វិទ្យាស្ថានប៉ាស្ទ័រនឹងទទួលបន្ទុកពិនិត្យស្រាវជ្រាវ ប្រសិនផ្ទុះជំងឺរលាកសួតថ្មីនៅកម្ពុជា
ដោយសារជំងឺរលាកសួតដែលបង្កដោយវីរុសកូរ៉ូណាប្រភេទថ្មី (nCoV2019) នៃទីក្រុងហ្វូហានប្រទេសចិនបានបង្កឲ្យមានអ្នកជំងឺនិងចំនួនអ្នកស្លាប់កើនឡើងជាបន្តបន្ទាប់ និងបានរាតត្បាតរហូតដល់៤ប្រទេសធំៗ ហើយក្នុងនោះប្រទេសថៃដែលជាប្រទេសជិតខាងរបស់កម្ពុជាបានផ្ទុះជំងឺនេះប្រមាណ៤ករណីរួចមកហើយ ដំណឹងនេះបានធ្វើឲ្យប្រជាជនខ្មែរមួយចំនួនកំពុងតែមានការព្រួយខ្លាំង។
ជាមួយគ្នានេះ អ្នកនាំពាក្យក្រសួងសុខាភិបាល លោកជំទាវ ឱ វណ្ណឌីន នាឱកាសសន្និសីទសារព័ត៌មានស្ដីអំពី «វឌ្ឍនភាពរបស់ក្រសួងសុខាភិបាល និងបច្ចុប្បន្នភាពជំងឺរលាកសួត បង្កដោយវីរុសកូរ៉ូណា ប្រភេទថ្មី» នាទីស្ដីការគណៈរដ្ឋមន្ត្រីកាលពីពេលកន្លងទៅបានឲ្យដឹងថា ប្រសិនបើមានករណីសង្ស័យណាមួយថាមានជំងឺដែលបង្កដោយវីរ៉ុសកូរ៉ូណាប្រភេទថ្មីនេះនៅកម្ពុជា វិទ្យាស្ថានប៉ាស្ទ័រគឺជាអ្នកទទួលបន្ទុកក្នុងការពិនិត្យ និងជួយស្រាវជ្រាវ។
លោកជំទាវ បានបញ្ជាក់ថា ករណីដែលមានអ្នកស្លាប់ដោយសារជំងឺនេះ គឺមិនមែនបណ្ដាលមកតែពីជំងឺថ្មីនេះតែមួយមុខនោះទេ ពោលគឺអ្នកជំងឺទាំងនោះមានជំងឺប្រចាំកាយផ្សេងទៀតរួចទៅហើយមុននឹងកើតជំងឺនេះ។ ថ្វីត្បិតតែជំងឺដែលបង្កដោយវីរុសនេះត្រូវបានអះអាងថា អាចចម្លងពីមនុស្សទៅកាន់មនុស្ស ប៉ុន្តែក៏មិនទាន់មានការអះអាងជាក់លាក់ណាមួយនៅឡើយទេថា ការឆ្លងពីមនុស្សទៅកាន់មនុស្សនេះស្ថិតនៅក្នុងសភាពមួយដែលខ្លាំងក្លា។
គួរបញ្ជាក់ផងដែរថា ឯកឧត្ដម ម៉ម ប៊ុនហេង រដ្ឋមន្រ្តីក្រសួងសុខាភិបាល ទើបតែសម្រេចដាក់ម៉ាស៊ីនស្គេនកម្ដៅ នៅតាមច្រកអាកាសយាន្ដដ្ឋានអន្ដរជាតិទាំង៣ រួមមាន ភ្នំពេញ សៀមរាប និងព្រះសីហនុ។ ទន្ទឹមនឹងដាក់ម៉ាស៊ីនស្គេនទាំង៣នេះ ក៏មានការរៀបចំក្រុមការងារប្រចាំការនៅទីនោះផងដែរ ដើម្បីតាមដានស្ថានភាពអ្នកដំណើរ ដែលគាត់ហោះហើរចុះមកនឹង ជាពិសេស ជើងហោះហើរ ដែលមកពីទីក្រុងវូហាន៕
ដោយ៖ ជួប ស្រីរ័ត្ន
