នៅដើមសប្ដាហ៍នេះ ក្រុមហ៊ុន Nokia បានប្រកាសរឿងសំខាន់ពីរ ទី១គឺខ្លួននឹងទិញយកក្រុមហ៊ុន Withings ក្នុងតម្លៃ ១៩១លានដុល្លារអាមេរិក ទី២ នឹងប្រើប្រាស់កាមេរ៉ាទំនើប OZO VR ថតវីដេអូក្នុងមុំ ៣៦០ដឺក្រេ ដើម្បីបង្កើតមាតិកាសិប្បនិមិត្តដូចពិតយ៉ាងពិសេស (Virtual Reality) ដើម្បីផ្ដល់បទពិសោធន៍នៅលើវីដេអូពេលអនាគត។

កាមេរ៉ា Nokia OZO VR ថ្មីៗនេះ ត្រូវបានប្រើសម្រាប់ថតវីដេអូផ្សព្វផ្សាយឈុតរឿង Jungle Book ដែលបច្ចុប្បន្នរឿងនេះ ត្រូវបានចាក់បញ្ចាំងនៅតាមមហោស្រពលើពិភពលោកហើយ។ កាមេរ៉ា Nokia អាចថតក្នុងមុំ ៣៦០ដឺក្រេ នៃកម្រាលព្រំក្រហមរបស់រឿង ហើយនិងថតជាលក្ខណៈ វីដេអូសម្រាប់ផ្សព្វផ្សាយមុនរឿងចាក់បញ្ចាំងផ្លូវការ។

វីដេអូដែលថតដោយកាមេរ៉ា Nokia ពេលនេះអាចបើកទស្សនាបានពី News Feed របស់បណ្ដាញសង្គម Facebook ហើយនិងមើលពីក្នុងបណ្ណាល័យវីដេអូ Facebook ៣៦០ដឺក្រេសម្រាប់ឧបករណ៍ Samsung Gear VR ដែលអាចប្រើប្រាស់ជាគូនឹងស្មាតហ្វូនស៊េរីចុងក្រោយ។ កាមេរ៉ាថត ៣៦០ដឺក្រេរបស់ Nokia OZO VR កាមេរ៉ា មានតម្លៃ ៦០០០០ដុល្លារ ដែលនឹងភ្ជាប់មកជាមួយសូហ្វ៊ែរកម្មវិធីស្រាប់ រួមទាំងមុខងារ time-saving ដូចជា integrated spatial audio array និង global shutter៕