តើអ្វីទៅជាទ្រព្យសម្បត្តិទី១ក្នុងភាពជាអ្នកដឹកនាំរបស់អ្នក?
មហាសេដ្ឋី Jeff Bezos ប្រធានក្រុមហ៊ុន Amazon ធ្លាប់បាននិយាយថា “ ប្រសិនបើអ្នកចង់ទទួលបានភាពជោគជ័យក្នុងនាមជាសហគ្រិន អ្នកត្រូវមានគំនិតមកពីគ្រប់ជ្រុងទាំងអស់។ អ្នកមិនអាចគិតត្រឹមតែខាងក្រៅប្រអប់ប៉ុណ្ណោះទេ (Think outside the box) អ្នកក៏ត្រូវគិតដល់ប្រអប់ដែលមិនទាន់មានផងដែរ”។
នេះមានន័យថា អ្វីដែលអ្នកគិត និងរបៀបគិតរបស់អ្នក គឺជាកត្តាកំណត់ និងមានឥទ្ធិពលបំផុតសម្រាប់ការបើកអាជីវកម្ម និងក្នុងនាមជាអ្នកដឹកនាំដ៏ល្អម្នាក់។ តាមពិតវានេះហើយដែលជាទ្រព្យសម្បត្តិសំខាន់បំផុតរបស់អ្នក។
សូមយកចិត្តទុកដាក់គិតចំណុចខាងក្រោមនេះ៖
- បង្ហាញទស្សនៈរបស់អ្នកចេញមក (ការចង់បង្កើតពិភពលោកមួយដែលអ្នកចង់បាន)
- ជំរុញឲ្យមានការសម្រេចចិត្តដ៏ត្រឹមត្រូវ
- ត្រូវមានឥទ្ធិពលលើបុគ្គលិករបស់អ្នក
- ផលប៉ះពាល់លើប្រសិទ្ធិភាពនៃការដោះស្រាយបញ្ហារបស់អ្នក
- កំណត់ការវិនិច្ឆ័យរបស់អ្នក
- កំណត់ ឬពង្រីកចក្ខុវិស័យរបស់អ្នក
- ដឹកនាំខ្លួនឯងនូវអ្វីដែលអាចធ្វើបាន
- កំណត់ពីរបៀបគ្រប់គ្រងខ្លួនឯង
- និងចំណុចជាច្រើនទៀត។
ការបរិយាយខាងលើនេះគឺជារបៀបដែលអ្នកត្រូវប្រតិបត្តិនៅខាងក្នុងក្រុមហ៊ុនរបស់អ្នក ហើយវានឹងបង្ហាញលទ្ធផលចេញមកខាងក្រៅ។ វាសំខាន់ណាស់សម្រាប់អ្នកដែលជ្រើសរើសធ្វើជាអ្នកដឹកនាំដើម្បីភាពជោគជ័យក្នុងស្ថាប័នទាំងមូល។
ប្រសិនបើមានសំនួរសួរថា តើអ្វីទៅជាមុខងារសំខាន់បំផុតដែលអ្នកដឹកនាំ ឬម្ចាស់អាជីវកម្មគួរយកចិត្តទុកដាក់បំផុត? តើអ្វីទៅជាចម្លើយដែលពេញនិយមបំផុតទាក់ទងនឹងសំនួរនេះ? ចម្លើយ គឺការគិតរបស់អ្នក។ អ្វីដែលអ្នកគិត និងវិធីគិតរបស់អ្នក គួរតែចំណុចសំខាន់តែមួយគត់ដែលអ្នកដឹកនាំគួរតែយកចិត្តទុកដាក់។
ការគិតរបស់អ្នក គឺជាដើមចមនាំឲ្យមានបទពិសោធន៍គ្រប់យ៉ាងដែលអ្នកបានជួបប្រទះនៅក្នុងជីវិត ហេតុដូច្នេះហើយទំនោរធ្វើអ្វីមួយដោយចេតនា ឬដោយការគ្រោងទុកគួរតែជារឿងអាទិភាព និងជាទម្លាប់សម្រាប់អនុវត្តក្នុងភាពជាអ្នកដឹកនាំរបស់អ្នក។
ខាងក្រោមនេះគឺជាសំណួរមួយចំនួនដែលអ្នកត្រូវពិចារណាដើម្បីជួយឲ្យអ្នកបង្កើតបានទ្រព្យសម្បត្តិទី១ដែលសំខាន់ជាងគេបំផុតក្នុងនាមជាអ្នកដឹកនាំ៖
- តើអ្នកជាអ្នកគិតប្រភេទណា? តើអ្នកនឹងពិពណ៌នាយ៉ាងដូចម្តេច?
- តើអ្នកមានទម្លាប់សម្រចចិត្តយ៉ាងដូចម្តេច?
- តើអ្នកបានរៀបចំជាមុននូវផែនទីបង្ហាញផ្លូវសម្រាប់លទ្ធផល និងផលប៉ះពាល់អ្វីមួយដែរឬទេ?
- តើអ្នកមានវិធីសាស្ត្រសម្រាប់ដោះស្រាយបញ្ហាដែរឬទេ?
- តើអ្នកទទួលស្គាល់ថា អ្នកមានអព្តត្តញ្ញាណ(ការយល់ច្បាស់ដោយមិនបាច់ពិចារណា) ដែរឬទេ?
- តើអ្នកដឹងពីរបៀបដែលអ្នកត្រូវពណ៌នាពីព្រឹត្តិការណ៍ផ្សេងៗក្នុងជីវិតប្រាប់ខ្លួនឯងដែរឬទេ?
- តើអ្នកចាត់ទុកខ្លួនឯងថា ជាអ្នកគិតដ៏ច្នៃប្រឌិតដែរឬទេ?
- តើវិធីអ្វីដែលអ្នកបានអនុវត្តដើម្បីធ្វើឲ្យការគិតរបស់អ្នកមានលក្ខណៈរស់រវើក?
- ជាទូទៅ តើអ្នកមានបានដឹងទេថា ការគិតរបស់អ្នកដំណើរការដោយរបៀបណា?
- តើអ្នក "រៀនសូត្រ" បានប៉ុន្មាន និងញឹកញាប់ដែរឬទេ? តើអ្នកស្រូបយកព័ត៌មានថ្មីៗយ៉ាងដូចម្តេច?
- តើអ្នកអាចរៀនសូត្រពីគ្រប់មជ្ឈដ្ឋានបានយ៉ាងដូចម្តេច?
- ក្នុងនាមជាអ្នកដឹកនាំ តើអ្នកចាត់ទុកថា ការរៀនសូត្រ និងការអភិវឌ្ឍជំនាញគិត គឺជាផ្នែកមួយនៃវប្បធម៌ភាពជាអ្នកដឹកនាំ និងជាវប្បធម៌ក្រុមហ៊ុនរបស់អ្នកដែរឬទេ?
ប្រភព៖ business2community
