ជំងឺរលាកសួតជាដើមហេតុធំមួយតែមួយគត់ ដែលបណ្ដាលឲ្យមានអត្រាមរណៈកុមារពិភពលោក។ តាមរបាណ៍ការពីអង្គការសុខភាពពិភពលោកបានឲ្យដឹងថា កុមារអាយុក្រោម ៥ឆ្នាំប្រមាណ ១,៤លាននាក់បានស្លាប់ក្នុងមួយឆ្នាំដោយសារជំងឺរលាកសួតនេះ។

១៨% នៃកុមារដែលបានបាត់បង់ជីវិតប្រចាំឆ្នាំ ត្រូវបានគេរកឃើញថាស្លាប់ដោយសារជំងឺរលាកសួត ហើយជំងឺមួយនេះវាបានជះឥទ្ធិពលដល់អាយុជីវិតកុមារ និងក្រុមគ្រួសារទាំងអស់នៅគ្រប់ទីកន្លែងលើពិភពលោកនេះ តែធំបំផុតគឺនៅតំបន់អាស៊ីខាងត្បូង និងអនុតំបន់សាហារ៉ា។ កុមារអាចទទួលបានការការពារដោយវិធីសាមញ្ញៗ ព្រមទាំងទទួលបានការព្យាបាល និងថែទាំដោយចំណាយតិច។ 

ជំងឺរលាកសួតគឺជាទម្រង់មួយនៃការឆ្លងមេរោគផ្លូវដង្ហើមស្រួចស្រាវដែលប៉ះពាល់ដល់សួត។ សួតត្រូវបានបង្កើតឡើងពីថង់តូចៗហៅថា alveoli ឬហៅថាថង់សួត ដែលវាបំពេញដោយខ្យល់នៅពេលមនុស្សមានសុខភាពល្អដកដង្ហើម។ តែនៅពេលដែលមនុស្សម្នាក់ៗមានជំងឺរលាកសួត alveoli ឬថង់សួតត្រូវបានពោរពេញទៅដោយខ្ទុះ និងសារធាតុរាវដែលធ្វើឱ្យមានការឈឺចាប់ពេលដង្ហើម និងកំណត់ការទទួលអុកស៊ីសែន (ទទួលអុកស៊ីសែនមិនគ្រប់គ្រាន់)។

ការឆ្លើយតបរបស់អង្គការសុខភាពពិភពលោក

កាលពីឆ្នាំ ២០០៩ អង្គការសុខភាពពិភពលោក រួមជាមួយ UNICEF បានដាក់ចេញនូវផែនការសកម្មភាពសកលសម្រាប់ការបង្ការនិងគ្រប់គ្រងជំងឺរលាកសួត។ គោលបំណងនៃការបង្កើតផែនការមួយនេះ គឺដើម្បីពន្លឿនការគ្រប់គ្រងជំងឺរលាកសួតជាមួយ នឹងការរួមបញ្ចូលគ្នានៃអន្តរាគមន៍ដើម្បីការពារនិងព្យាបាលជំងឺរលាកសួតចំពោះកុមារដែលមានសកម្មភាពដូចជា៖

១) ការពារកុមារពីជំងឺរលាកសួតរួមមាន ការលើកកម្ពស់ការបំបៅកូនដោយទឹកដោះ ការលាងដៃ និងការកាត់បន្ថយការបំពុលខ្យល់ក្នុងផ្ទះ។

២) ការពារកុមារពីជំងឺរលាកសួតដោយផ្តល់វ៉ាក់សាំង

៣) ព្យាបាលជំងឺរលាកសួតផ្តោតលើការធ្វើឱ្យប្រាកដថា កុមារដែលឈឺគ្រប់រូបអាចទទួលបានការថែទាំត្រឹមត្រូវ ទាំងពីបុគ្គលិកសុខាភិបាលនៅតាមសហគមន៍ ឬនៅតាមមណ្ឌលសុខភាព ប្រសិនបើជំងឺនេះធ្ងន់ធ្ងរ និងអាចទទួលថ្នាំអង់ទីប៊ីយោទិចនិងអុកស៊ីសែនដែលពួកគេត្រូវកាងវរ។ ដើម្បីជាសះស្បើយ៕