មុនទិញពិនិត្យផង! ប្រើគ្រឿងសំអាងក្លែងក្លាយមានគ្រោះថ្នាក់ណាស់
បច្ចុប្បន្ននៅកម្ពុជា អាជីវកម្មគ្រឿងសម្អាងកំពុងតែពេញនិយមនិងរីកដុះដាលដូចផ្សិត ដែលជានិច្ចកាលតែងតែឃើញម្ចាស់អាជីវកម្មទាំងប្រុសស្រីផ្សព្វផ្សាយផលិតផលរបស់ខ្លួនជាហូរហែតាមបណ្ដាញសង្គម។ ថ្វីត្បិតតែផលិតមួយចំនួនត្រូវបានអនុញ្ញាតដោយក្រសួងសុខាភិបាល ប៉ុន្តែក៏នៅតែមានផលិតផលខុសច្បាប់ផ្សេងទៀតកំពុងចរាចរណ៍លក់ដោយខុសច្បាប់នៅលើទីផ្សារ ដែលបច្ចុប្បន្នក្រសួងកំពុងតែមានវិធានការក្ដៅក្នុងការបង្ក្រាប។ ប្រើគ្រឿងសំអាងក្លែងក្លាយមិនត្រឹមតែប៉ះពាល់សុខភាពប៉ុណ្ណោះទេ ប៉ុន្តែអាចឈានដល់ការបាត់បង់ជីវិតថែមទៀតផង។
(រូបភាព៖ Freshnewsasia)
តាមប្រភពពីសារព័ត៌មាន Freshnews នៅក្នុងកិច្ចប្រជុំប្រចាំឆ្នាំលើកទី៥របស់សមាគមគ្រូពេទ្យសើស្បែកកម្ពុជាដែលបានរៀបចំឡើងកាលពីពេលកន្លងទៅ លោកសាស្ដ្រាចារ្យ ស៊ាង ហួង រដ្ឋលេខាធិការនៃក្រសួងសុខាភិបាល បានលើកឡើងថា បច្ចុប្បន្នប្រជាពលរដ្ឋដែលភាគច្រើនគឺជាស្ត្រីតែងតែប្រើប្រាស់ផលិតផលគ្រឿងសំអាងតាមប្រព័ន្ធអនឡាញ ដោយមិនបានពិនិត្យច្បាស់លាស់ពីគុណភាព និងប្រភពនោះឡើយ ពិសេសគឺមិនបានទៅពិគ្រោះជាមួយគ្រូពេទ្យឯកទេស ដែលនាំឲ្យមានអ្នកជំងឺខ្លះប៉ះពាល់ដល់សុខភាពធ្ងន់ធ្ងរ និងអាចឈានដល់បាត់បង់អាយុជីវិតផងដែរ។
លោកសាស្ត្រាចារ្យបានបន្តថា សុខភាពស្បែកគឺជារឿងសំខាន់ និងចាំបាច់ខ្លាំងណាស់ដែលមិនគួរមើលរំលង ដូច្នេះមុនពេលសម្រេចចិត្តជ្រើសរើសផលិតផលណាមួយមកប្រើប្រាស់ ត្រូវពិនិត្យពីប្រភពឲ្យបានច្បាស់លាស់ ថាតើមានការទទួលស្គាល់ពីក្រសួងសុខាភិបាលហើយឬនៅ? ក្នុងឱកាសនោះដែរក្រុមគ្រួពេទ្យជំនាញផ្នែកសើស្បែក ក៏បានអំពាវនាវឲ្យពលរដ្ឋចៀសវាងប្រើប្រាស់ផលិតផលដែលគ្មានការទទួលស្គាល់ពីក្រសួងសុខាភិបាល ក៏ដូចជាការពិនិត្យជំងឺពីគ្រូពេទ្យដែលគ្មានជំនាញជាដើម។
គួរបញ្ជាក់ផងដែរថា កាលពីអំឡុងខែវិច្ឆិកាឆ្នាំ២០១៩កន្លងទៅ កម្លាំងសមត្ថកិច្ច នាយកដ្ឋាននគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ ក្រសួងមហាផ្ទៃ ធ្លាប់បានរកឃើញផលិតផលគ្រឿងសំអាងក្លែងក្លាយ ១៤ប្រភេទ ដែលចំនួនប្រមាណ ២.៥៣២គីឡូក្រាម៕
ដោយ៖ ជួប ស្រីរ័ត្ន
