មេរៀនហិរញ្ញវត្ថុចំនួន ៤ ដែលជំងឺកូវីដ ១៩ កំពុងបង្រៀនមនុស្សគ្រប់គ្នានៅពេលនេះ
ស្ថានភាពជំងឺកូវីដ ១៩ កំពុងធ្វើឲ្យសេដ្ឋកិច្ចពិភពលោកស្ថិតនៅក្នុងភាពត្រដាបត្រដួស ហើយមិនទាន់មាននរណាអាចព្យាករណ៍បានទេថា ជំងឺមួយនេះនឹងបន្តអូសបន្លាយទៅមុខដល់ ពេលណានោះទេ។ តិចឬច្រើនមកដល់ពេលនេះ មនុស្សមិនក្រោមពាន់លាននាក់ទេនៅជុំវិញពិភពលោកដែលកំពុងភ្លក់រសជាតិល្វីងជូរចត់បាត់បង់ការងារធ្វើ ឬខាតបង់ប្រាក់ចំណូលទាំងមិននឹកស្មានដល់។
នេះជាមេរៀនមួយដែលអ្នកត្រូវយកចិត្តទុកដាក់ថា តើអ្នកត្រូវធ្វើដូចម្តេចខ្លះដើម្បីធ្វើឲ្យការសម្រេចចិត្តហិរញ្ញវត្ថុរបស់អ្នកឲ្យបានល្អប្រសើរឡើងជាងមុនសម្រាប់បញ្ចៀសបញ្ហាដដែលៗកើតមានជាថ្មីម្តងទៀតនៅ ពេលក្រោយ? នៅថ្ងៃនេះ Bizkhmer លើកយកមេរៀន ៤ ចំណុចដែលអ្នកគួរអនុវត្តចាប់ពីថ្ងៃនេះតទៅ៖
១.ទំនុកចិត្តខ្លាំងពេកធ្វើឲ្យការសម្រេចចិត្តផ្នែកហិរញ្ញវត្ថុមានភាពចន្លោះប្រហោង
គ្មាននរណាម្នាក់នឹកស្មានដល់ថា ជំងឺកូវីដ ១៩ ធ្វើឲ្យសេដ្ឋកិច្ចពិភពលោកជួបវិបត្តិធ្ងន់ធ្ងរដល់ថ្នាក់នេះទេ។ មុនដំបូងអ្វីៗគ្រប់យ៉ាងហាក់ដូចជាកំពុងប្រព្រឹត្តទៅយ៉ាងរលូន ហើយមនុស្សជាច្រើនបានធ្វើការសម្រេចចិត្តហិរញ្ញវត្ថុដូចធម្មតាគ្មានអ្វីប្រែប្រួលទេ ចំណាយកាន់តែច្រើន យកលុយទៅវិនិយោគនេះវិនិយោគនោះ និងសន្សំបានតិចតួច។ ប៉ុន្តែអ្វីៗវាបានប្រែប្រួលនៅពេលនេះ។ អ្នកដែលធ្លាប់គិតថា ការងាររបស់ខ្លួននឹងល្អប្រសើរ ជំនួញរបស់ខ្លួនរឹងមាំអាចរកចំណូលបានច្រើន នៅទីបំផុតក៏ក្លាយទៅជាអ្នករងគ្រោះ។ នេះបានឆ្លុះបញ្ចាំងថា ភាពជឿជាក់ហួសហេតុនាំឲ្យមានការសម្រេចចិត្តហិរញ្ញវត្ថុខុស ហើយមើលងាយស្ថានការណ៍ដែលនាំទៅរកការបរាជ័យហិរញ្ញវត្ថុ។
២.អ្នកត្រូវតែមានប្រាក់សន្សំសម្រាប់គ្រាអាសន្ន
តិចឬច្រើននៅក្នុងកាលៈទេសៈនេះ ប្រាក់ចំណូលទាំងអ្នកធ្វើការ និងអ្នករកស៊ីនឹងទទួលរងផលប៉ះពាល់។ នេះច្បាស់ណាស់ថា អ្នកដែលគ្មានប្រាក់សន្សំសម្រាប់ការចំណាយនៅពេលមានគ្រាអាសន្ន (Emergency Fund) ជាប់ក្នុងខ្លួន នឹងមានហានិភ័យច្រើនជាងគេ។ ប្រសិនបើអ្នកមិនទាន់បានរៀបចំថវិកាមួយភាគសម្រាប់គ្រាអាសន្ននេះទេ អ្នកនឹងជួបបទពិសោធន៍ហិរញ្ញវត្ថុដ៏ជួរចត់ថ្ងៃណាមួយនៅ ពេលខាងមុខ។ តើអ្នកគួរមានប្រាក់សន្សំសម្រាប់គ្រាអាសន្នចំនួនប៉ុន្មាន? អ្នកគួរត្រៀមប្រាក់ក្នុងចំនួនមួយដែលអាចឲ្យអ្នករស់បានពី ៣ ទៅ ៦ ខែដោយគ្មានប្រាក់ចំណូល ឬប្រាក់ខែអាស្រ័យលើចំនួនមនុស្សពឹងលើប្រាក់ចំណូលរបស់អ្នក។ អ្នកត្រូវចាំថា ដើម្បីបញ្ចៀសបញ្ហាហិរញ្ញវត្ថុដោយឥតព្រាងទុកនៅថ្ងៃណាមួយ អ្នកត្រូវតែត្រៀមខ្លួនសន្សំប្រាក់សម្រាប់គ្រាអាសន្ននេះទុកឲ្យហើយ។
៣.កាលៈទេសៈនេះបញ្ជាក់ថា ការរកប្រភពចំណូលឲ្យបានច្រើនជាងមួយគឺជារឿងចាំបាច់ណាស់
នេះជាមេរៀនដ៏ ល្អមួយសម្រាប់ជីវិតអ្នកធ្វើការ ឬអ្នករកស៊ីក្នុងមុខជំនួញត្រឹមតែមួយកន្លែង។ ហេតុផលតែមួយគត់ដែលអ្នកត្រូវគិតគូរចំណុចនេះដោយសារតែថា ប្រសិនបើអ្នកបាត់បង់ការងារ ឬជំនួញមួយរបស់អ្នកមិនអាចឲ្យអ្នករកចំណូលបាន អ្នកនឹងបរាជ័យហិរញ្ញវត្ថុដែលវាងាយនឹងធ្វើឲ្យអ្នកធ្លាក់ចូលក្នុងវិបត្តិបំណុល។ អ្វីដែលវិបត្តិមួយនេះបានបង្រៀនមនុស្សគ្រប់គ្នានោះគឺថា ប្រាក់ចំណូលច្រើនប្រភពមិនត្រឹមតែអាចជួយឲ្យអ្នកឈានដល់គោលដៅហិរញ្ញវត្ថុរបស់អ្នកនៅក្នុងស្ថានភាពអំណោយផលប៉ុណ្ណោះទេ ប៉ុន្តែវាក៏អាចជួយអ្នកឲ្យជៀសផុតវិបត្តិហិរញ្ញវត្ថុបានដែរនៅពេលដែលសេដ្ឋកិច្ចមានបញ្ហា និងបាត់បង់ការងារធ្វើ។
៤.ការដាក់កម្រិតលើការចំណាយប្រចាំថ្ងៃគឺជាគន្លឹះដ៏សំខាន់សម្រាប់អ្នក
សូមចាំថា ប្រាក់សន្សំសម្រាប់ការចំណាយនៅពេលមានគ្រាអាសន្ន គ្មានបំណុល និងរកចំណូលបានកាន់តែច្រើនជាដើម គឺគ្មានប្រយោជន៍ឡើយ ប្រសិនបើអ្នករស់នៅគ្មានគោលការណ៍ដាក់កំហិតលើការចំណាយរបស់អ្នកឲ្យបានត្រឹមត្រូវ។ ទន្ទឹមនឹងនេះ ការត្រួតពិនិត្យចំណូលចំណាយរបស់អ្នកឲ្យបានហ្មត់ចត់ក៏នៅតែគ្មានប្រយោជន៍ដែរ ប្រសិនបើអ្នកមិនបានកំណត់ស្តង់ដាររស់នៅរបស់អ្នកនៅពេលចំណូលរបស់អ្នកកាន់តែកើនឡើង។ ធ្វើយ៉ាងណាកុំឲ្យខ្ទង់ចំណាយរបស់អ្នកមកកំណត់ចំណូលរបស់អ្នក ហើយបើគ្មានលទ្ធភាពរកចំណូលបន្ថែម សូមរក្សាការចំណាយឲ្យទាបជាងចំណូលរបស់អ្នក៕
អត្ថបទទាក់ទង៖
- តិកនិកវៃឆ្លាត ៣យ៉ាងជួយកាត់បន្ថយចំណាយ និងគ្រប់គ្រងហិរញ្ញវត្ថុបានយ៉ាងមានប្រសិទ្ធភាពបំផុត
- ចូលឆ្នាំ ២០២០ភ្លាម សូមកុំភ្លេចប្រើក្បួនហិរញ្ញវត្ថុទាំង ៦ នេះ
ដោយ៖ Kevin
ប្រភព៖ Entrepreneur
