នៅសហរដ្ឋអាមេរិកមានលេចឮព័ត៌មានថា បើគ្រូពេទ្យណានិយាយពីការខ្វះខាតឧបករណ៍ នឹងត្រូវបញ្ឈប់ពីការងារ
បណ្តាមន្ទីរពេទ្យមួយចំនួនកំពុងគំរាមកំហែងដល់បុគ្គលិកសុខាភិបាល ប្រសិនបើពួកគេផ្សព្វផ្សាយអំពីល័ក្ខខ័ណ្ឌការងាររ ឬបញ្ហាកង្វះនូវសម្ភាៈបរិក្ខារក្នុងកំឡុងពេលមាន ជំងឺរាតត្បាតនៃវីរុសកូវីដ១៩ មិនថាដោយសកម្មភាពផ្ទាល់ ឬសកម្មភាពអាចកើតឡើង នៅលើបណ្តាញសង្គម និងតាមរយៈអ៊ីម៉ែល បើទោះបីជាពិភពលោកជ្រាបហើយថា សហរដ្ឋអាមេរិកគឺជាមហាអំណាចសេដ្ឋកិច្ច និងមហាអំណាចប្រជាធិបតេយ្យយ៉ាងណាក្ដី។ នេះបើតាមសេចក្ដីរាយការណ៍ពីសារព័ត៌មាន Bloomberg។
លោកវេជ្ជបណ្ឌិត Ming Lin ជាគ្រូពេទ្យផ្នែកសង្គ្រោះបន្ទាន់នៅរដ្ឋ Washington បានអះអាងថា លោកត្រូវបានគេបញ្ឈប់ពីការងារ ដោយសារតែលោកបានធ្វើបទសម្ភាសន៍ជាមួយសារព័ត៌មានមួយបន្ទាប់ពីបានបង្ហោះលើហ្វេសប៊ុក រៀបរាប់ពីការខ្វះខាតនូវឧបករណ៍ការពារគ្រប់គ្រាន់ និងការធ្វើតេស្ត។ នៅទីក្រុង Chicago គិលានុបដ្ឋាយិកាម្នាក់ត្រូវបានគេបណ្តាញចេញ បន្ទាប់ពីបានផ្ញើអ៊ីមែលទៅមិត្តរួមការងារថា នាងត្រូវការម៉ាស និងឧបករណ៍ការពារផ្សេងបន្ថែមទៀតនៅពេលបំពេញការងារ។ នៅទីក្រុង New York វិញ ប្រព័ន្ធសុខាភិបាល NYU Langone បុគ្គលិករបស់ខ្លួនមិនអាចនិយាយទៅកាន់អ្នកសារព័ត៌មាននោះទេ ប្រសិនបើគ្មានការអនុញ្ញាតពីស្ថាប័នរបស់ខ្លួន។
លោកស្រី Ruth Schubert អ្នកនាំពាក្យសមាគមន៍គិលានុបដ្ឋាននៃរដ្ឋ Washington អះអាងថា ការធ្វើបែបនេះគឺដើម្បីរក្សានូវមុខមាត់របស់មន្ទីរពេទ្យខ្លួន។
បុគ្គលិកនៃមន្ទីរពេទ្យ NYU Langone ក្នុងទីក្រុង New York បានទទួលសេចក្តីជូនដំណឹងកាលពីថ្ងៃសុក្រពីលោក Kathy Lewis អនុប្រធានប្រតិបត្តិផ្នែកទំនាក់ទំនង ដោយអះអាងថា៖ «អ្នកណាដែលនិយាយជាមួយប្រព័ន្ធផ្សព្វផ្សាយដោយគ្មានការអនុញ្ញាត នឹងត្រូវជាប់វិន័យ រួមទាំងការបញ្ចប់ការងារផង»។
ទោះជាបែបនេះក្ដី លោក Jim Mandler អ្នកនាំពាក្យរបស់ NYU Langone Health បានមានប្រសាសន៍ថា គោលនយោបាយនេះ គឺដើម្បីការពារការសម្ងាត់របស់អ្នកជំងឺ និងបុគ្គលិកតែប៉ុណ្ណោះ។ «ដោយសារតែព័ត៌មានមានការវិវត្តឥតឈប់ឈរ និងដើម្បីរក្សានូវផលប្រយោជន៍ល្អបំផុត ដល់បុគ្គលិក និងស្ថាប័នរបស់យើង គឺមានតែអ្នកដែលទទួលបានព័ត៌មានថ្មីៗបំផុតប៉ុណ្ណោះ ដែលត្រូវបានអនុញ្ញាតឲ្យដោះស្រាយបញ្ហា (និយាយ) ជាមួយប្រព័ន្ធផ្សព្វផ្សាយ»។
ប្រព័ន្ធសុខាភិបាល Montefiore នៃទីក្រុង New York បានរំលឹកនៅក្នុងព្រឹត្តិប័ត្រថ្ងៃទី ១៧ ខែមីនាថា៖ «រាល់ការស្នើរសុំសារព័ត៌មានត្រូវតែ “ចែករំលែក និងត្រួតពិនិត្យ” ដោយនាយកដ្ឋានទំនាក់ទំនងសាធារណៈ។ គោលនយោបាយមិនត្រូវបានអនុញ្ញាតឲ្យទំនាក់ទំនងដោយផ្ទាល់ជាមួយអ្នកយកព័ត៌មាន ឬនិយាយក្នុងនាមស្ថាប័ន ក្នុងសមត្ថភាពណាមួយដោយគ្មានការយល់ព្រមជាមុននោះទេ»៕
អត្ថបទពាក់ព័ន្ធ៖
- ក្សត្រ វីជីរ៉ាឡុងកន ជួលសណ្ឋាគារផ្កាយ៤ ជាមួយស្រីស្នំ២០នាក់ នៅអាឡឺម៉ង់ ខណៈប្រទេសកំពុងវឹកវរកូវីដ១៩
- បញ្ហាផលិតកម្មនៅម៉ាឡេស៊ី ពិភពលោកមិនត្រឹមខ្វះស្រោមដៃពេទ្យ តែខ្វះទាំងស្រោមអនាម័យ
ដោយ៖ Anthony
