iPhone 7 គឺជាអាវុធដ៏សំខាន់ថ្មីមួយទៀតរបស់ Apple សម្រាប់ការប្រកួតប្រជែងទីផ្សារស្មាតហ្វូននាពេលខាងមុខ ហើយរយៈពេលអស់ជាច្រើនខែមកនេះ ដំណឹងទាក់ទិនកំពូលទូរស័ព្ទជំនាន់ទី១០ នេះ នៅបន្តមានឥតឈប់ឈរ។ ជាក់ស្ដែង ថ្ងៃនេះ គេបានឃើញរូបគ្រោងឆ្អឹងថ្មីមួយទៀត ត្រូវបានបង្ហោះឡើងនៅលើបណ្ដាញអ៊ីនធឺណិតទៀតហើយ។ ផ្អែកតាមរូបគ្រោងឆ្អឹង (schematics) នេះ បង្ហាញថា Apple នឹងមិនទាន់ធ្វើការផ្លាស់ប្ដូររចនាបថ iPhone 7 ជាដុំកំភួននៅឡើយ ដែលវាអាចមានរូបរាងស្រដៀងច្រើនទៅនឹង iPhone 6s។

មានការអះអាងចេញពីប្រភពព័ត៌មានគួរឱ្យទុកចិត្តបានរបស់បារាំងគឺ Nowhereelse.fr បានបញ្ជាក់ពីដំណឹងល្អ និងដំណឹងអាក្រក់ទាក់ទងនឹង iPhone 7 ថា៖ +ដំណឹងអាក្រក់៖ -iPhone 7 នឹងមានប្រវែងទទឹង ៦៧,១២មិល្លីម៉ែត្រ និងកម្ពស់ ១៣៨,៣មិល្លីម៉ែត្រ -ខណៈ ដែល iPhone 6s មានទទឹង ៦៧,១មិល្លីម៉ែត្រ និងកម្ពស់ ១៣៨,៣មិល្លីម៉ែត្រដូចគ្នា គេហទំព័របារាំង Nowhereelse ថែមទាំងបានលើកឡើកថា iPhone 7 ទំនើងក៏នឹងមានកម្រាស់ស្មើនឹង iPhone 6s ដែរ គឺកម្រាស់ ៧,១មិល្លីម៉ែត្រ ដែលក្រាស់ជាង iPhone 6។ ដូច្នេះប្រសិនរូបរាង និងកម្រាស់ iPhone 7 ត្រូវបានផលិតដដែលដូចទៅនឹង iPhone ជំនាន់មុន ជឿថា អតិថិជនដែលធ្លាប់គាំទ្រ នឹងខកចិត្តជាមួយរូបរាងដដែលបែបនេះ។ +ដំណឹងល្អ៖ ប្រសិនបើអ្នកមើលឱ្យច្បាស់ទៅលើរូបរាងឌីហ្សាញតាមរយៈគ្រោងឆ្អឹង iPhone 7 នេះ វានឹងផ្ដល់ភាពងាយស្រួលក្នុងការចាប់កាន់។ លោកអ្នកអាចប្រណិតមើលលើគ្រោងឆ្អឹងខាងលើបាន ដោយវានឹងមិនមានរន្ធកាមេរ៉ាភ្លោះដូចនៅលើគ្រោងឆ្អឹងមុនឡើយ។ សម្រាប់ម៉ូដែល iPhone 7 អាចមានកាមេរ៉ាចំនួនមួយដដែល ប្លែកតែនៅលើ iPhone 7 Plus ឬ iPhone 7 Pro ដែលគេរំពឹងថា នឹងមានកាមេរ៉ាចំនួនពីរ។

មតិសាធារណជន និងបណ្ដាប្រភពព័ត៌មាននានារំពឹងថា ទោះជាយ៉ាងណា iPhone 7 ត្រូវតែមានល្បឿនដំណើរការលឿនជាង iPhone ជំនាន់មុនៗជាមិនខាន និងមានថាមពលថ្មធំជាងមុន ដើម្បីប្រើប្រាស់បានរយៈពេលយូរជាងមុន។ iPhone 7 នឹងត្រូវក្រុមហ៊ុន Apple កំណត់កាលបរិច្ឆេទប្រកាសនៅអំឡុងខែកញ្ញា ខាងមុខ ដែលជាជំនាន់ iPhone ទី១០ គិតចាប់ពីពេលចេញលក់ iPhone ជំនាន់ទី១ ឬ iPhone 2G៕