នេះជាសាលាដែលល្បីថា និស្សិតបញ្ចប់ទៅក្លាយជាមហាសេដ្ឋីកាន់កាប់ក្រុមហ៊ុនរាប់ពាន់លានដុល្លារ
នេះជាលើកទី២ហើយនៅក្នុងរយៈពេល ២ឆ្នាំជាប់ៗគ្នាដែលសាកលវិទ្យាល័យ Stanford (Stanford University) បានជាប់ឈ្មោះជាសាកលវិទ្យាល័យថ្លៃជាងគេបំផុតនៅក្នុងចំណោមសាកលវិទ្យាល័យឯកជនល្បីល្បាញជាច្រើនរបស់អាមេរិក។
សាកលវិទ្យាល័យដែលមានវ័យចំណាស់ ១២៩ឆ្នាំមួយនេះកំពុងត្រូវបានគេចាត់ទុកថា ជាសាកលវិទ្យាល័យមានកេរ្តិ៍ឈ្មោះល្បីបំផុតដែលមាននិស្សិតបញ្ចប់ទៅក្លាយជាមហាសេដ្ឋីកាន់កាប់ក្រុមហ៊ុនធំៗ និងមានតំណែងកំពូលៗនៅតាមស្ថាប័នក្រុមហ៊ុនល្បីៗជាច្រើនទៀត។
ស្ថិតនៅទីក្រុងបច្ចេកវិទ្យា Silicon Valley រដ្ឋ California សាកលវិទ្យាល័យនេះបានក្លាយជាប៉ូលដ៏សំខាន់មួយដែលបណ្ដុំទៅដោយអតីតនិស្សិតធ្វើជាមហាសេដ្ឋីល្បីៗនៅលើពិភពលោកដូចជា ស្ថាបនិករួមក្រុមហ៊ុន Google លោក Sergey Brin និងលោក Larry Page ស្ថាបនិកក្រុមហ៊ុន Yahoo លោក Jerry Yang និងលោក David Filo និងស្ថាបនិករួមក្រុមហ៊ុន Istragram លោក Mike Krieger និង Kevin Systron ជាដើម។
លោកស្រី Mary Barra ដែលជានាយកប្រតិបត្តិក្រុមហ៊ុន General Motors ក៏ជាអតីតនិស្សិតសាកលវិទ្យាល័យនេះដែរ។ ចំណែកឯមហាសេដ្ឋី Elon Musk ដែលជាស្ថាបនិកក្រុមហ៊ុន SpaceX និងក្រុមហ៊ុន Tesla មានគម្រោងដាក់ពាក្យចូលរៀននៅសាលានេះដែរ ប៉ុន្តែបានបោះបង់ទៅវិញ ហើយទៅបង្កើតក្រុមហ៊ុនដ៏ជោគជ័យបំផុតដំបូងគេរបស់លោក គឺក្រុមហ៊ុន Zip2។
មានមហាសេដ្ឋី និងស្ថាបនិកក្រុមហ៊ុនជាច្រើនទៀតសុទ្ធតែរៀនចប់ពីសាលាមួយនេះដូចជា ស្ថាបនិករួមរបស់ក្រុមហ៊ុន Nike លោក Phil Knight ស្ថាបនិកក្រុមហ៊ុន StubHub ក្រុមហ៊ុន WhatsApp ក្រុមហ៊ុន Netflix ក្រុមហ៊ុន LinkedIn ក្រុមហ៊ុន Snapchat ក្រុមហ៊ុន Cisco ក្រុមហ៊ុន PayPal និងក្រុមហ៊ុន YouTub ជាដើម៕
ដោយ៖ ខេវិន
ប្រភព៖ CNBC
