កម្ពុជារកឃើញបុរសម្នាក់ទៀតឆ្លងវីរុសកូរ៉ូណាក្រោយវិលត្រឡប់ពីប្រទេសសហរដ្ឋអាមេរិក
ភ្នំពេញ- ក្រសួងសុខាភិបាលបានប្រកាសពីការរកឃើញបុរសជនជាតិខ្មែរ សញ្ជាតិអាមេរិកម្នាក់ទៀតឆ្លងវីរុសកូរ៉ូណា បន្ទាប់ពីធ្វើដំណើរវិលត្រឡប់ពីប្រទេសសហរដ្ឋអាមេរិក ដែលនាំឱ្យចំនួនឆ្លងសរុបកើនឡើងដល់ ១៣០ ករណីនៅទូទាំងប្រទេស។
ក្នុងសេចក្តីប្រកាសព័ត៌មាននៅថ្ងៃទី ២៣ ខែមិថុនានេះ ក្រសួងសុខាភិបាល ឱ្យដឹងថា បុរសខ្មែរ មានសញ្ជាតិអាមេរិកកាំង វ័យអាយុ ៦៦ឆ្នាំ មានអាសយដ្ឋានស្នាក់ នៅភូមិដំណាក់ប្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ត្រូវបានធ្វើតេស្តរកឃើញឆ្លងវីរុសកូរ៉ូណាកាលពីថ្ងៃម្សិលមិញនេះ តែមួយថ្ងៃប៉ុណ្ណោះ ក្រោយពីគាត់បានធ្វើដំណើរវិលត្រឡប់ពីប្រទេសសហរដ្ឋអាមេរិក កាលពីថ្ងៃទី២១ ខែមិថុនា។
បើតាមសេចក្ដីប្រកាសព័ត៌មានដដែល បុរសកម្ពុជារូបនេះ ត្រូវបានដាក់ឱ្យស្ថិតក្រោមការព្យាបាលដាច់ដោយឡែកនៅឯមន្ទីរពេទ្យមិត្តភាពខ្មែរ-សូវៀត។
ក្រសួងបានបញ្ជាក់ឲ្យដឹងទៀតថា ជើងហោះហើរដែលរកឃើញបុរសជនជាតិខ្មែរមានជំងឺកូវីដ១៩នេះ មានអ្នកដំណើរសរុបចំនួន ១១២នាក់ (ស្ត្រី ៤១នាក់ និងបុរស ៧១នាក់) ហើយក្នុងចំនួននេះមានជនជាតិខ្មែរចំនួន៨៩នាក់ (ស្រី ៣៥នាក់) និងជនបរទេសចំនួន២៣នាក់ (ស្រី ៦នាក់)។
ចំពោះអ្នកដំណើរដែលមានលទ្ធផលតេស្តអវិជ្ជមានវីរុសកូវីដ-១៩នោះ ត្រូវបានដាក់ឱ្យធ្វើចតាឡីស័ក ចំនួន១៤ថ្ងៃ នៅមណ្ឌលចត្តាឡីស័កជម្ពូវ័ន១ (សម្រាប់អ្នកដែលមិនមានលទ្ធភាពបង់ថ្លៃសណ្ឋាគារ) និងសណ្ឋាគារមួយក្នុងទីក្រុងភ្នំពេញ (សម្រាប់អ្នកដែលជ្រើសរើសយកការបង់ថ្លៃសណ្ឋាគារ) ដើម្បី តាមដានសុខភាពបន្តសទៀត។
គិតដល់ថ្ងៃទី ២៣ ខែមិថុនា ឆ្នាំ២០២០ កម្ពុជារកឃើញអ្នកកើតជំងឺកូវីដ១៩ សរុប ១៣០នាក់ ក្នុងនោះអ្នកត្រូវបានព្យាបាលឱ្យជាសះស្បើយពីជំងឺកូវីដ១៩ ចំនួន ១២៧នាក់ ហើយនៅសល់ ៣នាក់កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតនៅឡើយ៕
ដោយ៖ នូ វិរៈ
