​​មាន​ទម្លាប់​មិន​ល្អ១០​នេះ នឹង​ធ្វើឲ្យ​អ្នក​បាត់បង់​ការ​គោរព​នៅ​​កន្លែង​​ធ្វើការ​​



ទាំង​ទម្លាប់​ក្តី​ឥរិយាបថ​ប្រចាំ​ថ្ងៃ​របស់​អ្នក​ក្តី គឺ​ពិត​ជា​ខុសគ្នា​រវាង​ជីវិត​ផ្ទាល់ខ្លួន​របស់​អ្នក និង​កន្លែង​ការងារ។ នៅ​កន្លែង​ការងារ ទោះ​ចង់​ឬ​មិន​ចង់ អ្នក​ត្រូវ​រៀបចំ​ខ្លួន​ឲ្យ​​មាន​វិជ្ជាជីវៈ​ស័ក្ដិសម​ជា​បុគ្គលិក​​គំរូ​ទាំង​គុណភាព​ការងារ សីលធម៌ និង​ការ​ទំនាក់ទំនង​ជាដើម​។ ផ្ទុយ​ទៅ​វិញ បើ​អ្នក​នៅ​ប្រកាន់​អត្តចរិត​មិន​ល្អ ១០ ចំណុច​​ខាងក្រោម​នេះ អ្វី​ដែល​អ្នក​នឹង​ទទួល​បាន​គឺ​ការ​បាត់បង់​​ទំនុកចិត្ត និង​ការ​គោរព​​នៅ​កន្លែង​ការងារ​ជា​មិនខាន។  ​​

១.​​ចូលចិត្ត​ចែករំលែក​​ព័ត៌មាន​ផ្ទាល់ខ្លួន​ច្រើនពេក​
ពិធី​ជប់លៀង ដំណើរ​កម្សាន្ត ការ​ណាត់ជួប ឬ​សកម្មភាព​​រឿងរ៉ាវ​ឯកជន​​ជាច្រើន​ទៀត ទំនង​​ក្លាយ​ជា​ប្រធានបទ​ដ៏​ក្តៅ​គគុក​​​​របស់​អ្នក​នៅ​កន្លង​ការងារ។ រឿង​​ដែល​​គួរតែ​លាក់​ទុក​ ឬ​មិន​សម​នឹង​និយាយ​ចេញ​មក​ អ្នក​បែរ​ជា​លាតត្រដាង​ប្រាប់​ឲ្យ​ក្រុម​ការងារ​បានដឹង​បើ​ទោះបី​ជា​ពួកគេ​មិន​​បាន​ស្នើ​ឲ្យ​អ្នក​និយាយ​​ចេញ​មក​ក៏ដោយ​។ ​នេះ​ជា​ទង្វើ​មួយ​ខ្វះ​ការ​ពិចារណា និង​បាត់បង់​ភាព​ថ្លៃថ្នូរ​ចំពោះ​ខ្លួនឯង។

២.ត្អូញត្អែរ​ពីនេះពីនោះ​ច្រើន​ជ្រុល​​
វា​​គួរ​ទទួល​បាន​​ការ​លើកទឹកចិត្ត និង​ស្វាគមន៍​​​​ប្រសិន​បើ​នៅ​​កន្លែង​ការងារ​បាន​ផ្តល់​ឱកាស​ឲ្យ​បុគ្គលិក​ម្នាក់ៗ​លើកឡើង​ពី​បញ្ហា​ផ្សេងៗ​ដែល​ជា​តម្រូវការ​សម្រាប់​ជួយ​កែលំអ​ការងារ​ឲ្យ​ដើរ​រលូន​ទៅមុខ។ ប៉ុន្តែ​មាន​បុគ្គលិក​ខ្លះ​មិន​បែប​នេះ​ឡើយ។ ពួកគេ​លើក​បញ្ហា​នេះ​បញ្ហា​នោះ ស្នើ​នេះ​ស្នើ​នោះ​ បង្ហាញ​គំនិត​អវិជ្ជមាន​ស្ទើរតែ​គ្រប់​រឿង​ទាំងអស់។ ជៀសវាង​បញ្ហា​នេះ អ្នក​គួរ​តែ​ធ្វើ​ខ្លួន​ជា​បុគ្គលិក​​ផ្តល់​ដំណោះស្រាយ​ ហើយ​បើ​ឃើញ​កំហុស​កើត​ឡើង គួរតែ​ផ្តល់​មតិ​កែលំអ​ទើប​ជា​រឿង​ល្អ។

៣.ពូកែ​កុហក ឬ​លួច​របស់របរ​​នៅ​កន្លែង​ការងារ​
បុគ្គលិក​មួយ​ចំនួន​មាន​ទន្លាប់​កុហក​នេះ​កុហក​នោះ ហើយ​ពួកគេ​គិត​ថា ជា​រឿង​ធម្មតា​តូចតាច​វា​មិន​ធ្ងន់ធ្ងរ។ ចំណុច​មួយ​ទៀត គឺ​​ការ​លួច​របស់របរ​ផ្សេងៗ​នៅ​កន្លែង​ការងារ​​បើ​ទោះបី​ជា​សម្ភារ​ទាំងនោះ​តូចតាច​ក្តី យូរៗ​ទៅ​វា​ក្លាយ​ជា​ទម្លាប់​ ហើយ​ឈាន​ទៅ​ដល់​ការ​បង្កើត​កំហុស​ធំឡើងៗ។ ​សម្រាប់​មនុស្ស​ទូទៅ នេះ​ជា​ទង្វើ​មួយ​​ពិបាក​នឹង​ទទួល​យក​បាន​​ដែល​ធ្វើ​ឲ្យ​អ្នក​​បាត់បង់​តម្លៃ​ មិន​ចាំបាច់​តែ​នៅ​កន្លែង​ការងារ​នោះ​ឡើយ។

៤.​ធ្វើ​អ្វី​ក៏​យឺត
សម្រាប់​អ្នក​ ការ​មក​យឺត​​មិន​ថា មក​ធ្វើការ ប្រជុំ ឬ ការងារ​យឺតយ៉ាវ មើល​ទៅ​ហាក់បី​​ដូច​ជា​ធម្មតា។ ក៏ប៉ុន្តែ​សម្រាប់​បុគ្គលិក​ផ្សេងៗ​ទៀត​​ពួកគេ​នឹង​មើល​មក​អ្នក​ថា អ្នក​ជា​មនុស្ស​មិន​គោរព​ពេលវេលា មិន​ឲ្យ​តម្លៃ​ដល់​ក្រុមហ៊ុន ឬ​​ថ្នាក់ដឹកនាំ​ជាដើម។ ទន្ទឹម​នឹង​នេះ​ វា​ឆ្លុះបញ្ចាំង​ផង​ដែរ​​ថា អ្នក​ជា​មនុស្ស​​ខ្វះ​ការ​រៀបចំ​ដែល​មិន​អាច​ផ្តល់​ភាព​ជា​គំរូ​បាន​នៅ​ពេល​អនាគត​បាន​ឡើយ។

៥.ចូលចិត្ត​ផុស ឬ​ចែករំលែក​រឿងរ៉ាវ​ Drama 
មាន​ពេល​ខ្លះ​​ អ្នក​ជួប​សុខ ពេល​ខ្លះ​ទុក្ខ ខក​បំណង អស់​សង្ឃឹម បាក់ទឹកចិត្ត ចង់​ឲ្យ​គេ​អាណិត និង​ចង់​ឲ្យ​​ឲ្យ​គេ​ចាប់​អារម្មណ៍​រឿង​ផ្ទាល់ខ្លួន​របស់​អ្នក​​ជាដើម​។ គ្មាន​អ្នកណា​ម្នាក់​ដែល​អាច​គេច​ផុត​ពី​បញ្ហា​ជីវិត​​ទាំងអស់​នេះ​បាន​ទេ។ ក៏ប៉ុន្តែ​ក្នុង​នាម​ជា​​មនុស្ស​មាន​វិជ្ជាជីវៈ ការ​គ្រប់គ្រង​អារម្មណ៍​ខ្លួនឯង​គឺ​ជា​រឿង​ល្អ​បំផុត។ អ្នក​មិន​ត្រូវ​ឲ្យ​អារម្មណ៍​បែប​រវើរវាយ​​របស់​អ្នក​​ទម្លុះទម្លាយ​​រឿងរ៉ាវ Drama ទាំង​នេះ​ទៅ​មនុស្ស​ជុំវិញ​អ្នក​បាន​ដឹង​ ឬ​តាម​រយៈ​​ការ​ចែករំលែក​​នៅ​លើ​បណ្ដាញ​សង្គម​ឡើយ បើ​មិន​ដូច្នេះ​ទេ អ្នក​នឹង​បាត់បង់​ការ​គោរព​ជាមិនខាន​។  សូម​ចាំ​ថា គ្មាន​អ្នកណា​យល់​​ពី​ខ្លួន​អ្នក​ច្រើន​ជាង​ខ្លួន​អ្នក​ទេ។ 

៦.បុគ្គលិក​មាត់ចាបមាត់ព្រាប 
នៅ​កន្លែង​ការងារ​អ្នក​នឹង​អង្កេត​ដោយ​ខ្លួនឯង​បាន​ថា មាន​បុគ្គលិក​ខ្លះ​ចង់​​ឲ្យ​អ្នក​និយាយ​រឿង​អ្នក​នេះ​អ្នក​នោះ ជា​ពិសេស​ជីវិត​ផ្ទាល់ខ្លួន​របស់​គេ​ដូច​ជា និយាយ​ដើម​អ្នក​រួម​ការងារ​ដូចគ្នា ឬ​​ចៅហ្វាយ​របស់​អ្នក​​ជាដើម។ យ៉ាងណាមិញ​សូម​ចាំ​ថា នៅ​ពេល​អ្នក​បាន​ចូល​អន្ទាក់​របស់​ពួកគេ​ហើយ ពួកគេ​ក៏​កំពុង​វាយតម្លៃ​អ្នក​នៅ​ក្នុង​ពេល​ដំណាលគ្នា​នេះ​ផង​ដែរ។ ពួកគេ​នឹង​មើល​មក​អ្នក​ថា ជា​មនុស្ស​មិន​គួរឲ្យ​ទុកចិត្ត​បាន និង​ពូកែ​និយាយ​ដើម​អ្នកដទៃ។ បើ​អ្នក​ជា​មនុស្ស​បែប​នេះ អ្នក​នឹង​ក្លាយ​ជា​ផ្ទាំង​ស៊ីប​​ដែល​ពួកគេ​ត្រូវ​ប្រុងប្រយ័ត្ន​នៅ​ពេល​​នៅ​ជាមួយ​​អ្នក។ 

៧.សម្ភី​គម្រោះគម្រើយ ឬ​គ្រោតគ្រាត
ដោយសារតែ​ជា​ចរិត​ធម្មជាតិ​របស់​អ្នក​ ការ​ប្រើ​ពាក្យ​សម្តី គម្រោះគម្រើយ  គ្រោតគ្រាត ឬ​ទ្រគោះបោះបោក​បាន​ក្លាយ​ជា​ទម្លាប់​របស់​អ្នក​​និយាយ​​ចេញ​មក​ដោយ​ខ្វះ​ការ​ពិចារណា​។ ក៏ប៉ុន្តែ​នៅ​កន្លែង​ការងារ​ទោះ​ចង់​ឬ​មិន​ចង់ អ្នក​ដាច​ខាត​មិន​ត្រូវ​យក​​អារម្មណ៍​ផ្ទាល់ខ្លួន​ប្រើប្រាស់​ពាក្យពេចន៍​ទាំងនោះ​មក​លាយឡំ​នឹង​កន្លែង​ការងារ​របស់​អ្នក​ឡើយ។ ជា​ធម្មតា​នៅ​កន្លែង​ការងារ ​អ្នក​នឹង​ធ្វើការ​ជាមួយ​មនុស្ស​​ដែល​មាន​ប្រភព​ផ្សេងៗ​គ្នា ប៉ុន្តែ​មាន​គោលការណ៍​រួម​មួយ​គឺ ភាព​មាន​វិជ្ជាជីវៈ​​ក្នុង​ការ​ទទួលខុសត្រូវ​ការងារ​របស់​ខ្លួន។ ទំនាក់ទំនង​ល្អ​​ប្រកប​ដោយ​សីលធម៌ គឺ​ជា​រឿង​ដែល​ត្រូវ​បាន​លើកទឹកចិត្ត។ 

៨.ស្លៀកពាក់​មិន​បាន​សមរម្យ ឬ​សាមញ្ញ​ពេក​​មិន​សម​ជា​បុគ្គលិក 
កន្លែង​ការងារ មិនមែន​ជា​កន្លែង​ដើរ​លេង ហើយ​ក៏​មិនមែន​កន្លែង​ហាត់ប្រាណ ឬ​ដើរ​ផ្សារ​ដែរ។ ដូច្នេះ ការ​ស្លៀកពាក់​ឲ្យ​បាន​សមរម្យ​​មាន​វិជ្ជាជីវៈ​ស្រប​តាម​​គោលការណ៍​របស់​ក្រុមហ៊ុន ​គឺ​ជា​រឿង​ដែល​ត្រូវ​យកចិត្ត​ទុកដាក់។ បើ​អ្នក​​ស្លៀកពាក់​ហួសហេតុ​ជ្រុល ឬ​សាមញ្ញ​ជ្រុល​ពេល នោះ​ក្រុម​​ការងារ​នឹង​មើល​មក​អ្នក​ថា អ្នក​បុគ្គលិក​​ក្មេងខ្ចី​គ្មាន​វិជ្ជាជីវៈ​ដែល​ជា​ការ​បាត់បង់​តម្លៃ​មួយ​នៅ​ក្នុង​ក្រុមហ៊ុន។

៩.ពូកែ​តែ​និយាយ តែ​ធ្វើ​តិច
នៅ​ក្នុង​ចំណោម​ក្រុម​ការងារ​អ្នក​ប្រហែល​ជា​ខិតខំ​សម្ដែង​​ឲ្យ​មនុស្ស​គ្រប់គ្នា​ចាប់​អារម្មណ៍​មើល​មក​​​អ្នក​ថា អ្នក​ជា​មនុស្ស​ឆ្លាត ពូកែ​និង​មាន​​គំនិត​​លេចធ្លោ​ជាងគេ។ អ្នក​អាច​នឹង​មោទនភាព​ខ្លួនឯង​​ទៅ​នឹង​​​ពាក្យ​សម្ដី​ដ៏​ប៉ិនប្រសព្វ​ឈានមុខ​គេ​របស់​អ្នក ខណៈ​ដែល​ជាក់ស្តែង ការ​អនុវត្ត​របស់​អ្នក​បែរ​ជា​នៅ​ឆ្ងាយ​ហួស​ពី​​អ្វី​ដែល​អ្នក​បាន​យាយ​ទៅ​ទៀត។ ទង្វើ​បែប​នេះ​មិន​អាច​ផ្តល់​ភាព​ជា​គំរូ​បាន​ឡើយ។ អ្នក​នឹង​ទទួល​បាន​ការ​គោរព​ពី​ក្រុម​ការងារ ប្រសិន​បើ​អ្នក​ជា​មនុស្ស​ផ្ដួចផ្ដើម​គំនិត ហើយ​ក៏​ជា​អ្នក​ផ្ដួចផ្ដើម​ធ្វើ​មុន​គេ​ផង​ដែរ។

១០.ពូកែ​ស្ដីបន្ទោស​ទម្លាក់​កំហុស​​បុគ្គលិក​ដទៃទៀត
ជា​ទូទៅ មនុស្ស​នឹង​ឲ្យ​តម្លៃ និង​គោរព​ដល់​អ្នកណា​ម្នាក់​ដែល​មាន​ទំនួលខុសត្រូវ​ខ្ពស់​​ចំពោះ​កំហុស​​របស់​ខ្លួន។ ការ​ស្តី​បន្ទោស ឬ​ទម្លាក់​កំហុស​ទៅ​លើ​អ្នកដទៃ មិន​អាច​ទទួល​បាន​ការ​គោរព​​អ្វី​ឡើយ។ ​ផ្ទុយ​ទៅ​វិញ ​​អ្វី​ដែល​អ្នក​​នឹង​ទទួល​បាន​​គឺ​មានតែ​ភាព​ស្អប់​ខ្ពើម​តែប៉ុណ្ណោះ។ ឱកាស​ដើម្បី​ធ្វើ​ឲ្យ​អ្នក​ក្លាយ​ជា​អ្នកដឹកនាំ​គេ​បាន​នៅ​ពេល​អនាគត​គឺ ការ​ទទួលខុសត្រូវ​​ និង​ការ​ជួយ​ជ្រោមជ្រែង​អ្នកដទៃ​ឲ្យ​ជោគជ័យ​នេះ​ឯង៕

ប្រភព៖ Businessinsider 

 

X
5s