ធ្លាប់មានករណីផ្ទុះទូរស័ព្ទមួយចំនួនបានកើតឡើងកន្លងមកហើយ នៅរយៈពេលប៉ុន្មានឆ្នាំចុងក្រោយ ហើយភាគច្រើនគឺបណ្ដាលមកពីការប្រើប្រាស់ឆ្នាំងសាកគ្មានគុណភាពតែម្ដង។ ចំណែករបាយការណ៍ថ្មីទើបទទួលបាននេះ បានឱ្យដឹងថា មានករណីផ្ទុះឆេះទូរស័ព្ទ Samsung ម៉ូដែល Galaxy S6 edge+។
តាមប្រភពព័ត៌មានរបស់គេហទំព័រ TechnoBuffalo បានឱ្យដឹងថា ទូរស័ព្ទ Samsung Galaxy S6 edge+ មួយគ្រឿងបានហុយផ្សែង និងផ្ទុះឆេះ ពេលកំពុងសាកថ្មនៅលើគ្រែ។ ខណៈដែលទូរស័ព្ទ S6 edge+ ត្រូវបានម្ចាស់យកទៅដោតសាកថ្មចោលនៅលើគ្រែ មិនបានប៉ុន្មាន គេក៏បានឮសំឡេងកម្លោច ដូចចៀនម្ហូបអីចឹង ជាមួយនិងក្លិនឆ្ងៀម។ ដូចគេស្មានមិនខុសមែន ដែលករណីផ្ទុះទូរស័ព្ទនេះ ដោយសារតែមិនបានប្រើប្រាស់ឆ្នាំងសាកថ្មដែលមានមកជាមួយ Galaxy S6 edge+ ប៉ុន្តែគឺ បានប្រើឆ្នាំងសាក Galaxy S III ជំនួសទៅវិញ។
យោងតាមមជ្ឈមណ្ឌលជួសជុល Repair Center ក្នុងទីក្រុង Pembroke Pines រដ្ឋ Florida បានឱ្យដឹងថា ការប្រើឆ្នាំងសាកថ្ម Galaxy S III អាចមិនធ្វើឱ្យកើតមានករណីផ្ទុះឆេះទូរស័ព្ទបានឡើយ។ វាអាចបណ្ដាលមកពីបញ្ហាថ្មនៅក្នុងទូរស័ព្ទ S6 edge+ ឬបញ្ហាទូរស័ព្ទផ្ទាល់ ទើបបណ្ដាលឱ្យកើតករណីផ្ទុះឆេះនេះឡើយ។ យ៉ាងណា ពេលនេះគេពុំទាន់ទទួលបានប្រតិកម្មតបពីក្រុមហ៊ុន Samsung នៅឡើយ៕
