តំណាងWHOបកស្រាយពីហេតុផលដែលស្ថានភាពកូវីដ១៩នៅប្រទេសអ្នកមានធ្ងន់ធ្ងរខ្លាំងយើងមានតិច
សាធារណជនមានការងឿងឆ្ងល់ខ្លាំង ជុំវិញការរាតត្បាតនៃវីរុស កូវីដ១៩ ដែលស្ថានភាពនៅបណ្ដាប្រទេសអភិវឌ្ឍន៍ភាគច្រើន ជាពិសេសនៅអឺរ៉ុប និងអាមេរិក ដែលសុទ្ធសឹងមានប្រព័ន្ធសុខាភិបាលល្អ បានជួបបញ្ហាធ្ងន់ធ្ងរខ្លាំង ខណៈប្រទេសកំពុងអភិវឌ្ឍន៍ដូចជាកម្ពុជាជាដើមមានស្ថានភាពធូរស្រាល។
លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំនៅកម្ពុជា បានរៀបរាប់នៅ សន្និសីទសារព័ត៌មានរៀបចំឡើងដោយក្រសួងសុខាភិបាលកម្ពុជា នាព្រឹកនេះឱ្យដឹងថា ជំងឺកូវីដ១៩ នៅតែជាបញ្ហាធ្ងន់ធ្ងរនៅឡើយសម្រាប់ពិភពលោក ហើយល្បឿននៃមេរោគនេះមានការវិវត្តលឿនណាស់។
លោកស្រីបន្តទៀតថា វីរុសនេះ នឹងមិនបញ្ចប់នៅប្រទេសណាមួយមុននោះទេ តែទាន់តែពិភពលោកទាំងមូលអាចបញ្ចប់បានទាំងស្រុង ទើបវីរុសនេះត្រូវបានបញ្ចប់។
លោកស្រី វេជ្ជបណ្ឌិត Li Ailan បានលើកឡើងបន្តទៀតថា គិតតែត្រឹមម្សិលមិញ ពោលគឺថ្ងៃទី១៩ ខែមេសា នេះវីរុសកូវីដ១៩ បានឆ្លងដល់មនុស្សជាង ២,២លាននាក់ និងធ្វើឱ្យមនុស្សជាង ១៥ម៉ឺននាក់ស្លាប់ពីបណ្ដាប្រទេស និងដែនដីជាង ១៣០នៅទូទាំងពិភពលោកដែលសបញ្ជាក់ឱ្យឃើញថា «វីរុសនេះ ពិតជាបានសម្លាប់មនុស្សពិតមែន»។
ចំពោះហេតុផលសំខាន់ ដែលស្ថានភាពកូវីដ១៩ នៅ «ប្រទេសអ្នកមាន» មានសភាពធ្ងន់ធ្ងរខ្លាំង ពោលគឺមានចំនួនអ្នកឆ្លងច្រើន អ្នកស្លាប់ក៏ច្រើននោះ គឺដោយសារ ប្រទេសទាំងឡាយនៅលើពិភពលោក ឆ្លងកាត់ដំណាក់កាលវិវត្តន៍ផ្សេងៗគ្នា នៃការរីករាតត្បាតដោយវីរុសនេះ។
សម្រាប់កម្ពុជា WHO ពិតជាមានក្ដីសោមនស្សដែលបានឃើញនូវការឆ្លើយតប ដ៏ល្អរបស់កម្ពុជា ហើយយើងជាពិតជាសាទរចំពោះលទ្ធផលគ្មានករណីស្លាប់សូម្បីមួយករណី។ ប៉ុន្តែអ្នកស្រីបានសង្កត់ធ្ងន់ថា កម្ពុជាគឺទើបតែស្ថិតនៅក្នុងដំណាក់កាលដំបូងនៃការផ្ទុះឡើងនៅឡើយទេ ពោលគឺពុំទាន់មានករណីឆ្លងជាសហគមន៍ទ្រង់ទ្រាយធំដូចបណ្ដាប្រទេសអភិវឌ្ឍន៍នោះឡើយ។
ដោយឡែក សម្រាប់ប្រទេសអភិវឌ្ឍន៍វិញ មានករណីស្លាប់ច្រើន លោកស្រីបញ្ជាក់ថា ៖«ដោយសារតែនេះជាវីរុសថ្មី មានកត្តាជាច្រើនដែលយើងបានមិនបានដឹង។ ចំពោះប្រទេសមានការរាយការណ៍មានចំនួនស្លាប់ច្រើន គឺយើងសង្កេតឃើញថា ដោយសារតែប្រទេសទាំងនោះឈានដល់ដំណាក់កាលនៃការឆ្លងជាសហគមន៍ ឬឆ្លងទ្រង់ទ្រាយធំរួចទៅហើយ។ ជាឧទាហរណ៍ករណីនៅ វូហាន នៅអ៊ីតាលី និងទីក្រុង New York ជាដើម។ ទីក្រុង ឬប្រទេសទាំងនេះ គឺស្ថិតនៅក្នុងដំណាក់កាលទី២ ឬដំណាក់កណ្ដាលនៃការរាតត្បាតដល់សហគមន៍រួចទៅហើយ»។
មានកត្តាជាច្រើនដែល WHO បានធ្វើការប្រមូលជាទិន្នន័យដើម្បីវិភាគពីបណ្ដាប្រទេសជាច្រើន ក្នុងនោះមានទាំងអាយុ បញ្ហាប្រជាជនជាក់លាក់ និងកត្តាជាច្រើនទៀត។ ប៉ុន្តែអ្វីដែលសំខាន់នោះ និងដឹងច្បាស់នោះគឺថា បើយើងត្រៀមខ្លួនប្រយុទ្ធប្រឆាំងបានល្អកុំឱ្យមានការឆ្លងជាសហគមន៍នោះ នោះយើងអាចកាត់បន្ថយចំនួនករណីស្លាប់៕
ដោយ៖ រតនៈវិភូ
