ត្រូវចាំចំណុចទាំង ៤នេះ នៅពេលមានមនុស្សជាច្រើនរិះគន់អ្នក ដើម្បីកុំឲ្យបាក់ទឹកចិត្ត
ក្នុងលោកនេះ គ្មាននរណាម្នាក់ដែលមិនត្រូវបានគេរិះគន់នោះទេ គ្រាន់តែតិច ឬ ច្រើន ប៉ុណ្ណោះ។ ពេលខ្លះការរិះគន់កើតឡើង ព្រោះតែឃើញមានកំហុសពិតមែន ប៉ុន្តែពេលខ្លះទៀត ការរិះគន់ក៏កើតឡើងដែរទោះបីជា មិនមានកំហុសអ្វីក៏ដោយ ហើយការរិះគន់បែបនេះវាមានលក្ខណៈក្ដិចត្រួយតម្រឹមទ្រើង។ ដូច្នេះហើយ សូមកុំខ្លាចពាក្យរិះគន់ ហើយត្រូវហ៊ានធ្វើអ្វីដែលខ្លួនយល់ថាត្រឹមត្រូវ។ ខាងក្រោមនេះ ជាចំណុចសំខាន់ៗដែលអ្នកគួរចងចាំ នៅពេលមានគេរិះគន់៖
១) ត្រឹមត្រូវឬ ខុស៖ ទោះបីជាយ៉ាងណាក៏ដោយ អ្នកត្រូវតែដកឃ្លាដើម្បីគិតបន្តិចសិនថា តើអ្វីដែលអ្នកបានធ្វើនោះខុស ឬ ត្រូវ? ហេតុអ្វីបានជាគេរិះគន់បែបនេះ? ការគិតបែបនេះ ដើម្បីជួយឲ្យអ្នក អាចមើលឃើញពីខ្លួនឯងកាន់តែច្បាស់ ព្រោះពេលខ្លះអ្នកក៏អាចសាងកំហុសឆ្គងត្រង់ចំណុចណាមួយដោយមិនដឹងខ្លួនដែរ។
២) បើឃើញថា ខុសត្រូវកែ តែបើមិនខុសទេគឺកុំខ្លាច៖ ប្រសិនបើឃើញថាខ្លួនខុសមែន គឺត្រូវតែកែ ប៉ុន្តែបើមិនខុសទេ គឺត្រូវតែបន្តដំណើរទៅមុខទៀត ទោះបីជា មានការរិះគន់យ៉ាងណាក៏ដោយ។ អ្នកត្រូវតែហ៊ានទទួលស្គាល់ការពិត ហើយកុំខ្លាចឲ្យសោះ ព្រោះវាជាផ្លូវតែមួយគត់ដែលអាចដោះស្រាយបញ្ហាបាន។ ត្រូវឬ ខុសវាមិនអាស្រ័យលើចំនួនមនុស្សនោះទេ ដូច្នេះហើយបើអ្នកមានគំនិតខុសពីមនុស្សភាគច្រើន នោះមិនមែនមានន័យថា អ្នកខុសឡើយ ដូចពាក្យមួយលើកឡើងថា «បើមនុស្សម្នាក់ឆ្កួត គេមើលឆាប់ដឹង តែបើមនុស្សមួយសង្គមឆ្កួត គេមើលមិនដឹងទេ»។
៣) ត្រូវព្យាយាមធ្វើវាឲ្យសម្រេច៖ ពេលខ្លះ អ្នកមិនចាំបាច់ព្យាយាមបកស្រាយអ្វីច្រើនពេកនោះទេ ជាពិសេសនៅពេលមានមនុស្សភាគច្រើនយល់ថា អ្នកធ្វើខុស ព្រោះបកស្រាយច្រើនប៉ុណ្ណោះក៏ពួកគេមិនព្រមស្ដាប់ដែរ។ ប៉ុន្តែអ្វីដែលអ្នកត្រូវធ្វើនោះ គឺត្រូវតែបញ្ចេញសកម្មភាពឲ្យបានច្រើន ពោលគឺធ្វើយ៉ាងណាឲ្យការយល់ឃើញរបស់អ្នកនោះចេញជារូបរាង ឬ ជោគជ័យ ដល់ពេលនោះ ពួកគេប្រាកដជាស្ងាត់ដូចគេញ៉ុកមាត់មិនខាន។
៤) មនុស្សគឺ មានគំនិតមិនដូចគ្នាទេ៖ ត្រូវចាំថា សូម្បីតែបងប្អូនបង្កើតក៏ដោយ ក៏ការគិតមានលក្ខណៈខុសគ្នាដែរ ដូច្នេះសូមកុំគិតថា វាជារឿងធំហួសហេតុពេកនៅពេលមាននរណាម្នាក់ ជំទាស់គំនិតរបស់អ្នក៕
ដោយ៖ អ៊ុន ភក្តី
