មិនថា Windows ជំនាន់ណាឡើយ ឱ្យតែធ្លាប់បានភ្ជាប់ទៅកាន់ Wi-Fi ណាមួយហើយ នោះវានឹងចងចាំ (Saved)។ លក្ខណៈនេះ នឹងផ្ដល់ភាពងាយស្រួលដោយអ្នក មិនចាំបាច់វាយបញ្ចូលលេខសម្ងាត់ម្ដងទៀតឡើយ។ យ៉ាងណា វាក៏ផ្ដល់ភាពពិបាកសម្រាប់ការភ្ជាប់ Wi-Fi មួយដែលបានប្ដូរ Password ថ្មីដែរ ព្រោះអ្នកនឹងពិបាក ព្រោះពេលចុច Connect វានឹងចាប់យកលេខសម្ងាត់ចាស់ ដែលជាហេតុធ្វើឱ្យកុំព្យូទ័រមិនអាចភ្ជាប់បាន ព្រោះពុំមានឱ្យវាយបញ្ចូល Password ថ្មី។
ប្រសិននៅលើ Windows 7 ឬ Windows 8 គឺមានភាពងាយស្រួល ដោយគ្រាន់តែចុចស្ដាំ Mouse រួចរើសយក Forget Password ជាការស្រេច។ ចំណែក Windows 10 មានភាពស្មុគស្មាញបន្តិច។ បើអីចឹងតោះមកអនុវត្តរបៀបលុប Password ចាស់នៃ Wi-Fi កុំព្យូទ័រ Windows 10 ខាងក្រោម៖
-ដំបូងត្រូវចូលទៅ Settings របស់កុំព្យូទ័រ ដែលអ្នកអាច Search បានជាមួយពាក្យ Settings ក្រោយពីចុចលើម៉ឺនុយ Start។
-ចុចលើ Network & Internet រួចហើយចុចលើ Wi-Fi ដែលនៅផ្នែកខាងឆ្វេង នៃ Network & Internet។
-រួចហើយចុចលើ Manage Wi-Fi settings
-ជាចុងក្រោយ លោកអ្នកគ្រាន់តែស្វែងរក និងចុចលើឈ្មោះ Wi-Fi នោះវានឹងបង្ហាញជម្រើសពីរគឺ Share និង Forget។ ត្រង់នេះ អ្នកត្រូវចុចលើ Forget ដើម្បីលុប password ចាស់ចោល ដើម្បីអាចវាយបញ្ចូល Password ថ្មីដែលគេបានប្ដូរ។
-កាន់តែពិសេស លោកអ្នកក៏អាចប្រើប្រាស់ Command Prompt ដើម្បីបំភ្លេច Password ចាស់នៃ Wi-Fi មួយបានផងដែរ។ ដើម្បីអនុវត្ត គត្រូវបើក Command Prompt windows ជាសិទ្ធិ Administrator ដោយចុចស្ដាំ Mouse នៅលើប៊ូតុង Start ឬចុចចង្កឹះ Windows Key + X ហើយរើសយក Command Prompt (Admin)។
-វាយបញ្ចូលពាក្យបញ្ជានៅក្នុងផ្ទាំងខ្មៅនៃ Command Prompt៖
netsh wlan show profiles
រួចហើយចុច Enter នោះវានឹងបង្ហាញបញ្ជីឈ្មោះ Wi-Fi ដែលកុំព្យូទ័រធ្លាប់បានភ្ជាប់ជាមួយ។
-បន្ទាប់មកវាយពាក្យបញ្ជា៖
netsh wlan delete profile name = “PROFILE NAME”
ឧទាហរណ៍ អ្នកចង់លុបឈ្មោះ “BTWiFi” ដូច្នេះត្រូវសរសេរថា៖ netsh wlan delete profile name = “BTWiFi”
ក្រោយពីបានអនុវត្តរបៀបទាំងពីរខាងលើ នោះនៅពេលអ្នកភ្ជាប់ទៅ Wi-Fi ដែលបានប្ដូរលេខសម្ងាត់ នឹងអនុញ្ញាតឱ្យអ្នកបញ្ចូល Password ថ្មីឡើងវិញ៕
