BLU ក្រុមហ៊ុនទូរស័ព្ទដែលមានស្នាក់ការនៅទីក្រុង Miami សហរដ្ឋអាមេរិក ថ្មីៗនេះបានណែនាំស្មាតហ្វូន Adroid ស៊េរីថ្មីជាមួយភាពភ្ញាក់ផ្អើលជាមួយតម្លៃដ៏ធូរថ្លៃរបស់វា។ ស្មាតហ្វូនថ្មីនេះមានម៉ូដែល BLU Energy JR ដំណើរការដោយ Android 4.4 KitKat កាន់ថ្មបាន ៧២ម៉ោង ឬ ៣ថ្ងៃ និងមានតម្លៃត្រឹមតែ ៣៩ដុល្លារប៉ុណ្ណោះ។

ស្មាតហ្វូន Android តម្លៃថោកនេះ បានភ្ជាប់មកជាមួយអេក្រង់ ៤អ៊ីញកម្រិត 480x800px មានមេម៉ូរីម៉ាស៊ីនទំហំ 512MB (អាចបន្ថែមកាតមេម៉ូរី microSD) និងមាន RAM តែ 256MB អាចនិយាយបានថា លក្ខណៈ សម្បត្តិស័ក្ដិសមនឹងតម្លៃ។ ទូរស័ព្ទ Android ថ្មីរបស់ក្រុមហ៊ុនអាមេរិកនេះ ក៏មាន Wi-Fi សមស្របតាមតម្រូវការរបស់លោកអ្នកដែលចូលចិត្តអង្គុយតាមទាមកាហ្វេសុំ Wi-Fi គេលេង ប៉ុន្តែវាពុំមានបណ្ដាញ 3G ឬ 4G ឡើយ ពោលគឺមានត្រឹមតែ 2G EDGE ដែល BLU បានលើកឡើងថា គឺដើម្បីផ្ដល់ជម្រើសតម្លៃសមរម្យបំផុតដល់អតិថិជនដែលចង់ចំណាយតិចលើការប្រើប្រាស់ទូរស័ព្ទដៃ។

ស្មាតហ្វូន BLU Energy JR បានបំពាក់ដោយអង្គប្រតិបត្តិ quad-core MediaTek MT6571 អាចប្រើស៊ីមកាតបាន២ មានកាមេរ៉ាមុខ VGA, កាមេរ៉ាក្រោយទំហំ 3.2MP អមដោយភ្លើងជំនួយ LED flash។ និយាយចំពោះលក្ខណៈពិសេសនៅផ្នែកខាងខ្នងទូរស័ព្ទ គឺថា Energy JR ត្រូវបានពាសដោយស្បែកប្រភេទ faux ស្រដៀងនឹង Galaxy Note 3 របស់ Samsung ដែលចេញកាលពី ឆ្នាំ២០១៣។

ចំពោះថ្មរបស់ស្មាតហ្វូនតម្លៃ ៣៩ដុល្លារនេះ អាចកាន់បានរយៈពេលវែងរហូតដល់ ៧២ម៉ោង ឬ ៣ថ្ងៃ ជាមួយកម្រិតថ្ម 3000mAh។ Blu Energy JR មានលក់នៅលើគេហទំព័រ Amazon ជាមួយជម្រើសពណ៌ខ្មៅ និងពណ៌ស៕