ស្អាតណាស់! រមណីយដ្ឋានអង្គរនឹងប្រែមុខមាត់ថ្មីឆាប់ៗនេះ
អាជ្ញាធរជាតិអប្សរា បាននឹងកំពុងយកចិត្តទុកដាក់កែលម្អបរិស្ថាននៅជុំវិញបរិវេណប្រាសាទអង្គរវត្ត ដែលនឹងត្រូវដាំស្មៅ ដាំកូនឈើ ដាំផ្កាព្រៃ រួមជាមួយនឹងការជួសជុលផ្លូវនិងប្រព័ន្ធរំដោះទឹក ព្រមទាំងកំពុងរៀបចំប្រព័ន្ធស្រោចស្រពស្វ័យប្រវត្តិវាលស្មៅផងដែរ ដែលនឹងធ្វើឲ្យបរិវេណប្រសាទអង្គរវត្តមានទេសភាពបៃតងគ្រប់រដូវកាល ដើម្បីផ្ដល់នូវភាពរីករាយនិងស្រស់ស្រាយជូនភ្ញៀវដែលមកទស្សនាកម្សាន្ត។ នេះបើយោងតាម នាយកដ្ឋានផ្សព្វផ្សាយ ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានបង្ហាញនូវមោទនភាពចំពោះការខិតខំប្រឹងប្រែងរបស់អាជ្ញាធរជាតិអប្សរា ដោយជាក់ស្ដែងក្រុមការងារកំពុងតែបានធ្វើការដកហូតដើមឈើនិងកាត់ក្រីមែកឈើដែលប៉ះពាល់ដល់ទេសភាពប្រាសាទ ព្រមទាំងរៀបចំបង្កើនទេសភាពបៃតងនៅខាងត្បូងប្រាសាទអង្គរវត្ត និងការបញ្ចូលទឹកក្នុងស្រះខាងត្បូងជាដើម ដែលផែនការអនាគតគឺសំដៅលើកកម្ពស់សោភ័ណភាព ការរៀបចំសណ្ដាប់ធ្នាប់សាធារណៈ និងបង្កើនភាពទាក់ទាញសម្រាប់ភ្ញៀវទេសចរមិនត្រឹមតែប្រាសាទអង្គរវត្តនោះទេ តែរមណីយដ្ឋានអង្គរទាំងមូល។
គួរបញ្ជាក់ អំពីការរៀបចំប្រព័ន្ធស្រោចស្រពវាលស្មៅក្នុងបរិវេណប្រាសាទអង្គរវត្តវិញ អ្នកនាំពាក្យអាជ្ញាធរជាតិអប្សរាបានបញ្ជាក់ថា អាជ្ញាធរជាតិអប្សរានឹងរៀបចំប្រព័ន្ធស្រោចស្រពស្វ័យប្រវត្តិដែលនឹងធ្វើការស្រោចស្មៅឲ្យមានភាពបៃតងទាំងខួបប្រាំងខួបវស្សា ហើយកិច្ចការនេះនឹងត្រូវអនុវត្តន៍ឱ្យរួចរាល់នៅក្នុងឆ្នាំ២០២០។ លើសពីនេះទៀត អាជ្ញាធរជាតិអប្សរារៀបចំឲ្យមានមណ្ឌលបដិសណ្ឋារកិច្ចសម្រាប់ភ្ញៀវទេសចរ ការរៀបចំចំណតត្រឹមត្រូវ ពិសេសរៀបចំសន្តិសុខសណ្ដាប់ធ្នាប់ និងការដាំកូនឈើឡើងវិញ កែលម្អបរិស្ថាននៅទីនោះឱ្យស័ក្ដិសមជារមណីយដ្ឋានបេតិកភណ្ឌពិភពលោក៕
ដោយ៖ ជួប ស្រីរ័ត្ន
