បើមិនច្បាស់ថាគំនិតអាជីវកម្មរបស់អ្នកល្អឬអត់ សាកមកមើលក្បូនទាំង៥នេះ
នៅពេលអ្នកមានគំនិតអាជីវកម្មល្អមួយ អ្នកប្រហែលជាយល់ថា អ្នកអាចនឹងជោគជ័យច្រើនលើជំនួញនោះ។ អ្នកមានក្តីសង្ឃឹម មានការរំពឹងទុក ប៉ុន្តែអារម្មណ៍របស់អ្នកនៅលាយឡំជាមួយនឹងក្តីបារម្ភព្រោះអ្នកយល់ថា ការគិតអាចមិនដូចការធ្វើនោះទេ។ អ្នកអាចនៅមានភាពស្ទាក់ស្ទើរ ហើយមិនដឹងថា អ្នកដទៃមើលមកល្អឬអត់? នេះជាបញ្ហាទូទៅមួយរបស់អ្នករកស៊ីថ្មីថ្មោង។
ដើម្បីបញ្ចប់ចម្ងល់នេះ និងដើម្បីដឹងកាន់តែច្បាស់ថា គំនិតអាជីវកម្មរបស់អ្នកល្អឬអត់ សាកល្បងអនុវត្តតាមគន្លឹះ ៥ ចំណុចខាងក្រោមនេះ៖
១.សេវាកម្ម ឬផលិតផលរបស់អ្នកគ្មានតម្រូវការនៅលើទីផ្សារនៅពេលឥឡូវនេះ
ទោះបីជាគំនិតអាជីវកម្មរបស់អ្នកល្អឥតខ្ចោះយ៉ាងណាក៏ដោយ ប្រសិនបើគំនិតដែលអ្នកគិតចង់រកស៊ីលក់ផលិតផល ឬសេវាកម្មនោះមិនមានតម្រូវការនៅលើទីផ្សារទេ ហើយក៏មិនអាចដោះស្រាយបញ្ហាក៏ដូចជាការផ្តល់ភាពពេញចិត្តពេញថ្លើមដល់អតិថិជនទេនោះ អ្នកអាចវិនិច្ឆ័យដោយខ្លួនឯងបានថា គំនិតអាជីវកម្មរបស់អ្នកមិនល្អរួចទៅហើយ។
២.អតិថិជនមិនហ៊ានចំណាយលុយលើផលិតផល ឬសេវាកម្មរបស់អ្នកពេលអ្នកចង់ឲ្យពួកគេចំណាយ
រឿងដ៏សាមញ្ញរបស់អាជីវកម្មគឺងាយស្រួលទេ។ អាជីវកម្មរបស់អ្នកនឹងជោគជ័យ បើអ្នករកចំណូលបានច្រើនជាងចំណាយ ហើយបើករណីនេះមិនកើតមានទេ វាបង្ហាញថា អាជីវកម្មរបស់អ្នកមានដង្ហើមរស់ក្នុងរយៈពេលខ្លីតែប៉ុណ្ណោះ។ អ្នកត្រូវសិក្សាលម្អិតលើផលិតផល ឬសេវាកម្មមួយរាប់ចាប់តាំងពីការចំណាយលើការផលិត ការវេចខ្ចប់ ការចែកចាយ ឬផ្តល់សេវាកម្មជាដើម ហើយកំណត់តម្លៃមួយនៅលើទីផ្សារ។ យ៉ាងណាមិញ បើអតិថិជនរបស់អ្នកមិនពេញចិត្តតម្លៃនោះដោយយល់ថា វាថ្លៃពេក ហួសពីសមត្ថភាពរបស់ពួកគេ ឬ មិនអាចដោះស្រាយបញ្ហាតម្រូវការរបស់ពួកគេឲ្យមានប្រសិទ្ធភាពបានទេ វាជាសញ្ញាណបញ្ជាក់ថា គំនិតអាជីវកម្មរបស់អ្នកដើរទៅមុខមិនរួចឡើយ។
៣.អ្នកវិនិយោគមិនចាប់អារម្មណ៍គំនិតអាជីវកម្មរបស់អ្នក
រាល់អាជីវកម្មទាំងអស់ត្រូវការទុនដើម្បីចាប់ផ្តើមប្រតិបត្តិការរកស៊ី។ ប្រសិនបើគ្មានទុន អាជីវកម្មនោះប្រៀបដូចជារថយន្តគ្មានសាំងដូច្នេះដែរ។ អ្នកអាចចាប់ផ្តើមរកស៊ីបានជាមួយគំនិតអាជីវកម្មរបស់អ្នកក៏ប៉ុន្តែវាដើរទៅមុខមិនបានឆ្ងាយ។ យោងតាមការស្រាវជ្រាវរបស់ក្រុមហ៊ុន CBInsights បានឲ្យដឹងថា អាជីវកម្មថ្មីថ្មោង ២៩% បានបរាជ័យដោយសារតែខ្វះទុន។
ដោយសារតែមូលហេតុនេះហើយ ការបង្ហាញគំនិតអាជីវកម្មរបស់អ្នកទៅកាន់អ្នកវិនិយោគ ឬអ្នកជំនួញដែលមានលុយច្រើនមុនអ្នកចាប់ផ្តើមជំនួញ នឹងអាចកំណត់បានថា គំនិតអាជីវកម្មរបស់អ្នកល្អឬអត់។ ប្រសិនបើពួកគេមិនចាប់អារម្មណ៍ទេនោះ វាអាចបញ្ជាក់បានថា គំនិតអាជីវកម្មរបស់អ្នកមិនទាន់ល្អគ្រប់គ្រាន់នៅឡើយទេ ឬមិនល្អតែម្តង។
៤.តម្រូវការសេវាកម្ម ឬផលិតផលរបស់មិនមានស្ថិរភាព
អ្នកតែងសង្កេតឃើញថា អាជីវកម្មខ្លះបានបើកតែមួយឆាវហើយក៏បិតទៅវិញ ដោយសារតែតម្រូវការប្រើប្រាស់របស់អតិថិជនគ្មានស្ថិរភាព ឬមិនកើនឡើងតែម្តង។ ពេលខ្លះផលិតផល ឬសេវាកម្មរបស់អ្នកកំពុងត្រូវការច្រើននៅពេលបច្ចុប្បន្ន ក៏ប៉ុន្តែអ្នកមើលឃើញថា នៅពេលអនាគតវានឹងមិនពេញនិយមដោយសារតែមានផលិតផល ឬ សេវាកម្មថ្មីមកជំនួស។ នេះជាសញ្ញាណមិនល្អមួយដែលអាចបញ្ជាក់បានថា អាជីវកម្មរបស់អ្នកមិនអាចឈរនៅលើទីផ្សារបានយូរឡើយ។
សូមចាំថា បើតម្រូវការសេវាកម្ម ឬផលិតផលនោះនៅទ្រឹងមួយកន្លែងមិនចុះមិនឡើង សូមកុំប្រឡូកក្នុងអាជីវកម្មនោះយូរពេក។ អ្នកគួរដកខ្លួន ហើយសម្លឹងមើលគំនិតអាជីវកម្មថ្មីវិញដែលអាចធានាបាននូវកំណើនតម្រូវការប្រើប្រាស់ប្រកបដោយស្ថិរភាពទាំងពេលបច្ចុប្បន្ន និងពេលអនាគត។
៥.មានអ្នកផ្សេងទៀតធ្លាប់រកស៊ីដូចអ្នកដែរ តែបានបរាជ័យទៅវិញ
នេះជាបទពិសោធន៍ដ៏ ល្អមួយដែលអ្នកគួរសិក្សារៀនសូត្រថា ហេតុអ្វីបានជាអ្នកមុនៗរកស៊ីលើមុខជំនួញដូចអ្នក តែបរាជ័យទៅវិញ? នេះអាចបណ្តាលមកពីកត្តាទីតាំង យុទ្ធសាស្ត្រទីផ្សារមិនល្អ និងតម្រូវការទាបជាដើម។ បើអ្នកចង់បើកជំនួញនោះ អ្នកត្រូវសួរខ្លួនឯងថា តើអ្នកជោគជ័យឬអត់? តើអ្នកមានអ្វីជាចំណុចខុសប្លែកពីអ្នកទាំងនោះ? តើអ្នកអាចបង្កើតកំហុស ឬជាន់ដានពួកគេឬអត់?
តាមពិតទៅ រាល់អាជីវកម្មទាំងអស់ដែលបើកហើយបរាជ័យ មិនមែនមានន័យថា មុខជំនួញនោះវាមិនជោគជ័យរហូតនោះទេ។ ក៏ប៉ុន្តែនេះជាការដាស់តឿនមួយសម្រាប់អ្នកឲ្យមានការប្រុងប្រយ័ត្នក្នុងការបង្កើតយុទ្ធសាស្ត្រមួយដែលល្អជាងនេះដើម្បីជៀសវាងបង្កើតកំហុសដូចពួកគេ ឬក៏ថា ដកខ្លួនចេញតែម្តង៕
ប្រភព៖ Entrepreneurs
