រថយន្តក្រុងម៉ាក Harry Potter ដែលជាធម្មតាដឹកអ្នកគាំទ្ររបស់ខ្លួនទៅទស្សនាស្ទូឌីយោ Warner Bros តែបានកំពុងប្រែក្លាយទៅជារថយន្តដឹកបុគ្គលិកសំខាន់ៗរបស់សេវាសុខភាពជាតិ​ (National Health Service : NHS) ដោយឥតគិតថ្លៃរវាងមន្ទីរពេទ្យដែលប្រយុទ្ធប្រឆាំងនឹងជំងឺឆ្លង យោងតាមការចុះផ្សាយដោយ​ Variety។

ឡានក្រុងមួយនេះត្រូវបានផ្តល់ជូនដោយក្រុមហ៊ុន Warner Bros ស្ទូឌីយោ Leavesden និងប្រតិបត្តិករឡានក្រុង Golden Tours ដើម្បីដឹកបុគ្គលិកសុខាភិ​បាល​សំខាន់ៗនៅចន្លោះទីតាំងចំនួន ៣ របស់សេវាសុខភាពជាតិ និងដំណើរការរៀងរាល់ថ្ងៃ​ចាប់ពីម៉ោង ៦:០០ នាទីល្ងាច និងឈប់ដំណើរការនៅម៉ោង​​ ១០:៤០ នាទីយប់។

លោក Paul da Gama ជាប្រធាននៅមន្ទីរពេទ្យ West Herts បានមានប្រសាសន៍ថា៖ «កម្លាំងពលកម្មរបស់យើងត្រូវបានបាត់បង់ដោយសារជំងឺ និងការដាក់ឲ្យនៅដាច់ដោយឡែក ហើយដូច្នេះវាពិតជាសំខាន់ណាស់នៅពេលដែលបុគ្គលិកទាំងនោះមានសុខភាពល្អវិញ ប៉ុន្តែមានបញ្ហាដឹកជញ្ជូនពួកគេត្រឡប់មកវិញ»។ លើ​សពីនេះ​លោកក៏បានថ្លែងអំណរគុណយ៉ា​ងជ្រាលជ្រៅចំពោះ Warner Bros. ស្ទូឌីយោ Leavesden និង Golden Tours ។

គួរ​បញ្ជាក់​ផង​ដែរ​ថា គិត​ត្រឹម​ម៉ោង ២១:០០នាទីយប់​ថ្ងៃ ១៥ ខែ​មេសា ឆ្នាំ២០២០នេះ​ នៅសហរដ្ឋអាមេរិកតួលេខថ្មីៗនេះបង្ហាញថាវីរុសនេះបានសម្លាប់មនុស្ស ២៦ ១៦៤ នាក់ និង​អ្នក​ឆ្លងសរុប​មាន​ ៦១៥ ៤០៦ករណី ខណៈ​អ្នក​ឆ្លង​សរុប​នៅទូទាំង​ពិភព​លោក​កើនឡើង​លើស ២លាន​នាក់​ហើយ៕

ដោយ៖ Anthony