ចិនផ្អាកការធ្វើតេស្តវ៉ាក់សាំងលើមនុស្ស ដោយសារកូវីដ១៩គ្រប់គ្រងបាន
ចិនសម្រេចផ្អាកការធ្វើតេស្តវ៉ាក់សាំងលើមនុស្ស (clinical trial) សម្រាប់ប្រឆាំងនឹងកូវីដ១៩ ដោយសារតែមិនមានបេក្ខជនគ្រប់គ្រាន់សម្រាប់ការធ្វើតេស្តបន្ទាប់ពីស្ថានភាពកូវីដនៅប្រទេសនេះស្ថិតនៅក្រោមការគ្រប់គ្រងបាន ពោលគឺមិនមានការផ្ទុះឡើងទ្រង់ទ្រាយធំដូចមុន។ នេះបើតាមការបញ្ជាក់របស់អ្នកជំនាញ ចុះផ្សាយដោយ The South China Morning Post ថ្ងៃទី១៦ ខែមេសា។
លោក Zhong Nanshan ប្រធានក្រុមផ្ដល់ប្រឹក្សាយោបល់រដ្ឋាភិបាល បានថ្លែងថា ការកត់ត្រាជាសាធារណៈបង្ហាញថា គម្រោងធ្វើតេស្តចំនួន ៤៥បានដកចេញ និងផ្អាកមុនពាក់កណ្ដាលខែមេសា ដែលជាកាលកំណត់ដោយក្រុងប៉េកាំង ហើយហេតុផលចម្បងគឺកង្វះនូវបេក្ខជនចូលរួម។ លោកបានថ្លែងដូច្នេះថា ៖«ការសិក្សាជាច្រើន ត្រូវបានផ្អាកដោយសារតែគ្មាននរណាម្នាក់រំពឹងថា ចិនអាចគ្រប់គ្រងជំងឺរាតត្បាតនេះបានយ៉ាងរហ័សបែបនេះនោះទេ»។
អត្ថបទទាក់ទង៖ វ៉ាក់សាំងសម្រាប់ COVID-19 របស់ចិន WHO បញ្ជាក់ថា មានតែ ១គត់ឈានដល់ពិសោធន៍ព្យាបាលលើកទី២
អ្នកជំនាញរូបនេះបានបន្តថា រលកនៃការផ្ទុះលើកទី១ កន្លងផុតទៅហើយ ហើយរលកលើកទី ២ត្រូវបានគ្រប់គ្រងយ៉ាងល្អ ខណៈនេះគ្មានឱកាសសម្រាប់ការធ្វើតេស្តលើមនុស្សទ្រង់ទ្រាយធំនោះទេសម្រាប់ករណីនៅប្រទេសចិននេះ។
បច្ចុប្បន្ននេះ ចិនមានករណីតិចតួចប្រចាំថ្ងៃ ខណៈកាលពីថ្ងៃព្រហស្បតិ៍មានត្រឹមតែ ២៦ករណី ដែលក្នុងនោះមាន ១៥ករណីជាករណីនាំចូល។
ការធ្វើតេស្តវ៉ាក់សាំងពីរ ដែលត្រូវបានទទួលស្គាល់ថា មានប្រសិទ្ធភាព ដែលមួយនោះគឺ Remdesivir។
អត្ថបទទាក់ទង៖ ការកាត់ជំនួយ WHO របស់លោក ត្រាំ រងការរិះគន់ពីចិន និងស្ថាប័នផ្សេងៗយ៉ាងចាស់ដៃ
ក្រុមអ្នកស្រាវជ្រាវនៅវូហាន បានចាប់ផ្ដើមធ្វើតេស្តឱសថដែលផលិតដោយក្រុមហ៊ុនអាមេរិក Gilead ដែលជាឱសថសម្រាប់ប្រើព្យាបាល Ebola ដោយប្រើក្រុមមនុស្សពីរប្រភេទ គឺក្រុមអ្នកមានអាការៈស្រាល និងក្រុមអ្នកមានអាការៈធ្ងន់ធ្ងរ។ ការសិក្សាទាំងពីរនេះ បានចាប់ផ្ដើមតាំងពីខែកុម្ភៈ ហើយបើតាមផែនការគឺត្រូវបញ្ចប់នៅថ្ងៃទី២៧ ខែមេសា។ ប៉ុន្តែមកដល់ថ្ងៃពុធ នេះ បើតាមគេហទំព័ររបស់ចិន clinicaltrials.gov បង្ហាញ ក្រុមករណីស្រាលត្រូវបានផ្អាក និងក្រុមករណីធ្ងន់ធ្ងរត្រូវបានលប់ចោលវិញ។ បញ្ហាសំខាន់គឺថា កូវីដ១៩ នៅចិនត្រូវបានអះអាងថា ស្ថិតនៅក្រោមការគ្រប់គ្រងបានល្អ។
បើយោងតាមប្រភពដដែល បានឱ្យដឹងបន្ថែមទៀតថា របាយការណ៍ថ្មីមួយដែលទើបចេញផ្សាយដោយសារព័ត៌មាន People's Daily ដែលជាកម្មសិទ្ធិរបស់គណបក្សកុម្មុយនិស្តចិន ដែលបានដកស្រង់ប្រសាសន៍លោក Huang Wenxiang ប្រធាននាយកដ្ឋានជំងឺឆ្លងនៅ មន្ទីរពេទ្យ Chongqing Medical University លើកឡើងថា ការធ្វើតេស្តលើមនុស្សទៅលើឱសថ hydroxychloroquine sulphate ក៏ត្រូវបានបញ្ឈប់កាលពីខែមីនា ដោយសារតែមិនចំនួនតេស្តសំណាកគ្រប់គ្រាន់។
អត្ថបទទាក់ទង៖ ចិនរងការចោទថាបានធ្វើតេស្តអាវុធនុយក្លេអ៊ែរ ពេលពិភពលោករងទុក្ខកូវីដ១៩
គិតចាប់តាំងពីការផ្ទុះឡើងមក មានការធ្វើតេស្តវ៉ាក់សាំងលើមនុស្ស ចំនួន ៥៨០ត្រូវបានចុះបញ្ជីនៅប្រទេសចិន។ បើទោះបីជាមានការផ្អាក ឬបញ្ឈប់ តាមការលើកឡើងរបស់អ្នកជំនាញខាងលើថា ចំនួននេះបង្ហាញពីការប្ដេជ្ញារបស់ប្រទេសកុម្មុយនិស្តមួយនេះដើម្បីធ្វើការស៊ើបអង្កេតឱ្យបានស៊ីជម្រៅ និងស្វែងរកឱសថសម្រាប់ការព្យាបាលកូវីដ១៩ដែរ។
កាលពីថ្ងៃទី១២ ខែមេសា វ៉ាក់សាំង Adenovirus សម្រាប់ជំងឺវីរុស COVID-19 ដែលត្រូវបានស្រាវជ្រាវដោយក្រុមអ្នកជំនាញដែលដឹកនាំដោយលោកស្រី Chen Wei អ្នកជំនាញផ្នែកកិច្ចការស្រាវជ្រាវវេជ្ជសាស្រ្តយោធា នៃវិទ្យាស្ថានវិទ្យាសាស្រ្តយោធា ប្រទេសចិន ត្រូវបានឈានដល់ដំណាក់កាលពិសោធន៍ព្យាបាលជំងឺលើកទី២។
វ៉ាក់សាំង Adenovirus សម្រាប់ជំងឺវីរុស COVID-19 គឺមានតែមួយគត់លើពិភពលោក ដែលបានឈានដល់ដំណាក់កាលពិសោធន៍ព្យាបាលជំងឺលើកទី២។ ដំណាក់កាលតេស្តលើកទី១ បានធ្វើឡើងកាល ពីចុងខែមីនា ដែលផ្តោតសំខាន់ទៅលើសុវត្ថិភាព ហើយលើកទីពីរ ចាប់ផ្ដើមនៅថ្ងៃទី១២ ខែមេសា ទៅលើមនុស្ស ៥០០នាក់ដែលបានស្ម័គ្រចិត្ត ដែលម្ដងនេះគឺផ្ដោតសំខាន់ទៅលើប្រសិទ្ធភាព។ តេស្តលើកទីពីរនេះ មានទាំងស្ត្រីចំណាស់អាយុ ៨៤ឆ្នាំមកពីវូហានផង ដែលបានឆ្លងកាត់កាលពីថ្ងៃចន្ទ៕
អត្ថបទទាក់ទង៖ សារ ៣ ចំណុចពី WHO ផ្ញើជូនអ្នកកំពុងដាក់ខ្លួនឲ្យនៅដោយឡែកក្នុងករណីកូវីដ ១៩
ដោយ៖ វីរៈស័ក្តិ
