កាលពីឆ្នំមុនទូរស័ព្ទ Nexus ត្រូវបានផលិតឡើងដោយក្រុមហ៊ុន Huawei និង LG ហើយពេលនេះ មានសេចក្ដីរាយការណ៍ Nexus បង្ហាញខ្លួនក្នុងឆ្នាំនេះ នឹងផលិតដោយក្រុមហ៊ុនទូរស័ព្ទតៃវ៉ាន់ HTC វិញ។

យោងតាមរបាយការណ៍ថ្មីមួយពីគេហទំព័រ The Verge បានឱ្យដឹងថា ក្រុមហ៊ុន HTC កំពុងផលិតស្មាតហ្វូនទំនើបចំនួនពីរម៉ូដែលនៅឆ្នាំនេះ គឺស៊េរី Nexus Phone និង Evan Blass ដែលនឹងមានឈ្មោះ M1 និង S1។

ចំណែកសេចក្ដីរាយការណ៍ពីគេហទំព័រ Android Police ឱ្យដឹងដែរថា ទូរស័ព្ទទាំងពីរនោះ នឹងមានលេខកូដ M1 ដែលមកពីពាក្យ Marlin និង S1 មកពីពាក្យ Sailfish នៅក្រុមហ៊ុន Google។ ទោះជាយ៉ាងណា គេពុំទាន់ទទួលបានដំណឹងអំពីលក្ខណៈសម្បត្តិស្មាតហ្វូនទាំងពីរនៅឡើយ គ្រាន់តែច្បាស់ថា វានឹងដំណើរការដោយប្រព័ន្ធប្រតិបត្តិការជំនាន់ចុងក្រោយរបស់ Google គឺ Android N ហើយ Android N ក៏មិនទាន់ដឹងថា មកពីពាក្យអ្វីនៅឡើយ។ HTC បានព្យាយាមលុកចូលទីផ្សារលក់ស្មាតហ្វូនរយៈពេលប៉ុន្មានឆ្នាំមកនេះ ហើយប្រសិនក្រុមហ៊ុនតៃវ៉ាន់នេះ សហការនឹង Google ផលិតស្មាតហ្វូន Nexus បញ្ចេញលក់ឆ្នាំនេះ វាប្រហែលជាអាចពង្រីកដល់អាជីវកម្មរបស់ក្រុមហ៊ុនបានខ្លះ៕