស្រ្តទាំង ១០ នេះធ្វើឲ្យអ្នកមានកាន់តែមានឡើង
នៅពេលអ្នកមើលបុគ្គលិកលក្ខណៈរបស់អ្នកក្រគឺជាទូទៅ អ្នកនឹងសង្កេតឃើញថា ពួកគេជាមនុស្សចូលចិត្តធ្វើការឲ្យគេ ៨ ម៉ោងក្នុងមួយសប្តាហ៍ ៥ ឬ ៦ថ្ងៃក្នុងមួយសប្តាហ៍ ពឹងលើប្រាក់ខែតែមួយមុខ ហើយអ្វីដែលជាពិសេសនោះគឺសង្ឃឹមចាស់ទៅដេកស៊ីប្រាក់ចូលនិវត្តន៍។ នេះជាផ្នត់គំនិតមួយខុសគ្នាឆ្ងាយពីអ្នកមានខ្លាំងណាស់ ខណៈដែលពួកគេដេកស្រមៃថា ខ្លួនអាចនឹងក្លាយជាអ្នកមានដែរ។
សូមឈប់ស្រមៃបែបនេះទៅ! សូមចាប់ផ្តើមគិតបែបគំនិតអ្នកមាន ១០ ខាងក្រោមនេះដែលនឹងធ្វើឲ្យស្ថានភាពហិរញ្ញវត្ថុរបស់អ្នកកាន់តែប្រសើរ។
១.មានផ្នត់គំនិតបង្កើនប្រាក់ចំណូលបន្ថែម
ជាទូទៅមនុស្សដែលមានទ្រព្យសម្បត្តិច្រើនគឺជាមនុស្សច្នៃប្រឌិតក្នុងការគិតអំពីអាជីវកម្ម និងស្វែងរកវិធីផ្សេងៗក្នុងការរកលុយ។ មនុស្សប្រភេទនេះបានកំណត់ខ្លួនឯងឲ្យមានបុគ្គលិកលក្ខណៈផ្សេងពីមនុស្សទូទៅដោយពួកគេចេះបង្កើតគំនិតដែលធ្វើឲ្យហិរញ្ញវត្ថុរបស់ខ្លួនរីកចម្រើន។ ពួកគេបានផ្លាស់ប្ដូររបៀបគិតលើលុយ និងមើលឃើញឱកាសរកប្រាក់ចំណេញតាមរយៈការបង្កើតរកលុយចេញពីគម្រោងផ្សេងៗ និងមានគំនិតបើកចំហដើម្បីស្វែងរកគំនិតថ្មីៗ។
២. បង្កើតបណ្ដាញទំនាក់ទំនងជាមួយមនុស្សជោគជ័យ
អ្នកមានយល់ពីសារៈសំខាន់នៃការទំនាក់ទំនងជាមួយមនុស្សជោគជ័យ។ ពួកគេចូលចិត្តចំណាយពេលវេលាក្នុងការពង្រីកបណ្តេញទំនាក់ទំនងជាមួយអ្នកដទៃដែលជោគជ័យហិរញ្ញវត្ថុ ពីព្រោះបុគ្គលទាំងនោះមានភាពប៉ិនប្រសប់ និងសក្ដានុពលដែលអាចធ្វើឲ្យខ្លួនជោគជ័យហិរញ្ញវត្ថុដែរ។ ដូច្នេះហើយទើបអ្នកសង្កេតឃើញថា អ្នកមានតែងមានវត្តមាននៅក្នុងសិក្ខាសាលានានា ជួបជុំនៅហាងកាហ្វេនិយាយពីមុខជំនួញ និងចូលរួមវគ្គបណ្តុះបណ្តាលដែលបណ្ដុំទៅដោយវាគ្មិនជំនួញល្បីៗជាដើម។ ពួកគេជួបមនុស្សថ្មីៗជាប្រចាំ ពីព្រោះថា មនុស្សថ្មីៗ នឹងធ្វើឲ្យពួកគេមានគំនិតថ្មីៗ។
៣.ចាកចេញពីតំបន់សុវត្ថិភាពរបស់អ្នក (Comfort Zone)
អ្នកមានទ្រព្យសម្បត្តិច្រើនបានទទួលជោគជ័យពីព្រោះពួកគេបានដឹងថា ភាពជោគជ័យអាចកើតមានឡើងលុះត្រាតែយើងអាចដើរឲ្យហួសដែនពីតំបន់ព្រំដែនសុវត្ថិភាពរបស់យើង។ ប្រសិនបើអ្នកចង់ក្លាយទៅជាអ្នកមាន អ្នកត្រូវការបង្កើនថាមពលលើភាពច្នៃប្រឌិតរបស់អ្នក បង្កើតគំនិតអាជីវកម្ម និងធ្វើអ្វីដែលអ្នកមិនធ្លាប់ធ្វើពីមុនមក។ សូមចាំថា ទ្រព្យសម្បត្តិ និងភាពជោគជ័យមិនអាចកើតឡើងពីសុវត្ថិភាពនៃការងារដែលធ្វើត្រឹមតែ ៨ ម៉ោងក្នុងមួយថ្ងៃនោះឡើយ។ អ្នកត្រូវប្រើប្រាស់ថាមពលចេញពីក្នុងខ្លួនដើម្បីលេងហ្គេមជីវិតដ៏លំបាកៗជាមុនសិន ទើបអ្នករកឃើញសេចក្តីសុខនៅពេលក្រោយ។
៤.រកប្រភពចំណូលឲ្យបានច្រើន
បើអ្នកមានលុយកាន់តែច្រើន អ្នកកាន់តែងាយស្រួលក្នុងការបង្កើតលុយ។ ទន្ទឹមនឹងនេះវិធីសាស្ត្រដ៏ងាយស្រួល និងឆាប់រហ័សបំផុតដើម្បីរកលុយឲ្យបានកាន់តែច្រើនគឺការបង្កើតប្រភពចំណូលឲ្យបានច្រើន។ វិធីសាស្ត្រនេះ នឹងធ្វើឲ្យអ្នកមានលុយហូរចូលកាន់តែច្រើន ហើយអ្នកត្រូវប្រើប្រាស់ចំណូលនោះវិនិយោគទៅលើប្រភពចំណូលផ្សេងៗទៀត។ នេះគឺជាមូលដ្ឋានគ្រឹះដ៏សំខាន់បំផុតដែលធ្វើឲ្យអ្នកកាន់តែមានឡើងៗ។
៥.វិនិយោគ
ភាពវ័យឆ្លាតមួយរបស់អ្នកមានគឺថា ពួកគេធ្វើឲ្យលុយចេះរកលុយឲ្យពួកគេ។ អ្នកមានទ្រព្យសម្បត្តិស្តុកស្តម្ភដឹងថា ការវិនិយោគគឺជាកូនសោដ៏សំខាន់ដែលធ្វើឲ្យចំណូលរបស់ពួកគេចេះតែកើនឡើង និងមានទៅៗ។ ខណៈដែលការសន្សំប្រាក់គឺជារឿងសំខាន់ ចំណេះដឹងវិនិយោគគឺជារឿងសំខាន់ជាងនេះទៅទៀត ពីព្រោះថា នៅពេលអ្នកមានលុយហើយ អ្នកត្រូវចេះគ្រប់គ្រងលុយឲ្យមានប្រសិទ្ធភាព ហើយប្រសិទ្ធភាពរបស់លុយគឺការធ្វើឲ្យលុយរបស់អ្នកដើរមិនឈប់ដើម្បីរកលុយឲ្យអ្នកត្រឡប់មកវិញ។ ដូច្នេះវិធីតែមួយគត់ដែលអ្នកអាចសម្រេចលើរឿងនេះបាន គឺវិនិយោគ។
៦.កំណត់ហានិភ័យដែលកើតមានឡើង
អ្នកមានមិនសូវហ៊ានលេងល្បែងលើការសម្រេចចិត្តហិរញ្ញវត្ថុធំៗឡើយ។ ពួកគេធ្វើអ្វីដែលពួកគេអាចធ្វើបានដើម្បីកាត់បន្ថយហានិភ័យមកក្នុងអត្រាមួយទាបបំផុត។ ដើម្បីទទួលជោគជ័យលើកិច្ចការនេះ ពួកគេត្រូវធ្វើការស្រាវជ្រាវ និងវិភាគ ហើយកំណត់ថា តើជម្រើសណាមួយដែលសមស្របបំផុតទៅនឹងតម្រូវការផ្នែកហិរញ្ញវត្ថុ និងបំណងប្រាថ្នាដែលពួកគេចង់បាននៅក្នុងមុខជំនួញ។ ពួកគេមានភាពហ្មត់ចត់ក្នុងការថ្លឹងថ្លែងពីប្រយោជន៍ និងគុណវិបត្តិ តាមរយៈការយកយកហានិភ័យមកវាយតម្លៃចុះឡើង។
៧.ផ្តោតលើការអភិវឌ្ឍសមត្ថភាពរបស់ខ្លួន
អ្នកមានជាទូទៅចូលចិត្តអានច្រើន។ អ្នកមានយល់ពីសារៈសំខាន់នៃការអប់រំខ្លួនឯង ហើយជំរុញខ្លួនឯងឲ្យមានភាពប្រសើរឡើងតាមគ្រប់មធ្យោបាយ។ ៨៥% នៃអ្នកមានបានអានសៀវភៅពី ២ក្បាលឡើងទៅក្នុងមួយខែ ទាក់ទងទៅនឹងការអភិវឌ្ឍសមត្ថភាពខ្លួនឯង ខណៈដែលអ្នកមានត្រឹមតែ ១១% ផ្សេងទៀត ប៉ុណ្ណោះដែលបានអានសៀវភៅ ឬ ឯកសារផ្សេងៗសម្រាប់ការកម្សាន្ត ធៀបទៅនឹងអ្នកក្រដែលមានដល់ទៅ ៧៩% ។ អ្នកមាន ៩៤% បានអានអត្ថបទចេញផ្សាយថ្មីៗ ខណៈដែលអ្នកក្រមានត្រឹមតែ ១១% ប៉ុណ្ណោះ។
៨.អ្នកមានមិនដែលចូលនិវត្តន៍ទេ
អ្នកប្រហែលជាឆ្ងល់ហើយថា ហេតុអ្វីបានជាអ្នកមានមិនចេះឆ្អែត? ពួកគេមានលុយចាយរាប់មិនអស់ ចុះ ហេតុអ្វីបានជាពួកគេមិនព្រមទម្លាក់ការងាររបស់ខ្លួនចោលដើម្បីដេកស៊ីចាយប្រាក់ឲ្យសប្បាយសម្រាប់ជីវិតដែលនៅសេសសល់? នេះជាការយល់ខុសមួយដ៏ធំៗ។ តាមពិតទៅ អ្នកមានភាគច្រើនបានបន្តធ្វើការរហូតដល់ជីវិតចុងក្រោយរបស់ខ្លួន។ ទោះមានអាយុច្រើន ប៉ុន្តែនៅតែមានវត្តមាននៅការិយាល័យធ្វើការ។ មូលហេតុដ៏សំខាន់នោះគឺថាពួកគេជាមនុស្សញៀននឹងការងារ ញៀននឹងភាពជោគជ័យ ហើយការរកលុយគឺជាមុខរបរមួយដែលធ្វើឲ្យពួកគេមានអារម្មណ៍ថា មានសេចក្ដីសុខ។ ដូចនេះបើអ្នកយកសំនួរនេះទៅសួរពួកគេ ពួកគេនឹងគិតថា អ្នកជាមនុស្សល្ងង់ជាមិនខាន។
៩.ជៀសវាងការចំណាយហួសហេតុ
នៅពេលដែលអ្នកក្រដេកស្រមៃចង់ចាយលុយពេញៗដៃដោយគ្មានការព្រួយបារម្ភ ដូចជាទិញផ្ទះថ្លៃ រថយន្តល្អៗ និងសម្ភារៈប្រើប្រាស់ថ្លៃៗ អ្នកមានឯណោះវិញយល់ថា បើអ្នកកាន់តែចាយលុយ អ្នកកាន់តែខ្សត់លុយ។ សូមចាំថា អ្នកមានមិនងាយធ្លាក់ខ្លួនដោយសារតែពួកគេអាចការពារខ្លួនពីការធ្លាក់ចូលក្នុងទម្លាប់ខ្ជះខ្ជាយចាយលុយដ៏ហួសហេតុរបស់អ្នកក្រ។ មិនសំខាន់ថា អ្នករកលុយបានប៉ុន្មាននោះទេ បើអ្នកចាយធំជាងចំណូល អ្នកនឹងក្រ។ អ្នកមានយល់ថា បើអ្នកចាយលុយកាន់តែតិច អ្នកនឹងមានលុយសល់កាន់តែច្រើន។ អ្នកអាចយល់ច្រឡំថា អ្នកឧស្សាហ៍ឃើញអ្នកមានចាយលុយធំណាស់ ច្រើនជាងអ្នករាប់សិបដង ប៉ុន្តែពួកគេចាយធំ ក៏ដោយសារតែពួកគេអាចរកចំណូលបានលើសការចំណាយរបស់ពួកគេរាប់សិបដងទៅទៀតឯណោះ។
១០.ចំណាយពេលដើម្បីគិតពីខ្លួនឯង
អ្នកមានទ្រព្យសម្បត្តិស្តុកស្តម្ភ មិនភ្លេចឡើយក្នុងការចំណាយពេលវេលាមួយចំនួនដើម្បីគិតគូរពិនិត្យមើលខ្លួនឯងជាប្រចាំ។ ពួកគេបានចំណាយពេល ៣០ នាទី ឬច្រើនជាងនេះ នៅកន្លែងស្ងប់ស្ងាត់ដើម្បីឆ្លុះបញ្ចាំងពីជីវិត និងគោលដៅរបស់ខ្លួនគិតពីសុខភាព ទំនាក់ទំនងរបស់ខ្លួន ពិចារណាលើបញ្ហាអាជីពការងារ គោលដៅហិរញ្ញវត្ថុនិងចោទសួរខ្លួនឯងថា តើខ្លួនកំពុងស្ថិតនៅកន្លែងណា? ការគិតនេះនឹងធ្វើឲ្យពួកគេអាចសម្លឹងមើលឃើញពីអ្វីដែលកើតមានឡើង និងអ្វីដែលអាចផ្លាស់ប្ដូរនៅពេលខាងមុខ៕
ប្រភព៖ Entrepreneurs
