ដំណឹងល្អសម្រាប់លោកអ្នកដែលកំពុងស្វែងរក ទិញកុំព្យូទ័រ Surface Book របស់ Microsoft ពេលនេះក្រុមហ៊ុនបានប្រកាសលក់បញ្ចុះតម្លៃពិសេសរហូតដល់ ១៥០ដុល្លារអាមេរិក សម្រាប់ការជាវម៉ូដែលបំពាក់ឈីប Intel Core i5។
អ្នកអាចទិញកុំព្យូទ័រ Surface Book នេះបញ្ចុះតម្លៃសម្រាប់តែម៉ូដែលបានបញ្ជាក់ខាងលើប៉ុណ្ណោះ ដែលវាបានភ្ជាប់មកជាមួយអង្គផ្ទុកទិន្នន័យទំហំ 128GB ហើយមាន RAM 8GB និងបំពាក់អង្គប្រតិបត្តិ Intel Core i5។ តម្លៃធម្មតាសម្រាប់ម៉ូដែលនេះគឺ ១៤៩៩ដុល្លារ ប៉ុន្តែពេលនេះក្រុមហ៊ុនលក់បញ្ចុះមកនៅត្រឹម ១៣៤៩ដុល្លារអាមេរិក។
ចំណែកម៉ូដែលមានអង្គផ្ទុកទិន្នន័យ 256GB អមដោយ RAM 8GB, អង្គប្រតិបត្តិ Core i5 ដូចគ្នា ត្រូវបានក្រុមហ៊ុនលក់បញ្ចុះថ្លៃពី ១៦៩៩ដុល្លារ មកនៅត្រឹម ១៥៤៩ដុល្លារ។ ហើយម៉ូដែលមានអង្គផ្ទុកទិន្នន័យ 256GB, RAM 8GB, dGPU និងបំពាក់ Core i5 នឹងលក់បញ្ចុះតម្លៃមកនៅ ១៧៤៩ដុល្លារ ខណៈ ដែលតម្លៃធម្មតាគឺ ១៨៩៩ដុល្លារ។
កម្មវិធីលក់បញ្ចុះតម្លៃនេះគឺចាប់ពីថ្ងៃនេះ រហូតដល់ថ្ងៃទី១៤ ខែឧសភា។ ក្រុមហ៊ុន Microsoft នឹងលក់ Surface Dock ចុះថ្លៃ ៣០ដុល្លារ ប្រសិនបើអ្នកទិញដំណាលគ្នានឹងកុំព្យូទ័រ Surface Book។ ថេប្លេតនេះ មានអេក្រង់ទំហំ ១៣,៥អ៊ីញប្រភេទ PixelSense និងគាំទ្រប៊ិច Surface Pen៕
