ព្រះតេជគុណ គូ សុភាព៖ គោលការណ៍ ៧ចំណុច ដើម្បីក្លាយខ្លួនជាអ្នកដឹកនាំពូកែ
មានមនុស្សមិនតិចនោះទេដែលបានក្លាយជាអ្នកដឹកនាំ ប៉ុន្តែមិនមែនអ្នកដឹកនាំទាំងអស់សុទ្ធតែជាអ្នកដឹកនាំដ៏ពូកែនោះទេ ដូច្នេះតើធ្វើយ៉ាងណាទើបអាចក្លាយខ្លួនជាអ្នកដឹកនាំដ៏ពូកែម្នាក់? ជាមួយគ្នានេះ សាស្ត្រាចារ្យសាកលវិទ្យាល័យបញ្ញាសាស្ត្រកម្ពុជា ព្រះតេជគុណ គូ សុភាព បានលើកយកនៅគោលការណ៍សប្បុរិសធម៌ ៧ចំណុចតាមរយៈព្រះពុទ្ធសាសនា ដែលនឹងជួយជំរុញអ្នកឲ្យក្លាយខ្លួនជាអ្នកដឹកនាំពូកែ។
ទី១ ស្គាល់ហេតុ៖ ស្វែងយល់ពីដំណើរដើមទងនៃរឿងរ៉ាវណាមួយឲ្យច្បាស់លាស់ ថាតើមូលហេតុអ្វីខ្លះដែលបណ្ដាលឲ្យកើតមានរឿងនោះឡើង ដូច្នេះមានរឿងអ្វីមួយត្រូវចេះមើលហេតុជាមុន។
ទី២ ស្គាល់ផល៖ ពិចារណាលើផលដែលទទួលថា ប្រសិនបើយើងធ្វើរឿងនឹងមួយតើនឹងទទួលបានផលអ្វី។
ទី៣ ស្គាល់ខ្លួនឯង៖ ត្រូវស្គាល់ច្បាស់ពីឋានៈតួនាទីរបស់ខ្លួនឯង កុំឆ្មើងឆ្មៃដើរជាន់ជើងអ្នកដទៃ។
ទី៤ ស្គាល់កាលៈទេសៈ៖ ដឹងពេលដែលគួរធ្វើ ដឹងពេលដែលគួរនិយាយ។
ទី៥ ស្គាល់ប្រមាណ៖ ចេះគិតក្រែងពីអ្នកដទៃ មិនអាត្មានិយម ចេះស្កប់ស្កល់ ដឹងថាធ្វើប៉ុណ្ណាទើបសមល្មម។
ទី៦ ស្គាល់បុគ្គល៖ ស្គាល់អត្តចរិត ស្គាល់ពីចំណង់ចំណូលចិត្ត របស់មនុស្សម្នាក់ៗ។
ទី៧ ស្គាល់ពីវប្បធម៌ប្រពៃណី៖ ប្រសិនបើធ្វើដំណើរទៅកាន់ប្រទេសណាមួយ ច្បាស់ណាស់យើងត្រូវដឹងខ្លះៗពីរបៀបរបបនៃការរស់នៅរបស់គេ ថាតើវប្បធម៌គេតែងធ្វើយ៉ាងម៉េចខ្លះ ដើម្បីបង្ការការឆ្គាំឆ្គងចំពោះខ្លួនឯង៕
ដោយ៖ ជួប ស្រីរ័ត្ន
ប្រភព៖ Kou Sopheap
