មិនធម្មតា! ក្រសួងផលិតផ្លាកលេខរថយន្តពិសេសមានតម្លៃរហូតដល់១០០០លានរៀល
ក្រសួងសាធារណការនឹងដឹកជញ្ជូន បានបើកដំណើរការជាផ្លូវការនូវដំណើរការលក់លេខពិសេសចុះបញ្ជីផ្ទាល់ខ្លួនសម្រាប់រថយន្តជាលើកដំបូងនៅកម្ពុជាជាលើកដំបូង កាលពីថ្ងៃទី០៧ មករា ឆ្នាំ២០១៩កន្លងទៅ។ ក្រសួងបានឲ្យដឹងថា លេខរថយន្តពិសេសនេះមានតម្លៃចាប់ពី ២លានរៀល រហូតដល់១០០០លានរៀល និងអាចមានតម្លៃលើសពីនេះទៅទៀតក្នុងករណីដាក់ដេញថ្លៃ។
ថ្លែងនៅក្នុងពិធីបើកឲ្យដំណើរការជាផ្លូវការនូវការលក់លេខចុះបញ្ជីពិសេសផ្ទាល់ខ្លួនសម្រាប់រថយន្តកាលពីពេលកន្លងទៅ ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន មានប្រសាសន៍ថា ផ្លាកលេខពិសេសផ្ទាល់នេះ ត្រូវបានបោះពុម្ពដោយមានអក្សរ “កម្ពុជា” នៅផ្នែកខាងលើ និងការរួមបញ្ចូលគ្នានៃលេខឡាតាំង ឬអក្សរ ចាប់ពី០១ ដល់ ០៨ខ្ទង់ បោះពុម្ពនៅផ្នែកកណ្ដាល ព្រមទាំងមាន QR Code នៅផ្នែកខាងស្ដាំនៃផ្លាកលេខ ហើយផ្លាកលេខពិសេសនេះ ក៏អាចរក្សាទុកបាននៅពេលដែលមានការផ្ទេរកម្មសិទ្ធិរថយន្តផងដែរ។
ឯកឧត្ដមបន្តថា ប្រជាពលរដ្ឋកម្ពុជាទាំងអស់អាចធ្វើការជ្រើសរើសផ្លាកលេខរថយន្ត ដែលខ្លួនស្រលាញ់ ដោយការដាក់ពាក្យស្នើសុំទិញ ឬការដាក់ដេញថ្លៃ តាមរយៈប្រព័ន្ធស្វ័យប្រវត្តិកម្មចុះបញ្ជីរថយន្តដែលមានអាសយដ្ឋាន vehicle.mpwt.gov.kh ដោយគ្រាន់តែប្រើប្រាស់គណនីដែលខ្លួនមាន ឬតម្កល់ប្រាក់ជាមួយនឹងដៃគូគ្រឹះស្ថានហិរញ្ញវត្ថុ ដែលបានសហការជាមួយក្រសួងសាធារណការ និងដឹកជញ្ជូន ដោយបង្កលក្ខណៈ ងាយស្រួល តម្លាភាព ទំនុកចិត្ត លឿនរហ័ស និងសុវត្ថិភាពខ្ពស់។
លេខចុះបញ្ជីពិសេសផ្ទាល់ខ្លួន សម្រាប់ រថយន្ដនេះ គឺដើម្បីផ្ដល់ជម្រើសដល់ប្រជាពលរដ្ឋ ដែលមានលទ្ធភាពអាចជ្រើសរើសស្លាក លេខ ដែលមានលក្ខណៈពិសេសអាចកម្ម៉ង់តាមការពេញចិត្ត ព្រមទាំងជួយសម្រួលដល់នីតិវិធីនៃការ ប្រមូលពន្ធថែមទៀតផង។ ជាមួយគ្នានេះ ក៏ដើម្បីបង្ហាញឲ្យឃើញពីការយកចិត្តទុកដាក់ របស់ រាជរដ្ឋាភិបាល កម្ពុជា ក្នុងការជួយសម្រួលដល់ប្រជាពលរដ្ឋក្នុងការទិញលេខចុះបញ្ជីរថយន្ត ដោយ ងាយ ស្រួល តាមរយៈប្រព័ន្ធស្វ័យប្រវត្តិកម្មនៃយុគសម័យបច្ចេកវិទ្យា៕
ប្រភព៖ ក្រសួងព័ត៌មាន
