វិស័យបច្ចេកវិទ្យាបច្ចុប្បន្នមានការជឿនលឿន ក្នុងនោះ គេក៏បានអភិវឌ្ឍឧបករណ៍ GPS ដែលអាចតាមដានដឹងពីទីតាំង មនុស្ស ឬវត្តុបានយ៉ាងងាយស្រួល។ លើសពីនេះ គេថែមទាំងបានផលិតឧបករណ៍ឆ្លាតវៃមានមុខងារ GPS សម្រាប់តាមឃ្លាំមើលក្មេងតូចៗ ដើម្បីជាសុវត្ថិភាពខ្ពស់ដល់ពួកគេផងដែរ។ ទំព័រនេះ យើងនឹងលើកយកឧបករណ៍ GPS Tracker ដែលសម្រួលដល់អាណាព្យបាលក្នុងការតាមដានសកម្មភាពកូនៗបានងាយស្រួល៖

១) Weenect ជាផលិតផលរបស់ក្រុមហ៊ុនបារាំង Weenect បំពាក់មុខងារ GPS tracker អាចចាប់ទីតាំងរបស់មនុស្ស សត្វ។ វាត្រូវបានផលិតជាពិសេសសម្រាប់ការតាមឃ្លាំមើលក្មេងៗ ហើយក៏អាចប្រើសម្រាប់ឃ្លាំមើលមនុស្សចាស់ សត្វចិញ្ចឹមដូចជា ឆ្កែ ឆ្មាបានផងដែរ។

វាមានប៊ូតុង SOS និងមុខងារទូរស័ព្ទ។ វាអាចប្រាប់ដំណឹងដល់ឪពុកម្ដាយ អំពីទីតាំងកូនៗរបស់ពួកគេ ដោយប្រើប្រាស់សេវាកម្ម live maps និងត្រីវិស័យ ជាមួយមុខងារវាស់ចម្ងាយផ្លូវ អមដោយរ៉ាដា។ ឧបករណ៍នេះ ក៏អាចជូនដំណឹងដល់អាណាព្យាបាលឱ្យដឹងថា កូនៗរបស់គេបានត្រឡប់មកដល់ផ្ទះវិញ។ តម្លៃឧបករណ៍ Weenect គឺ ១១៣ដុល្លារអាមេរិក។ ២) Amber Alert

Amber Alert បានបំពាក់មកជាមួយថ្មប្រភេទ lithium ដែលអាចប្រើប្រាស់បានរយៈពេល ៤០ម៉ោង រាល់ពេលសាកថ្មពេញម្ដង។ វាត្រូវបានផលិតអមដោយមុខងារត្រួតពិនិត្យទីតាំង GPS ដែលងាយស្រួលតាមដានក្មេងៗ ប្រហាក់ប្រហែលនឹង Weenect ដែរ។ ប៉ុន្តែ Amber ត្រូវបានឌីហ្សាញមានរូបរាងងាយស្រួលសម្រាប់ការថ្ពក់នឹងហោប៉ៅក្មេងៗវិញ។ ឧបករណ៍នេះ នឹងប្រាប់ដំណឹងផ្ទាល់ៗ អមមកជាមួយមុខងារទាក់ទងទ្វេរភាគីបាន មានប៊ូតុង SOS និងមុខងារ safe zone។ តម្លៃរបស់ Amber Alert គឺ ១២៩,៩៩ដុល្លារ។ ៣) Filip 2

មានរូបរាងដូចជា smartwatch អីចឹង ដែលវាអាចឱ្យឪពុកម្ដាយមើលដឹងទីតាំងរបស់ក្មេងៗតាមមុខងារ GPS, GSM និង Wi-Fi។ វាអាចឱ្យអ្នករក្សាទុកនូវលេខទូរស័ព្ទចំនួន ៥ខ្សែដែលកូនៗអាចខលដោយគ្រាន់តែចុចប៉ះលើប៊ូតុងប៉ុណ្ណោះ។ ក្នុងករណីអាសន្ន ក្មេងៗអាចចុចប៊ូតុងពណ៌ក្រហម ដើម្បីដំណើរការខល និងការបញ្ចេញសំឡេង។ វាដូចជា Weenect គឺមានលទ្ធភាពបង្កើត safe zone ដូច្នេះអ្នកនឹងដឹង ពេលណា កូនៗនៅទីណា។ តម្លៃ Filip 2 គឺ ១៥០ដុល្លារអាមេរិក។ ៤) Tinitell

ត្រូវបានផលិតនៅក្នុងប្រទេសស៊ុយអែត ដែលជាឧបករណ៍ GPS tacker មិនចូលទឹក ហើយអមមកជាមួយមុខងារឃ្លាំមើលទីតាំង live map monitoring និង voice-recognition។ វាក៏មានមុខងារ 2-way communication ដែលអាចធ្វើទំនាក់ទំនងទ្វេភាគីបានផងដែរ ងាយស្រួលឱ្យក្នេងៗនិយាយជាមួយអាណាព្យបាលបានជាមួយមនុស្សផ្សេងៗចំនួន១២នាក់។ តម្លៃ Tinitell គឺ ១៥០ដុល្លារអាមេរិក។ ៥) SAFE Kids Paxie Band

ជាផលិតផលថ្មីជាងគេ នៅក្នុងក្រុមផលិតផល GPS tracker នេះ។ Safe Kids Paxie ជាខ្សែដៃត្រូវបានបញ្ចូលនូវមុខងារពិសេស អមដោយរចនាបថស្អាតទាន់សម័យ។ វាមានសមត្ថភាពខ្ពស់ សម្រាប់បំពេញការឃ្លាំមើលទីតាំងក្មេងៗ។ លើសពីនេះ វាថែមទាំងអាច វាស់សីតុណ្ហភាព សកម្មភាពប្រចាំថ្ងៃ ចង្វាក់បេះដូង និងជាច្រើនទៀត។ យ៉ាងណា ឧបករណ៍នេះ មិនអាចធ្វើការទាក់ទងគ្នាជាសំឡេង ឬសារអក្សរបានឡើយ។ តម្លៃរបស់វា គឺ ១៧៥ដុល្លារអាមេរិក៕