អនុវត្ត ៣​គន្លឹះ​នេះ ​​​នឹង​ធ្វើ​ឲ្យ​អ្នក​ពេញចិត្ត​​ថ្ងៃ​នេះ​ដើម្បី​​ជីវិត​ល្អ​ប្រសើរ​នៅ​ថ្ងៃ​ស្អែក​



មនុស្ស​គ្រប់គ្នា​និយាយ​ថា ជីវិត​​មនុស្ស​ខ្លី​ណាស់! តើ​១០​ឆ្នាំ​របស់​មនុស្ស​មាន​ប៉ុន្មាន​ដង? ប៉ុន្តែ​អ្នក​ប្រហែល​ជា​​​ភ្លេច​គិត​ថា ​អ្នក​បាន​ធ្វើ​រឿង​ជា​ច្រើន​ដែល​ធ្វើ​ឲ្យ​ជីវិត​របស់​អ្នក​​រសាត់អណ្ដែត​តាម​ពេលវេលា​ដោយ​ឥតប្រយោជន៍។ ​អ្នក​បាន​បណ្តែតបណ្តោយ​ឲ្យ​អ្នកដទៃ ​ក្តី​បារម្ភ សម្ពាធ​ផ្លូវចិត្ត ការ​អស់សង្ឃឹម ការ​បរាជ័យ ។ល។ មក​​កំណត់​វាសនា​របស់​​អ្នក​។ 

តើ​អ្នក​មាន​ធ្លាប់​សួរ​ខ្លួន​ឯង​ទេ​ថា ហេតុ​អ្វី​បាន​ជា​អ្នក​ក្លាយ​ជា​បែប​នេះ?  តើ​អ្នក​បាន​​ធ្វើ​អ្វី​ខ្លះ​សម្រាប់​ថ្ងៃ​ស្អែក? នេះ​ជា​ចម្លើយ​ដែល​អ្នក​​ឆ្លើយ​បាន តែ​ពិបាក​ធ្វើ។ ឥឡូវ​នេះ​អ្នក​អាច​ចាប់​ផ្តើម​​ធ្វើ​រឿង​៣ ​ខាងក្រោម​នេះ ហើយ​ចាប់​ពី​ថ្ងៃ នេះ​តទៅ បើ​ទោះបី​ជា​ក្នុង​ស្ថានភាព​ណាក៏ដោយ អ្នក​ត្រូវ​រក​មូលហេតុ​ និង​គោលដៅ​នៃ​ទង្វើ​របស់​អ្នក។

១.មុន​ពេល​សម្រេចចិត្ត​ធ្វើ​អ្វី​មួយ សួរ​ខ្លួន​​ឯង​ថា “ហេតុអ្វី?”
យោង​តាម​អ្នកឯកទេស​ផ្នែក​ចិត្តសាស្ត្រ​បាន​ឲ្យ​ដឹង​ថា​  ជំហាន​មួយ​ក្នុង​ចំណោម​ជំហាន​ដែល​ងាយស្រួល​បំផុត​ដែល​អ្នក​អាច​ធ្វើ​ឥឡូវ​នេះ​​បាន គឺ​ការ​សួរ​ខ្លួនឯង​នូវ​សំណួរ​ពិបាក​ៗ​ជា​ច្រើន​ ។ ពេលខ្លះ​ អ្នក​គិត អ្នក​​ធ្វើ​  ហើយ​​អ្នក​និយាយ​មុន​ពេល អ្នក​មាន​ពេលវេលា​ដើម្បី​​ចាប់​ផ្តើម​ដំណើរការ​​ធ្វើ​អ្វី​មួយ​ដែល​កំពុង​កើត​​មាន​ឡើង​នៅ​ក្នុង​ខ្លួន​អ្នក និង​​នៅ​ជុំវិញ​អ្នក​។ នេះ​ជា​ចំណុច​ខ្សោយ​មួយ​របស់​អ្នក​ដែល​ធ្វើ​ដោយ​មិន​បាន​គិត​ទៅ​លើ​លទ្ធផល ឬ​ការ​ខ្វះ​ការ​ពិចារណា​ជាមុន។ 

ផ្នែក​មួយ​នៃ​​ដំណើរ​ស្វែងយល់​​ការពិត​ពី​ខ្លួន​ឯង អ្នក​ត្រូវ​ចាប់​ផ្តើម​សួរ​ខ្លួន​ឯង​ថា ហេតុ​អ្វី​បាន​ជា​អ្នក​​ក្លាយ​ជា​បែប​នេះ? ហេតុ​អ្វី​បាន​ជា​អ្នក​ចេះ​តែ​គិត​ពី​អ្វី ដែល​អ្នក​កំពុង​គិត? ហេតុ​អ្វី​បាន​ជា​អ្នក​ធ្វើ​អ្វី​ដែល​អ្នក​កំពុង​ធ្វើ​? ខណៈ​ដែល​ភាព​ប្រញាប់ប្រញាល់​ខ្វះ​ការ​ពិចារណា​របស់​អ្នក​​ញាំង​ឲ្យ​​​កើត​មាន​សកម្មភាព​យ៉ាង​​ភ្លាមៗ​នោះ អ្នក​ត្រូវ​ប្រាកដ​ថា រាល់​សកម្មភាព​របស់​អ្នក​ទាំងអស់​ត្រូវ​បាន​ធ្វើ​ឡើង​ជាមួយ​គោលដៅ និង​ហេតុផល​ច្បាស់លាស់។ 

២.ជំនួស​ឲ្យ​​​ការ​​គិត​លើ​គម្រោង​វែងឆ្ងាយ អ្នក​​គួរ​គិត​លើ​​គម្រោង​សម្រាប់​ថ្ងៃ​ស្អែក
អ្នក​ត្រូវ​ចាំ​ថា ការ​បារម្ភ​​គឺ​ជា​ចោរកម្ម​​នៃ​ពេលវេលា និង​ភាព​រីករាយ។ ប្រសិន​បើ​អ្នក​ក្រឡេក​ទៅ​មើល​កំណត់ត្រា​នៃ​ព្រឹត្តិការណ៍​​ជីវិត​ដែល​កើត​មាន​ឡើង​អ្នក​នឹង​ដឹង​ថា រឿងរ៉ាវ​ជា​ច្រើន​ដែល​ធ្វើ​ឲ្យ​អ្នក​ធុញថប់ និង​បារម្ភ​បំផុត ​សុទ្ធតែ​មាន​មូលហេតុ​របស់​វា។ នៅ​ពេល​អ្នក​គិត​ពី​ទិសដៅ​ដែល​អ្នក​ចង់​ទៅ​នៅ​ក្នុង​ជីវិត​របស់​អ្នក ​សូម​កុំ​​ដាក់​សម្ពាធ​ខ្លួនឯង​ឲ្យ​គិត​​ច្រើន​ពេក​ដល់​អនាគត​វែងឆ្ងាយ​​រាប់​សិប​ឆ្នាំ​​ខាងមុខ​។ គិត​ពី​អ្វី​ដែល​អ្នក​ត្រូវ​ធ្វើ​នៅ​ថ្ងៃ​នេះ​​ដោយ​ពេញចិត្ត សម្លឹង​មើល​អ្វីៗ​នៅ​ជុំវិញ​អ្នក ហើយ​ចេះ​​សម្រាក​ខ្លះ​ពេល​នឿយហត់។ ​​

នៅពេល​អ្នក​ផ្ដោត​លើ​ការ​ទទួលយក​ជីវិត​នៅ​ថ្ងៃ​ណាមួយ​  អ្នក​នឹង​មាន​ថាមពល​កាន់តែ​ច្រើន​ក្នុង​ការ​​គិត​ប្រកបដោយ​ភាព​​ប្រាកដប្រជា និង​ធ្វើការ​សម្រេចចិត្ត​ដែល​នាំ​ទៅ​រក​ការ​​ទទួល​បាន​លទ្ធផល​អ្វី​មួយ​នៅ​ក្នុង​រយៈពេល​ខ្លី និង​រយៈពេល​វែង។  តើ​អ្នក​អាច​ទទួល​ទាន​ដំរី​​ទាំងមូល​ក្នុង​ពេល​តែមួយ​បាន​យ៉ាង​ដូចម្តេច​ទៅ?  តើ​អ្នក​រស់នៅ​ដោយ​របៀប​ណា? គឺ​រស់នៅ​​ដោយ​ផ្ដោត​លើ​អ្វី​​ដែល​អ្នក​កំពុង​ធ្វើ​ថ្ងៃ​នេះ​ឲ្យ​បាន​ច្រើន​បំផុត​តាមដែល​អាច​ធ្វើ​បាន​។

៣.បង្ហាញ​ថា អ្នក​ជា​មនុស្ស​រីករាយ​តាម​ដំណើរ​ជីវិត​របស់​អ្នក​
មនុស្ស​គ្រប់គ្នា​រស់នៅ​ក្នុង​សង្គម​មួយ​ដែល​បង្ខំ​ឲ្យ​​អ្នក​ទាំងអស់​គ្នា ត្រូវ​ព្យាយាម​បង្ហាញ​​អ្នកដទៃ​ពី​សុភមង្គល​របស់​រៀងៗ​​ខ្លួន​​។ បើ​យោង​តាម​ការ​សិក្សាស្រាវជ្រាវ ទូរស័ព្ទ​គឺ​ជា​បិសាច​ដ៏​អាក្រក់​មួយ​​ផង​ដែរ​ដែល​បំផ្លាញ​សេចក្ដីសុខ​របស់​មនុស្ស​​នៅ​យុគសម័យ​នេះ។  វា​ហាក់ដូចជា​កំពុង​ធ្វើ​ឲ្យ​​អ្នក​យល់​ថា អ្នក​​មិន​អាច​រស់នៅ​​ជាមួយ​អ្នកដទៃ​បាន​ដោយ​គ្មាន​វា។ ទន្ទឹម​នឹង​នេះ សម្រាប់​មនុស្ស​ភាគច្រើន​ទូរស័ព្ទ​កំពុង​ដើរ​តួនាទី​យ៉ាង​សំខាន់​ក្នុង​ជីវិត​ប្រចាំ​ថ្ងៃ​ដែល​​ពួកគេ​ទាញ​យក​មក​មើល​មុន​គេ​នៅ​ព្រឹកព្រលឹម និង​មុន​ពេល​ចូល​គេង។ ពួកគេ​បាន​ប្រើ​ទូរស័ព្ទ​ថត​ទេសភាព​ជុំវិញ​ខ្លួន ថត​រូប​ខ្លួន​ឯង និង​ផុស​បង្ហោះ​​ដើម្បី​ឲ្យ​គេ​មើល​ទៅ​ឃើញ​ថា ខ្លួន​ជា​មនុស្ស​មាន​សុភមង្គល​ជាងគេ​បំផុត។ ប៉ុន្តែ​ការពិត ពួកគេ​មិន​បាន​ពេញចិត្ត​នូវ​អ្វី​ដែល​ខ្លួន​កំពុង​ធ្វើ​ដោយ​អវត្តមាន​របស់ ទូរស័ព្ទ​នោះ​ឡើយ។ ​

​​នេះ​ជា​ដំណឹង​ល្អ​មួយ។ ចាប់​ពី​ថ្ងៃ​នេះ​តទៅ អ្នក​មិន​ចាំបាច់​បង្ហាញ​​មនុស្ស​គ្រប់គ្នា​ថា អ្នក​ជា​មនុស្ស​​សប្បាយចិត្ត ឬ​ពេញចិត្ត​ទៅ​នឹង​ជីវិត​របស់​អ្នក​​នោះ ឡើយ។ អ្នក​ត្រូវ​ពេញចិត្ត​នូវ​អ្វី​ដែល​អ្នក​មាន និង​អ្វី​ដែល​អ្នក​កំពុង​ធ្វើ​​ឲ្យ​បាន​ច្រើន​បំផុត។ ត្រូវ​ការពារ​​សុវត្ថិភាព​ និង​ផ្លូវ​ដើរ​របស់​អ្នក។ កុំ​អនុញ្ញាត​ឲ្យ​អ្នកដទៃ ​ទូរស័ព្ទ  ឬ​បណ្ដាញ​សង្គម ​មក​យាយី​​ដំណើរ​ផ្លូវ​របស់​អ្នក និង​​រំខាន​អ្វីៗ​ដែល​អ្នក​កំពុង​ធ្វើ​។ 

កុំ​ឲ្យ​ឱកាស​ល្អ​ថ្ងៃ​នេះ​កន្លង​ផុត​ទៅ ព្យាយាម​ធ្វើ​វា​ឲ្យ​បាន​ល្អ​បំផុត និង​ចេះ​ប្រើ​ពេល​ថ្ងៃ​នេះ​រីករាយ​ជា​មួយ​អ្វី​​ដែល​នៅ​ជុំវិញ​អ្នក​ឲ្យ​បាន​ច្រើន​បំផុត​។ ជីវិត​របស់​អ្នក​ អ្នក​ជា​អ្នក​កសាង​វា​ឡើង។ អ្នក​គឺ​ជា​អ្នក​គ្រប់គ្រង​ជីវិត​របស់​អ្នក​តែមួយ​គត់។ សូម​មើល​ឧបសគ្គ​ជីវិត​​ជា​ឱកាស។ អ្នក​ត្រូវតែ​​ពេញចិត្ត​អ្វី​ដែល​មាន​នៅ​ថ្ងៃ​នេះ៕

ប្រភព៖ Addicted2sucess.com 

X
5s